«Գոլոս Արմենիի». Հայաստանի իշխանությունների «Հոկտեմբերի 27-ի» գործի վերաբացման խաբեությունը ձախողվեց
Արդեն մեկ տարուց ավելի Նիկոլ Փաշինյանը լուծում է Գագիկ Ջհանգիրյանին աշխատանքի տեղավորելու դժվարին խնդիրը: Եվս մի փոքր, եւ նա հոգու խորքում կզղջա Փաշինյանի քաղաքական հաջողության մեջ անձնական ավանդի համար: Այս մասին գրում է «Գոլոս Արմենիի» պարբերականը՝ թեման զարգացնելով:
«Ջհանգիրյանը բոլոր նախագահների օրոք եղել է բարձր պաշտոնների, իսկ Նիկոլի օրոք հայտնվել է անորսալի վրիժառուների մասին կինոէպոպեայից գնդապետ Լեոպոլդ Կուդասովի վիճակում: Իշխանափոխությունից հետո Ջհանգիրյանն առաջին անգամ իր համար էլ անսպասելի չպահանջված դարձավ, չնայած մինչ այդ համարվում էր Լեւոն Տեր-Պետրոսյանի եւ Նիկոլի գլխավոր խորհրդականը: Նա ակտիվորեն հանդես էր գալիս լրատվամիջոցներով եւ Հանրային հեռուստաալիքով, մասնավորապես՝ այն պատճառների պարզաբանմամբ, որոնց համաձայն Հրայր Թովմասյանը պետք է հրաժարական տա ՍԴ նախագահի պաշտոնից: Բայց նոր պաշտոնին Ջհանգիրյանի ամենավճռական մղումը դարձավ պատգամավոր Արման Բաբաջանյանի 2 ժամ տեւած տեսակցությունը ահաբեկիչների պարագլուխ Նաիրի Հունանյանի հետ, որից հետո լրատվամիջոցները սկսեցին գրել «Հոկտեմբերի 27-ի» գործի վերաբացման մասին: Ակնհայտ էր, որ առանց Նիկոլի համաձայնության այդ հանդիպումը չէր կայանա, իսկ գործի վերաբացման դեպքում նոր քննության գլխին կհայտնվեր նա, ով գործի մասին ավելի շատ բան գիտի, քան որեւէ մեկը, այսինքն՝ Ջհանգիրյանը:
Ակնհայտ է, որ Հունանյանի հետ Բաբաջանյանի հանդիպման գաղափարը Նիկոլն առաջին հերթին քննարկել է Ջհանգիրյանի հետ: Պարոնայք ցանկանում էին աղմուկ սարքել՝ որպես առիթ օգտագործելով խորհրդարանում ահաբեկչական հարձակման 20-ամյակը: Բայց այստեղ տեղի ունեցավ այն, ինչը պարոնայք չէին սպասում եւ ինչին պատրաստ չէին. գործի վերաբացման դեմ հանդես եկան «Միասնություն» դաշինքի զոհված առաջնորդների ընտանիքները: Վերաբացման գաղափարը սվիններով դիմավորեցին զոհված Վազգեն Սարգսյանի եղբայրները, Կարեն Դեմիրճյանի այրին եւ որդին: Ստացվում է, որ Ջհանգիրյանը զուր ջանաց՝ իրավիճակ մոդելավորելով, որում նրան էր պատկանելու գլխավոր դերը: Հնարքը, որը Նիկոլը մտածել էր Ջհանգիրյանի հետ եւ որի իրականացմանը ներգրավվել էր Բաբաջանյանը, կարող էր գործել «անգրագետ պողոսների» մակարդակում, բայց ոչ մի դեպքում խորհրդարանում ահաբեկչության զոհերի ազգականների դեպքում: «Հոկտեմբերի 27-ի» գործի վերաբացման խաբեության ձախողման հետ կապված իրավիճակն անչափ կարեւոր է ընթացիկ գործընթացները հասկանալու համար: «Միասնության» հանգուցյալ առաջնորդների ազգականները, ըստ էության, անվստահություն հայտնեցին ոչ միայն Ջհանգիրյանին, այլեւ նոր իշխանություններին: Վազգեն Սարգսյանի եղբայրը պատահաբար չվկայակոչեց երկրորդ նախագահի գործով դատավարությունը եւ Սահմանադրական դատարանի շուրջ ստեղծված իրավիճակը»,- մասնավորապես նշում է պարբերականը:
Հոդվածն ամբողջությամբ կարդացեք «Գոլոս Արմենիի»-ում: