Տեսախցիկը ֆիքսել է Կոնգոյում ուղևորատար ինքնաթիռի բնակելի տների վրա ընկնելու պահը
Ուղևորատար ինքնաթիռը վթարի է ենթարկվել Կոնգոյի Դեմոկրատական Հանրապետությունում: Ողբերգությունը տեղի է ունեցել երկրի արևելքում՝ Մապենդո շրջանում: Թռիչքի մեկնարկից անմիջապես հետո խափանվել է ինքնաթիռի շարժիչը և այն ընկել է բնակելի տների վրա: Dornier-228 ինքնաթիռում են եղել 16 ուղևորները և անձնակազմի երկու անդամները:
Վթարից անմիջապես հետո ինքնաթիռը պայթել է, դեպքի վայրում ուժեղ հրդեհ է բռնկվել: Ականատեսների հաղորդմամբ, ինքնաթիռում գտնվողներից բացի, զոհերի թվում կան նաև տեղի բնակիչներ, որոնց մարմիններն այժմ հանվում են փլատակներից:
Զոհերի ճշգրիտ թիվն անհայտ է, հրշեջները փորձում են հանգցնել կրակը: Ինքնաթիռը պատկանում էր մասնավոր փոխադրողին, որը հրաժարվել է մեկնաբանել արտակարգ պատահարը, հաղորդում է BBC-ն: Ներկայումս երկրի ավիացիոն ծառայությունները միջադեպի վերաբերյալ հետաքննություն են սկսել: