Հայաստանը չի կարող նպաստավոր լինել ընկերությունների համար, որոնք որոշակի միջազգային ստանդարտներով ու կանոններով չեն ուզում առաջնորդվել. Ավինյանը Տարոն Ավիայի մասին

Ալավերդու պղնձաձուլարանի շուրջ բանակցությունները չինական ընկերության հետ շարունակվում են: Այս մասին, այսօր՝ նոյեմբերի 20-ին, լրագրողների հետ զրույցում նշեց ՀՀ փոխվարչապետ Տիգրան Ավինյանը:

Դիտարկմանը, որ վերջերս հայտնի դարձավ, որ պղնձաձուլարանը տրվել է Թեղուտի հանքը շահագործող Նորիկ Պետրոսյանի փեսային, Ավինյանն ասաց. «Չինական ընկերությունը նախնական պայմանավորվածության համաձայն պլանավորում է այց Հայաստան եւ կարծում եմ, որ այդ այցի ժամանակ ես նույնպես կընդունեմ պատվիրակությանը:

Ընդհանուր առմամբ, նոր պղնձաձուլական համալիրի կառուցումը մեր օրակարգում է, որովհետեւ այն, ինչ առկա է Ալավերդիում, արդյունավետ չէ, բնապահպանական տեսակյունից շատ խնդրահարույց է: Այն, ինչ հիմա է քննարկվում, քիչ կապ ունի, ինչ եղել է նախկինում»:

Տիգրան Ավինյանը՝ անդրադառնալով նրան, որ «Տարոն ավիա» ընկերությունը դուրս եկավ հայկական շուկայից և գործունեություն է ծավալում Աֆրիկայում ասաց, որ Հայաստանը չի կարող նպաստավոր լինել ընկերությունների համար, որոնք որոշակի միջազգային ստանդարտներով ու կանոններով չեն ուզում առաջնորդվել:

«Ավիափոխադրումները մարշրուտկայով մարդ տեղափոխել չի: Իհարկե, մենք հիմա քննարկում ենք նաեւ մարշրուտկաների՝ «ԳԱԶԵԼ»-ների հարցը, եւ բավական ինչտենսիվ աշխատանք ենք տանում քաղաքապետարանի հետ, բայց «Տարոն Ավիան» ունեցել է խնդիր եվրոպական ավիացիոն կառույցներից մեկի հետ եւ չի անցել որոշակի ստանդարտներով: Մեր եվրոպացի գործընկերներն են մեզ տեղեկացրել, որ որոշակի ստանդարտներին չի համապատասխանում եւ խնդրահարույց են թռիչքները: Մենք բոլոր ուղղություններով խստացնում ենք մեր պահանջները: Իհարկե, ցավալի է, որ հայկական ընկերությունը ստիպված է դուրս գալ շուկայից, բայց եթե մենք խոսում ենք թռիչքների անվտանգության մասին, դա պետք է լինի մեր գերակայությունը եւ այստեղ զիջելու առանձնապես տեղ էլ չունենք»,-հայտարարեց փոխվարչապետը:

Նրա խոսքով, սա է լինելու ընդհանուր քաղաքականությունը բոլոր ոլորտներում. «Իհարկե, մենք հայկական ավիաընկերություններին փորձում ենք աջակցել տարբեր միջոցներով, բայց նաեւ պետք է հասկանանք, որ հին մեթոդներով, հին տրամաբանությամբ, հին որակով մենք չենք կարող առաջնորդվել»,-ասաց փոխվարչապետը:

Նա նաեւ տեղեկացրեց, որ «Տարոն ավիային» ժամանակ տրվել է, եւ ընկերությունը որոշել է, որ ինքը նպատակահարմար չի համարում այդ խնդիրների լուծումը, նպատակահարմար է համարում թռչել Աֆրիկա:

Տիգրան Ավինյանը՝ անդրադառնալով իր խորհրդական Ավելիք Էլոյանի եւ Կադաստրի կոմիտեի նախկին ղեկավար Սարհատ Պետրոսյանի միջեւ առկա հակամարտությանը, ասաց, որ միակ հավելյալ տեղեկությունը, որ կարող է ինքը տալ, այն է, որ Ավետիք Էլոյանը դիմել է դատարան:

«Կոնկրետ չգիտեմ՝ ինչպես է հիմնավորվում, ենթադրում եմ, որ զրպարտության հետ կապված»,-ասաց նա:

«Հիմա մի ժամանակաշրջան է, երբ բոլորն անում են տարատեսակ հայտարարություններ: Պետք է հասկանալ, թե այդ հայտարարություններն ինչ նպատակներով են արվում: Նույն պարոն Սարհատ Պետրոսյանի հրաժարականից հետո ես ստանում եմ նամակ Կադաստրի կոմիտեի վարչության պետերից մեկից, որտեղ նա խոսում է 2 տասնյակից ավելի կոռուպցիոն սխեմաների մասին, որը զեկուցվել է պարոն Պետրոսյանին եւ պարոն Պետրոսյանը ըստ այդ նամակի, չի տվել ընթացք:

Հիմա պետք է հասկանալ, թե ինչպես վերաբերվել նման հայտարարություններին: Կարծում եմ՝ պետք է հանգիստ վերաբերվել, կտրուկ շարժումներ չանել, վերլուծել, հասկանալ, նաեւ հասկանալ տողատակերը: Որովհետեւ այն վարչությունը, որի պետն այդ նամակն ինձ ուղղել է, շուտով փակվելու է: Ուզում եմ ասել՝ բոլոր հայտարարությունների մեջ պետք չի միայն բուն հայտարարությանն ուշադրություն դարձնել, այլ նաեւ հասկանալ մոտիվները, թե ինչու է դա արվում»,-հայտարարեց Ավինյանը:

Դիտարկմանը, որ քանի ոստիկանության 6-րդ վարչությունը ստուգումներ է իրականացնում Էլոյանի եղբոր ընկերությունում, մտավախություն չկա՞, որ կբացահայտվեն որոշակի կոռուպցիոն կապեր, փոխվարչապետը պատասխանեց. «Կարծում եմ՝ որեւէ գործընթաց, որ տեղի է ունենում, պետք է լինի օրենքին համահունչ: Եթե կան անձինք, որ խախտել են օրենքը, անկախ նրանից, թե ինչ պաշտոն են զբաղեցնում կամ ինչ հարաբերությունների մեջ են ներկա պաշտոնյաների հետ, պետք է ենթարկվեն պատասխանատվության»:

Ավելի վաղ NEWS.am-ը հայտնել էր, որ Սարհատ Պետրոսյանն «Ազատություն» ռադիոկայանին տված հարցազրույցի ընթացքում հայտարարել էր, որ Էլոյանը «ստացել է բազմաթիվ պատվերներ իր պաշտոնի չարաշահման, օգտագործման շնորհիվ»։ Խոսքը, մասնավորապես, Երեւանում 71 հարկանի շենքի շինարարության մասին է։ Սրա հետ կապված Էլոյանը դատի է տվել Սարհատ Պետրոսյանին եւ պահանջում է ներողություն խնդրել զրպարտության համար: