Թեժ իրավիճակ պատրիարքի ընտրությունների շուրջ

Շաբաթներ առաջ գրել էինք, որ Պոլսո պատրիարքի ընտրությունները նախատեսվում է իրականացնել այս տարվա դեկտեմբերի 11-ին։ Սակայն մինչ այդ հետաքրքիր զարգացում է նկատվում։ Թուրքիայի ներքին գործերի նախարարությունը ներկայացրել է պատրարքի ընտրությունների անցկացման կանոնագիրը, ըստ որի՝ ընտրություններին կարող են մասնակցել միայն այն եպիսկոպոսները, որոնք ներկայացնում են Ստամբուլի միաբանությունը։ Ըստ այդմ՝ ընտրությունը մնում է Արամ Աթեշյանի կամ Սահակ Մաշալյանի միջև։

Համայնքը այս կանոնագիրն անընդունելի է համարում, ուստի պոլսահայ համայնքի մի շարք անդամներից կազմված Հանրային նախաձեռնությունը դիմել է դատարան.«Այս կանոնագրով ընտրություն անելը ոմանց համար շատ անընդունելի էր թվում, հիմա դատարան են դիմել, որպեսզի ընդհատվի այս ընտրությունը և նոր կանոնադրությամբ օրինական ընտրություն լինի։ Այսինքն՝ արտասահմանի եպիսկոպոսները ևս կարողանան մասնակցել։ Դրա համար են դիմել դատարան, տեսնենք, թե մինչև ընտրության օրը դատարանը որևէ որոշում կկարողանա՞ կայացնել, թե ոչ։ Եթե դատարանը չհասցնի որոշում կայացնել մինչև այդ օրը, ապա ընտրությունները տեղի կունենան եղած երկու թեկնածուների միջև»,- «Առաջին լրատվական»-ի հետ զրույցում ասաց Ստամբուլի «Ակոս» թերթի հայկական բաժնի խմբագիր Բագրատ էստուկյանը։

Հարցին, թե ինչպիսին են ակնկալիքները, Էստուկյանն ասաց. «Ակնկալիք չկա, բարի սպասում կա, որ դատարանը մինչև այդ որոշում կկայացնի և կհատատ, որ այո, սխալ է տեղի ունեցել, որը հակասում է կրոնների ազատությանը, հետևաբար հնարավորություն կստեղծվի նոր կանոնագրով ընտրություն տեղի ունենա։ Սպասվելիք ամենաբարին սա է, բայց թե սա իրականություն կդառնա, թե ոչ, հիմա դժվար է կանխատեսել»։

Նա հավելեց, որ բոլորն էլ ընդունում են, որ այսօրվա կանոնադրությունը խնդրահարույց է. «Նույնիսկ այս կանոնադրության հետ համակերպվողները նույնպես ընդունում են, որ սխալ է տեղի ունեցել, որոշ հայ շրջանակների կողմից կամայական որոշում է կայացվել։ Որոշ հայ շրջանակներ կան, որոնք թելադրեցին, որ այսպես լինի, որ կանխեն Սեպուհ եպիսկոպոս Սուլջյանի թեկնածության առաջադրումը»,-հավելեց Էստուկյանը։

Նա նշեց, որ եթե դատարանը չհասցնի մինչև ընտրություններ որոշում կայացնել, հնարավոր է համայնքը բոյկոտի ընտրությունները։