«Ինչքան քիչ խոսեն նման երևույթներից, այնքան լավ». Հայկ Սարգսյանը՝ միասեռականների կողմից երեխա որդեգրելու նախագծի մասին
Նման խնդիրների մասին ինչքան քիչ խոսեն, այնքան լավ: Այս մասին այսօր՝ նոյեմբերի 12-ին, ԱԺ-ում լրագրողների հետ զրույցում հայտարարեց ԱԺ «Իմ քայլը» խմբակցության պատգամավոր Հայկ Սարգսյանը՝ անդրադառնալով ԲՀԿ-ական պատգամավոր Գևորգ Պետրոսյանի նախագծին, որով պետք է արգելվեր նույնասեռականներին երեխա որդեգրել:
«Ինչպես մեր գործընկերները ներկայացրին, ամեն անգամ նման հարցեր շոշափելով, բարձրացնելով, այն ավելի մեծ նշանակություն ու կարևորություն է ստանում, ինչին ինքս դեմ եմ»,- ասաց Հայկ Սարգսյանը:
Ըստ նրա` Գևորգ Պետրոսյանը նախագիծ է բերել ԱԺ, որով ցանկանում է արգելել միասեռականների կողմից երեխա որդեգրելը, սակայն Հայաստանի պատմության մեջ չի եղել դեպք, երբ միասեռականները երեխա որդեգրեն: «Այսինքն՝ նա նախագիծ է բերել ԱԺ գոյություն չունեցող խնդրի մասին և անընդհատ շահարկում է»,- ընդգծեց հայկ Սարգսյանը:
Ավելի վաղ հայտնել էինք, որ այսօր «Ընտանեկան օրենսգրքում» փոփոխություն և լրացում կատարելու վերաբերյալ նախագծի քննարկման ժամանակ վեճ եղավ ԱԺ-ում Գևորգ Պետրոսյանի և ԱԺ նախագահ Արարատ Միրզոյանի միջև: