Երևանում մեկնարկել է «Մտավոր սեփականության ոլորտի դասավանդողների պատրաստում» երկօրյա աշխատաժողովը. ստորագրվել է հուշագիր
Նոյեմբերի 18-ին Երևանում մեկնարկել է «Մտավոր սեփականության ոլորտի դասավանդողների պատրաստում» երկօրյա աշխատաժողովը, որին մասնակցելու նպատակով Երևան է ժամանել Կորեայի Գյուտարարության խթանման ասոցիացիայի նախագահ Ջունիո Կոյի գլխավորած պատվիրակությունը: Աշխատաժողովին մասնակցելու են մտավոր սեփականության բնագավառի մասնագետներ Հայաստանից եւ Կորեայից:
Աշխատաժողովից առաջ ՀՀ էկոնոմիկայի նախարարության Մտավոր սեփականության գործակալության եւ Կորեայի գյուտարարության խթանման ասոցիացիայի միջեւ ստորագրվել է փոխըմբռնման հուշագիր մտավոր սեփականության ոլորտում ուսուցման մշակույթը խթանելու եւ համագործակցությունը խորացնելու նպատակով:
Հուշագիրը ստորագրել են Մտավոր սեփականության գործակալության պետ Երեմ Չախոյանը եւ Կորեայի գյուտարարության խթանման ասոցիացիայի նախագահ Ջունիո Կոն։
Հուշագրով նախատեսվում է, որ Կորեայի գյուտերի խթանման ասոցիացիան Հայաստանի Հանրապետության Էկոնոմիկայի նախարարության Մտավոր սեփականության գործակալության հետ կկիսվի մտավոր սեփականության ոլորտում իր ուսումնական ծրագրերով:
Մտավոր սեփականության ոլորտում ուսուցման մշակույթը խթանելու եւ երկու կազմակերպությունների միջեւ սերտ կապերը խորացնելու նպատակով կիրականացվի տեղեկատվության եւ կադրերի փոխանակում: Կողմերը կհամագործակցեն նաեւ մտավոր սեփականության ոլորտում մարդկային ռեսուրսների զարգացման ուղղությամբ, ներառյալ ուսանողների դասավանդումը, ուսուցիչների վերապատրաստումը եւ այս ոլորտում մտքերի ու փորձի փոխանակումը սեմինարների, աշխատաժողովների, կլոր սեղանների եւ ցուցահանդեսների կազմակերպման միջոցով:
Կողմերը կփոխանակեն հետազոտություններ, անհրաժեշտ տվյալներ, հրապարակումներ եւ մտավոր սեփականությանն առնչվող այլ նյութեր, ինչպես նաեւ կապահովեն երկու երկրներում կազմակերպվող եւ փոխադարձ հետաքրքրություն ներկայացնող համաժողովներին, գիտաժողովներին եւ ցուցահանդեսներին իրենց երկրների համապատասխան մասնագետների մասնակցությունը:
Մտավոր սեփականության գործակալության պետ Երեմ Չախոյանն իր ողջույնի խոսքում նշել է, որ գործակալության պատվիրակությունը 2018 թվականին այցելել է Կորեայի մտավոր սեփականության գրասենյակ (KIPO)՝ մտավոր սեփականության բնագավառում վերջիններիս կողմից մշակված ուսումնական ծրագրերին ծանոթանալու եւ այդ փորձը Հայաստանում ներդնելու նպատակով: Պատվիրակության ներկայացուցիչները մասնակցել են նաեւ ուսումնական հաստատություններում, մասնավորապես՝ դպրոցներում մտավոր սեփականության վերաբերյալ դասընթացներին, այցելել էլեկտրոնային խաղերի արտադրության ստուդիաները եւ ոգեւորվել ու անչափ տպավորվել են մտավոր սեփականության ոլորտում մշակված եւ Կորեայի դպրոցներում արդեն իսկ ներդրված ուսումնական ծրագրերով: Երեմ Չախոյանը հույս է հայտնել, որ երեւանյան երկօրյա աշխատաժողովը հնարավորություն կընձեռի մտավոր սեփականության ոլորտում ուսուցման միջազգային լավագույն փորձին ծանոթանալու իսկ Հուշագրով նախատեսված միջոցառումների շնորհիվ կհաջողվի այդ փորձը կիրառել նաեւ Հայաստանում:
Կորեայի Գյուտարարության խթանման ասոցիացիայի նախագահ Ջունիո Կոն, ողջունելով աշխատաժողովի մասնակիցերին, նշել է, որ շատ ուրախ է Հայաստանում գտնվելու համար եւ ավելացրել, որ իրենց թիմը պատրաստակամ է հայ գործընկերներին փոխանցելու մտավոր սեփականության բնագավառում իրենց փորձը եւ գիտելիքները։
Այնուհետեւ ՀՀ էկոնոմիկայի նախարարությունում տեղի է ունեցել նախարարի տեղակալ Նաիրա Մարգարյանի հանդիպումը Ջունիո Կոյի հետ։ Զրուցակիցները քննարկել են հետագա համագործակցության շրջանակները։