«Քանի դեռ մեզ հրավեր չի եղել բանակցելու կամ խոսելու, չենք հայտնի նաև դիրքորոշում դրա վերաբերյալ. նախարարությունից կլինի հրավեր, կքննարկենք, կհասկանանք». ՀՅԴ երիտասարդները շարունակում են նստացույցը

Քանի դեռ մեզ հրավեր չի եղել բանակցելու կամ խոսելու, չենք հայտնի նաեւ դիրքորոշում դրա վերաբերյալ. նախարարությունից կլինի հրավեր, կքննարկենք, կհասկանանք: Այս մասին NEWS.am-ի հետ զրույցում նշեց ՀՅԴ երիտասարդական միության ատենապետ Արգիշտի Գեւորգյանը՝ անդրադառնալով ԿԳՄՍ նախարարության դիմաց նստացույցին:

«Նախարարը մի կողմից ասում է, որ պատրաստ է քննարկումների, մյւոս կողմից նշում է, որ միակ բանը, որ իրեն կտանի դեպի հրաժարական, հենց իր դիրքորոշումն է: Մենք պահանջում ենք նախարարի հրաժարականը, քանի որ նա այնքան վատ համբավ ունի արդեն, որ ես չեմ պատկերացնում, որ այդ համբավով նա կարող է լինել նախարար»,-ասաց նա:

ՀՅԴ-ական երիտասարդը նաեւ հավելեց, որ իրենք դեռ շարունակում են նստացույցը. «Մենք շարունակում ենք նստացույցը այնքան ժամանակ, քանի դեռ մտածում ենք, որ այս միջոցը ամենալավն է:Երբ այլ գործիք կգտնենք, որ ավելի արդյունավետ պայքարենք, միանշանակ կօգտագործենք այդ գործիքները»:

Հիշեցնենք, որ ԵՊՀ հայ բանասիրության եւ պատմության ֆակուլտետների ուսանողները նոյեմբերի 6-ից դասադուլ են անում՝ բողոքելով նախարարության նախաձեռնած «Բարձրագույն կրթության մասին» օրինագծից, որով առաջարկվում է բուհերում ոչ մասնագիտական ֆակուլտետներում հայեցողական դարձնել այժմ պարտադիր համարվող՝ «Հայոց լեզու», «Հայ գրականություն» և «Հայոց պատմություն» առարկաների դասավանդումը:

Նոյեմբերի 7-ին երիտասարդ դաշնակցականները ԿԳՄՍ նախարար Արայիկ Հարությունյանի հրաժարականի պահանջով ակցիա են անցկացրել եւ նախարարության շենքի դիմաց նստացույց հայտարարել:

Այսօր ԵՊՀ հայ բանասիրության եւ պատմության ֆակուլտետների շուրջ 50 դասախոսներ մեկօրյա գործադուլ են հայտարարել եւ իրենց աջակցությունը հայտնել ուսանողների պայքարին՝ նշելով, սակայն, որ նախարարի հրաժարականի պահանջ չունեն: Նրանք նաեւ կոչ են արել դադարեցնել դասադուլը:

Նստացույցի մասնակիցների կարծիքով՝ Արայիկ Հարությունյանը պետք է հրաժարական տա, քանի որ նրա կառավարման շրջանում նախարարությունը վարում է ապազգային քաղաքականություն՝ առաջ քաշելով վիճահարույց «Բարձրագույն կրթության մասին» օրինագիծը, առաջարկելով դպրոցական ծրագրից բերել «Հայոց եկեղեցու պատմություն» առարկան, ֆինանսավորելով «հակահայկական, սատանիստական» նախագծեր: Նրանց հատկապես զայրացրել է մեծ աղմուկ բարձրացրած՝ «ՀուԶանք ու Զանգ» ներկայացման համար նախարարության կողմից 2,7 միլիոն դրամ դրամաշնորհ տրամադրելու փաստը:

Արայիկ Հարությունյանը հայտարարել է, որ չի պատրաստվում հրաժարական ներկայացնել: