Ի՞նչ մթերքներ պետք է լինեն սննդաբաժնում 50-ից հետո

50-ից բարձր տարիքի մարդկանց սննդաբաժինը, շատ փորձագետների կարծիքով, պետք է պարունակի մթերքներ եւ սննդարար նյութեր, որոնք անհրաժեշտ են ոսկրերի եւ ուղեղի առողջությունը պահպանելու համար։ Մասնավորապես, սննդաբաժնում խորհուրդ է տրվում ներառել.

Կալցիում

Տարիքի հետ ոսկրերի ամրությունը սկսում է նվազել, եւ մարդիկ ավելի հաճախ են բախվում ընկնելու եւ կոտրվածքների հետ։ 50-ից հետո գրեթե յուրաքանչյուր երրորդ կին ունենում է ոսկրերի կոտրվածք ընկնելու կամ անգամ ոչ մեծ վնասվածքների հետեւանքով։ Ոսկրերի առողջությունը պահպանելու համար սննդաբաժնում անհրաժեշտ է ներառել կալցիումով հարուստ մթերքներ, ինչպիսին են կաթնամթերքները եւ կաթնաթթվային մթերքները (այդ թվում պանիրն ու կաթնաշոռը), մուգ կանաչատերեւ բանջարեղենները, լոբին եւ ոսպը, ընկույզները, չորացրած թուզը։

Վիտամին D

Վիտամին D-ն նույնպես անհրաժեշտ է ոսկրերի ամրությունը պահպանելու համար, բացի այդ, հետազոտությունները ցույց են տալիս, որ այդ վիտամինի ցածր մակարդակ ունեցող մեծահասակները հանկարծակի մահանալու ռիսկին ավելի շատ են ենթարկված։

Վիտամին D-ի աղբյուր են համարվում ձուն (դեղնուցը), սնկերը, կարագը, պանիրը, կաթնաշոռը, ծովամթերքները եւ ձկան յուղը։

Օմեգա-3 ճարպաթթուներ

Այս նյութերը շատ կարեւոր են առողջության համար, դրանք պահպանում են տեսողությունը եւ ուղեղը, բարելավում մազերի եւ մաշկի վիճակը, օգտակար են արյան շրջանառության եւ սիրտ-անոթային ու օնկոլոգիական հիվանդությունների կանխարգելման համար։ Ավելին, կարծիք կա, որ դրանք կանխում են դեպրեսիան եւ նվազեցնում բորբոքման մակարդակն օրգանիզմում։

Պրոբիոտիկներ

Պրոբիոտիկներն օգնում են ամրացնել իմունային համակարգը, նվազեցնել «վատ» խոլեստերինի մակարդակը, դրանք նաեւ պաշտպանում են լնդերի հիվանդություններից, ինչպես նաեւ ավելորդ քաշ հավաքելուց, որն ակտուալ թեմա է դառնում 50-ից հետո։

Պրոբիոտիկների աղբյուր են կեֆիրը, հունական յոգուրտը, կիմչխին եւ թթու կաղամբը։

Մագնիում

Մագնիումով հարուստ մթերքները նպաստում են մկանների, նյարդային համակարգի առողջությանը, սրտի կայուն ռիթմին եւ առողջ իմունային համակարգին։ Շնորհիվ դրանց օգտագործման նվազում է կաթվածի ռիսկը, բարելավվում են արյան մեջ գլյուկոզայի կարգավորման մեխանիզմները, կարգավորվում է զարկերակային ճնշումը։

Մագնիումի աղբյուրներ են կանաչատերեւ բանջարեղենը, լոբազգիները, ընկույզները, սերմերը, ձավարեղենը, դդումը, բանանը, մուգ շոկոլադը։

Բջջանյութ

Սննդաբաժնում բջջանյութի բավարար քանակությունը պաշտպանում է աղիքային միկրոֆլորայի առողջությունը եւ կանխարգելում ավելորդ քաշի եւ ճարպակալման առաջացումը։

Բջջանյութի աղբյուրներ են մրգերը, բանջարեղենները, լոբին, ոսպը, ընկույզները, ձավարեղենը, թեփը։