Էվո Մորալեսը հրաժարական է ներկայացրել, Ի՞նչ է կատարվում Բոլիվիայում

Բոլիվիայի նախագահ Էվո Մորալեսը նոյեմբերի 10-ին հայտարարել էր, որ հրաժարական է ներկայացնում: Ըստ տեղեկությունների, որոնք հրապարակել էր երկրի Բարձրագույն ընտրական դատարանը, Մորալեսը հաղթել է հոկտեմբերի 20-ին անցկացված նախագահական ընտրություններում: Ընտրությունների արդյունքների հրապարակումից հետո Բոլիվիայում ցույցեր էին սկսվել, փոխանցում է ՏԱՍՍ-ը:

Ինչի՞ց ամեն ինչ սկսվեց

Հոկտեմբերի 20-ին Բոլիվիայում տեղի էին ունեցել նախագահական եւ խորհրդարանական ընտրություններ: Պետական բարձրագույն պաշտոնին հավակնում էին 9 թեկնածուներ, բայց հիմնական պայքարը ծավալվել է Բոլիվիայի ներկայիս առաջնորդ Էվո Մորալեսի եւ Կառլոս Մեսայի միջեւ, որը ժամանակին զբաղեցրել է Բոլիվիայի նախագահի պաշտոնը:

Կամարտահայտման առաջին արդյունքները հրապարակվել էին ընտրական տեղամասերը փակվելուց մի քանի ժամ հետո: Սակայն դրանից հետո ձայների հաշվարկն ընդհատվել էր, որից զգուշացել էին առաջին հերթին Բոլիվիայի ընդդիմությունը, ինչպես նաեւ Արգենտինայի, Բրազիլիայի, ԱՄՆ եւ Ամերիկան պետությունների կազմակերպության ղեկավարությունները: Բազմաժամյա ընդմիջումից հետո ընտրական հանձնաժողովը վերականգնել էր քվեարկության արդյունքների հրապարակումը: 100 տոկոս քվեաթերթերի մշակման արդյունքներով՝ ընտրություններում հաղթել էր Մորալեսը՝ ստանալով ձայների 47,08 տոկոսը, իսկ Մեսան՝ 36,51 տոկոսը:

Ընտրությունների արդյունքներից դժգոհ ընդդիմության կողմնակիցները բողոքի ցույցեր էին սկսել, որոնք վերածվել էին անկարգությունների: Սրա հետ կապված Էվո Մորալեսը հայտարարել էր արտակարգ դրության ռեժիմ եւ ընդդիմությանը մեղադրել պետական հեղաշրջում կազմակերպելու փորձի մեջ: Նոյեմբերի 10-ին չդադարող ցույցերի ֆոնին պետության առաջնորդը հայտարարել էր նոր նախագահական ընտրություններ անցկացնելու մասին:

Կադրային ինչպիսի՞ վերադասավորումներ են հաջորդել

Չնայած Էվո Մորալեսի հավաստիացումներին, որ հրաժարական չի ներկայացի ընդդիմության եւ ցուցարարների ճնշմամբ, նա նոյեմբերի 10-ին հայտարարել էր նախագահական լիազորությունները վայր դնելու մասին: Նրան այս որոշման կոչ էին արել նաեւ Բոլիվիայի Զինված ուժերի հրամանատար Ուիլյամս Ռոներոն եւ Աշխատողների բոլիվիական պրոֆմիությունը՝ ենթադրելով, որ դա «ժողովրդին կհանդարտեցնի»:

Մորալեսի աղմկահարույց հայտարարությունից մի քանի ժամ հետո երկրում ընթացող բողոքի ցույցերի առաջնորդ Լուիս Ֆերնանդո Կամաչոն հայտարարել է, որ ոստիկանությունը քաղաքական գործչին ձերբակալելու օրդեր է ստացել: Սակայն ոստիկանոթյունից հայտնել են, որ այդպիսի օրդեր չեն ստացել:

Բոլիվիայի նախագահի թեկնածու Կառլոս Մեսան Մորալեսի հրաժարականն անվանել է «բռնապետության վերջը»:

Պետության ղեկավարից հետո իր հրաժարականի մասին է հայտարարել Բոլիվիայի փոխնախագահ Ալվարո Լիներան եւ Սենատի խոսնակ Ադրիանա Սալվատյերան:

Սենատի երկրորդ փոխխոսնակ Ժանին Անյեսեն՝ «Դեմոկրատական միասնություն» ընդդիմադիր կուսակցությունից ասել է, որ իր վրա կվերցնի նախագահի պարտականությունների կատարումը:

Դեռեւս մինչեւ Մորալեսը որոշել էին իրենց լիազորությունները վայր դնել Բոլիվիայի լեռնահանքային եւ մետաղագործական արդյունաբերության նախարար Սեսար Նավարոն եւ ածխաջրածինների ու էներգետիկայի նախարար Ալբերտո Սանչեսը: Բոլիվիայի բազմազգ օրենսդիր ասամբլեայի Պատգամավորների պալատի նախագահ Վիկտոր Բորդան նույնպես որոշել է իր պաշտոնից հեռանալ:

Իր պաշտոնը թողնելու մասին է հայտարարել նաեւ Բարձրագույն ընտրական դատարանի նախագահ Մարիա Էուխենիա Չոկեն: Pagina Siete լրագիրը հայտնել է, որ նա հետագայում ձերբակալվել է:

Բոլիվիայի Ընտրական հանձնաժողովի փոխնախագահ Անտոնիո Կոստասը հրաժարական է տվել նախագահական ընտրություններից գրեթե անմիջապես հետո: