Քոչարյանի «մարգարեությունը». Ազատազրկված նախկին նախագահը «Կոնսենսուս՝ մինուս մեկ»-ի մասին խոսեց, սակայն դա իրականություն դարձավ ոչ թե Հայաստանում, այլ՝ Վրաստանում
Ազատազրկված նախագահ Ռոբերտ Քոչարյանը «Կոնսենսուս՝ մինուս մեկ»-ի մասին խոսեց, սակայն դա իրականություն դարձավ ոչ թե Հայաստանում, այլ՝ Վրաստանում, որտեղ բոլոր ընդդիմադիր ուժերը միավորվել են Բիձինա Իվանիշվիլիի դեմ։
Թբիլիսիի կենտրոնում Վրաստանի խորհրդարանի շենքի մոտակայքում ցուցարարները երեկ երեկոյան սկսել են բարիկադներ կառուցել: Նրանք ավազով և շինարարական աղբով լի պարկերով փակել են Զուբալաշվիլի եղբայրների փողոցը։
Ավելի քան 20 ընդդիմադիր կուսակցություններ երեկ Թբիլիսիի կենտրոնում մասշտաբային բողոքի ակցիա են անցկացնում՝ ի պատասխան սահմանադրական բարեփոխումների ձախողման: Ավելի վաղ նրանք հայտարարել են «խորհրդարանի լիարժեք պիկետավորման» սկզբի մասին և արգելափակել են խորհրդարանի բոլոր մուտքերը: «Մեկը բոլորի դեմ» բողոքի ակցիայի մասնակիցները իշխանություններին ներկայացրել են իրենց պահանջները՝ արտահերթ խորհրդարանական ընտրություններ համամասնական ընտրակարգով, ժամանակավոր, տեխնիկական կառավարության ձեւավորում, Կենտրոնական ընտրական հանձնաժողովի վերակազմավորում: Խորհրդարանի մուտքի մոտ մեծ թվով ոստիկանական ուժեր են տեղակայված: Ավելի վաղ երկրի ՆԳՆ-ն ակցիայի մասնակիցներին զգուշացրել է, որ «ցանկացած իրավախախտում, վարչական մարմինների արգելափակում կամ գրոհում անհապաղ կխոչընդոտվի ոստիկանության կողմից՝ օրենքի շրջանակում»:
Վրաստանում քաղաքական ճգնաժամը խորացավ այն բանից հետո, երբ օլիգարխ Բիձինա Իվանիշվիլիի կառավարող խմբակցության մեծամասնական ընտրակարգով ընտրված պատգամավորները մի քանի օր առաջ խորհրդարանում տապալեցին սահմանադրական ռեֆորմը, որը նախատեսում էր հաջորդ տարվա ընտրությունների կազմակերպում բացառապես համամասնական ընտրակարգով։
Հիմա Վրասատնում, ըստ էության, ստեղծվել է նախահեղափոխական մի իրավիճակ, որը մի կողմից միավորել է բոլոր ազդեցիկ ընդդիմադիր ուժերին, մյուս կողմից՝ անցած օրերին «Վրացական երազանք» կառավարող խմբակցությունը լքել են մեկ տասնյակից ավելի պատգամավորներ։
Իրավիճակն ուշագրավ է այն իմաստով, որ կոմպրոմիսային լուծումներ գտնելը դժվար է, ու փորձագետները ենթադրում են, որ իրադարձությունները կարող են հանգեցնել հեղափոխության, ինչը հանգեցնելու է արտահերթ ընտրությունների անցկացման, կամ՝ իշխանության ուժային միջամտության, ինչի հետևանքով հաջորդ տարվա ընտրություններին ընդառաջ ընդդիմության ռեսուրսները կարող են փոշիացվել։ Իհարկե, Թբիլիսիում հավատարմագրված արևմտյան դիվանագիտական ներկայացուցչություններն ակտիվ միջնորդական առաքելություն են իրականացնում՝ իշխանության և ընդդիմության միջև կոնսենսուս ձևավորելու համար։ Նրանք, ըստ էության, կորսված չեն համարում հնարավորությունը, որ ընտրական բարեփոխումը դեռ կարող է իրականություն դառնալ՝ թույլ տալով, որպեսզի իշխանությունն ու ընդդիմությունը նոր խաղի պայմաններով նախապատրաստվեն հաջորդ տարվա ընտրություններին։
Վրաստանը Հայաստանի համար բացառիկ ռազմավարական գործընկեր է ու մեզ համար խիստ կարևոր են այն իրադարձությունները, որոնք տեղի են ունենում բարեկամ երկրում։ Թբիլիսիում տեղի ունեցող իրադարձությունները խիստ կարևոր են ոչ միայն երկկողմ հարաբերությունների ու մեծաքանակ հայ համայնքի անվտանգության տեսանկյունից, այլ նաև տարածաշրջանային համատեքստում, եթե հաշվի առնենք այն հանգամանքը, որ ԱՄՆ-ը վերջին ամիսներին իր ռեգիոնալ քաղաքականության մեջ մեծացնում է հայկական բաղադրիչը։ Վրացական իրադարձությունները կարող են ավելի ընդգծված դարձնել այդ միտումը։
Նյութի աղբյուրը՝ 1in.am