Շոտլանդիայի նախկին վարչապետը կանգնել է դատարանի առջև՝ բռնաբարության փորձ կատարելու մեղադրանքով

Շոտլանդիայի ազգային կուսակցության նախկին առաջնորդ եւ երկրի կառավարության նախկին ղեկավար, այժմ ռուսական RT ալիքի հաղորդավար Ալեքս Սալմոնդը կանգնել է դատարանի առջեւ՝ 10 կանանց հանդեպ բռնաբարելու փորձ եւ ոտնձգություններ կատարելու մեղադրանքով, հայտնում է BBC-ն։

Էդինբուրգի գլխավոր դատարանում Սալմոնդի գործով նախնական լսումներ են անցկացվել։ Մեղադրական եզրակացության համաձայն, բռնաբարության փորձերը եւ ոտնձգությունները կատարվել են 2008-2014թթ․, երբ Սալմոնդը Շոտլանդիայի կառավարության ղեկավարն էր։ Լսումներից հետո 64-ամյա Ալեքս Սալմոնդը լրագրողներին ասել է, թե մեղավոր չէ եւ մտադիր է ապացուցել դա դատարանում։

Օգոստոսին նախկին վարչապետն արդեն մեկ տարի շարունակվող դատավարության արդյունքում ավելի քան կես միլիոն ֆունտ էր ստացել Շոտլանդիայի կառավարությունից, որը Սալմոնդի հասցեին մեղադրանքների սեփական ներքին հետաքննություն էր անցկացրել։

Կառավարությունը, որը ղեկավարում է կուսակցությունում Սալմոնդի նախկին տեղակալ Նիկոլա Ստյորջենը, ընդունել է, որ հետաքննությունն իրականացվել է խախտումներով եւ դատարանի որոշմամբ Սալմոնդին փոխհատուցել է 512 000 ֆունտ (660 000 դոլար)։

Սակայն այս որոշումը վերաբերում է հենց պրոցեդուրաներին եւ պատասխան չի տալիս այն հարցին, թե արդար է արդյոք նախկին վարչապետին մեղադրանքներ ներկայացնելը։

Ինչպես դատարանում հաստատել են ոստիկանությունը եւ մեղադրողը, բռնաբարության փորձ Սալմոնդը կատարել է 2014թ․ հունիսին՝ Շոտլանդիայի կառավարության ղեկավարի Բյութ-Հաուզ առանձնատանը։ Նա, ըստ մեղադրական տեքստի, սեղմել է կնոջը պատին, պոկել է նրա հագուստը, ինքը հանվել, հրել նրան մահճակալին եւ պառկել վրան։

Հետաքննության կողմից նկարագրվող մնացած 13 դեպքերում խոսքը տարբեր աստիճանի համառության մասին է՝ կրծքին եւ ազդրերին հպումներից մինչեւ համբուրելու փորձեր։

Մեղադրանքի համաձայն, Սալմոնդի ոտնձգությունների զոհ է դարձել 10 կին։

Սալմոնդի գործի ըստ էության քննությունը Էդինբուրգի գլխավոր դատարանում կսկսվի հաջորդ տարվա մարտի 9-ին եւ կաշարունակվի, ինչպես նախատեսված է, չորս շաբաթ։