«Միլանում տեղի ունեցածը հերթական շոուն էր, ոչ թե միջադեպ էր, այլ բեմադրություն».Գևորգ Գևորգյան (Տեսանյութ)

Միլանի հայկական եկեղեցում ՀՀ վարչապետի ելույթի ժամանակ ադրբեջանցու հետ կապված դեպքը հետևողական ու հետաքրքիր է այնքանով, որ կապված է վարչապետի բարի համբավի հետ։ Այսօր` նոյեմբերի 23-ին, նման կարծիք հայտնեց ռազմական, հասարակական գործիչ Գևորգ Գևորգյանը։

«Երկրորդ անգամ է նման բան տեղի ունենում, առաջին անգամ մի ադրբեջանցի վարչապետին գրիչ նվիրեց, երկրորդ դեպքն էլ սա էր, այսինքն՝ այնպես է ստացվում, որ կարողանում են հասնել վարչապետին, կարողանում են հարցեր տալ: Դրանք ինձ համար ինչ-որ ակնհայտ, արդեն իսկ պայմանավորված մոտեցումներ են, որ եթե նույնիսկ այդպես չէ, հերթական շոուն է, որը կարողանում է կազմակերպել Նիկոլ Փաշինյանը, որպեսզի կարողանա պահպանի իր իշխանությունը»,- ասաց Գևորգյանը։

Նրա խոսքով` եկեղեցում տեղի ունեցածը ոչ թե միջադեպ էր, այլ բեմադրություն։ Գեւորգյանի կարծիքով` վարչապետի անվտանգության աշխատակիցները բավականին փորձառու են, եւ նրանց կողքով դժվար թե ինչ-որ մեկը կարողանար անցնել և մոտենալ վարչապետին.

«Սա է պատճառը, որ ես այդ ամենը չեմ համարում միջադեպ, այլ բեմադրված ինչ-որ քայլ, ակցիա։ Այդ երբվանի՞ց է թուրքը դարձել հրեշտակ, նա միշտ էլ նույնն է մնացել։ Հիմա ինչո՞ւ է առաջնագծում համեմատաբար անդորր, և ինչո՞ւ է թշնամին առաջնագիծն այդպես ամրապնդում, ինչ են իրենք ուզում անեն եւ ուր է գնում այդ ամենը»,- ասաց Գևորգյանը։

Ինչ վերաբերում է վարչապետի այն հայտարարությանը, որ Արցախի հարցի լուծման տարբերակը պետք է ընդունելի լինի երեք ժողովուրդների համար, Գեւորգ Գևորգյանն ասաց՝ չկա որևէ մեկը կա, որը կարող է ներկայացնել, թե որն է այդ տարբերակը։