Եթե Վազգեն Մանուկյանը մուտք է գործում քաղաքականություն, ապա պետք է հեռանա Հանրային խորհրդից. 1in.am
Հանրային խորհրդի անդամների ցուցակին ծանոթանալիս սյուրռեալիստական պատկեր է հառնում։ Նույնիսկ մտածում ես, թե այդքան տարբեր կենսագրություն ունեցող մարդկանց ինչպես է հաջողվել մեկտեղել այդ կառույցում։ Հանրային խորհրդի անդամ են և՛ «Հանուն մարդկային կայուն զարգացման» ասոցիացիայի նախագահ Կարինե Դանիելյանը, և՛ գեներալ-մայոր, Արցախի հերոս Արկադի Տեր-Թադևոսյանը՝ Կոմանդոսը, և՛ Հայաստանի առաջադիմական միացյալ կոմունիստական կուսակցության հիմնադիր Վազգեն Սաֆարյանը, և՛ «Ինտեգրացիա և զարգացում» ՀԿ նախագահ Արամ Սաֆարյանը և՛ այլ անձինք։ Այդ ցանկում կարող ենք հանդիպել բարերար, «Փյունիկ» բարեգործական հիմնադրամի նախագահ Գաբրիել Ջեմբերջյանին, կոմունիստական անցյալով հայտնի, լենինյան փառահեղ ուղի անցած, այժմ Հայաստանի պետական մանկավարժական համալսարանի դասախոս Աիդա Թոփուզյանին, կրթության և գիտության նախկին նախարար Էդուարդ Ղազարյանին, «Միկա» ֆուտբոլային ակումբի նախագահ, գեներալ-մայոր, 1990-91թթ․ ՀՀ ներքին գործերի նախարար Կառլոս Ղազարյանին, «Կարին» ազգագրական երգի-պարի խմբի հիմնադիր Գագիկ Գինոսյանին, կրթության փորձագետ, ԱԺ նախկին պատգամավոր Անահիտ Բախշյանին, 1999-2018թթ․ միգրացիոն ծառայության ղեկավար Գագիկ Եգանյանին, քաղաքագետ, Միջազգային և անվտանգության հայկական կենտրոնի ղեկավար Ստեփան Սաֆարյանին, ԱԺ նախկին պատգամավոր Արշակ Սադոյանին։
Թեև ՀՀ Սահմանադրությամբ ամրագրված են Հանրային խորհրդի լիազորությունները, սակայն ժամանակ առ ժամանակ հանրային շրջանակներում արծարծվում է նրա նպատակահարմարության հարցը։ ՀԽ նախագահ Վազգեն Մանուկյանին ամիսներ առաջ ՀՀ վարչապետ Նիկոլ Փաշինյանը հանրությանը ներկայացրեց որպես զոհ, քանի որ նա, ըստ ոչ պաշտոնական տվյալների, հաղթել էր 1996թ․ ՀՀ նախագահի ընտրություններում, բայց չէր դարձել նախագահ։ Դա չխանգարեց, սակայն, որ Մանուկյանը դառնա «ընդդիմություն», հանդես գա սահմանադրական կարգի տապալման համար անազատության մեջ գտնվող Ռոբերտ Քոչարյանի պաշտպանությամբ՝ մոռանալով, որ նրա իշխանության տարիներին ինքն ընդդիմադիր էր և 2003թ․ ՀՀ նախագահի ընդդիմության թեկնածու Ստեփան Դեմիրճյանի գլխավորած «Արդարություն» դաշինքի ցուցակով հայտնվել էր Ազգային ժողովում։ Հիմա Վազգեն Մանուկյանը մոռացել է այդ ամենը, մոռացել է, թե ինչպես էր պայքարում Ռոբերտ Քոչարյանի ռեժիմի դեմ, հիմնել է «Վերնատուն» անունով ակումբ, որն առաջիկա շաբաթվա ընթացքում պետք է հավաք հրավիրի և քննարկի Հայաստանի առջև ծառացած մարտահրավերները։
Այս ընթացքում քննարկվում է նաև Վազգեն Մանուկյանին՝ Հանրային խորհրդի նախագահի պաշտոնից հեռացնելու հարցը, ինչի համար էլ ԱԺ անկախ պատգամավոր Արման Բաբաջանյանը դիմել էր ՀՀ վարչապետ Նիկոլ Փաշինյանին։ Վազգեն Մանուկյանը, սակայն, անհողդողդ է, ասում է՝ վարչապետը կհանդիպի իր հետ, կասի, որ չի ցանկանում իր հետ աշխատել, նոր ինքը կգնա։
«Հանուն մարդկային կայուն զարգացման» ասոցիացիայի ՀԿ նախագահ, Հանրային խորհրդի անդամ Կարինե Դանիելյանը կարծում է, որ Հանրային խորհրդի դերը հանրության կարծիքն ուսումնասիրելն է, ամփոփելը, տարբեր մասնագետների, անկախ փորձագետների հետ քննարկելն ու կառավարություն ներկայացնելը։
«Անպայման չէ, որ այդ կարծիքները համընկնեն կառավարության տեսակետների հետ։ Օրինակ՝ նախորդ Հանրային խորհրդում մի անգամ այնպես ստացվեց, որ Սերժ Սարգսյանի հետ հանդիպում էր, ես նրա հետ մտա դահլիճ, Վազգեն Մանուկյանը տեսավ, կատակով ասաց՝ Ձեզ որտե՞ղ նստեցնեմ, որ չտեսնեք, չբարկանաք։ Ես ամեն անգամ խնդիրներ էի արծարծում, որոնք կարող էին դուր չգալ։ Այնպես չէ, որ Հանրային խորհուրդը պետք է կառավարության կարծիքը հասցնի ժողովրդին։ Այո՛, դա էլ պետք է լինի, եթե մենք համաձայն ենք կառավարության որոշումների հետ։ Բայց դա երկկողմանի պրոցես է, եթե կան դիտողություններ, առաջարկություններ։ Ես չէի ասի, թե հիմա ՀԽ-ում ճգնաժամ է»,- արձագանքեց Կարինե Դանիելյանը՝ ի պատասխան մեր այն հարցի, թե ինչու չի հանգուցալուծվում ՀԽ-ում ստեղծված ճգնաժամը, և ինչպե՞ս պետք է այն լուծվի։
Հարցին, թե «Վերնատուն» ակումբի հիմնադիր, քաղաքական գործունեությամբ զբաղվելու հայտ ներկայացրած Վազգեն Մանուկյանն ինչո՞ւ չի թողնում Հանրային խորհրդի նախագահի պաշտոնը, Կարինե Դանիելյանն արձագանքեց․ «Ճիշտն ասած՝ ես այդ «Վերնատանը» չեմ եղել, չգիտեմ, թե ինչ ընթացքի մեջ է։ Խնդիրն այն է, որ օրենքով առնվազն Հանրային խորհրդի նախագահը մեկ տարի կարող է գործել, հետո՝ հրաժարական տալ։ Դա իր որոշումն է՝ տեղափոխվո՞ւմ է քաղաքականություն, թե՞ մնում է ՀԽ-ում, բայց ես չեմ տեսնում, որ ինքը քաղաքականություն մուտք գործելու հայտ է ներկայացրել։ Եթե այդպես է, ապա ինքը պետք է հեռանա Հանրային խորհրդից։ Վազգեն Մանուկյանը գիտակ է, փորձառու, ճանապարհ է անցել»։
Նկատեցինք, որ «Վերնատուն» ակումբը նոյեմբերի 15-ին նախատեսում է հրավիրել համաժողով։
«Թող նոյեմբերի 15-ն անցնի, կտեսնենք, թե ինչ են անում, որն է նրա հայտը»,- ասաց Կարինե Դանիելյանը։
Կառավարման փորձագետ, Հանրային խորհրդի անդամ Հարություն Մեսրոբյանը նշեց, որ ՀԽ-ում իրավիճակը նորմալ է, ՀԽ-ից դուրս է աննորմալ իրավիճակը։
«Դուք տեղյա՞կ եք, թե ինչ ակումբ է «Վերնատունը»։ «Վերնատունը» կուսակցությո՞ւն է, կուսակցություն չէ, մարդիկ հավաքվել են՝ քննարկելու երկրի խնդիրները։
Ընդհանրապես 1in.am-ը պարբերաբար այդ խնդիրը բարձրացնում է, ես հարգում եմ Ձեր լրատվամիջոցը, բայց խնդիրը չեմ հասկանում»,- ասաց Հարություն Մեսրոբյանը։
Արկադի Տեր-Թադևոսյանը «Առաջին լրատվական»-ի հետ զրույցում նշեց, որ ինքը չի պատկերացնում իր դերը Հանրային խորհրդում, այդ իսկ պատճառով էլ ապրիլից չի գնում այնտեղ։
«Ես ուզում եմ մի բանով օգտակար լինել, օգնել, մի տեղ, եթե իմ դերը չեմ տեսնում՝ չեմ գնում։ Իմ այնտեղ լինելը ոչ մեկին պետք չէ»,- ասաց նա։
Միգրացիոն ծառայության նախկին պետ, Հանրային խորհրդի անդամ Գագիկ Եգանյանը նշեց, որ Վազգեն Մանուկյանի հրաժարականի հետ կապված հենց Մանուկյանն ինքն է սպառիչ պատասխան տվել։
Ինչ վերաբերում է Հանրային խորհրդի՝ որպես կառույցի նպատակահարմարության հարցին, ապա Գագիկ Եգանյանը խորհուրդ է տալիս այդ հարցերը քննարկել՝ դուրս գալով իրավական նիհիլիզմից։
«Սահմանադրության մեջ ամեն ինչ հստակ գրված է, ամեն հոդված գրելիս բազմաթիվ քննարկումներ, թեր և դեմ կարծիքներ են եղել, չէ՞։ Հիմա չեմ հասկանում, թե ինչն են քննարկում։ Իսկ ով հետաքրքրվում է, թող մտնի Հանրային խորհրդի կայքէջ, որտեղ կա մանրամասն տեղեկատվություն նրա կանոնադրության, գործունեության մասին։ Իսկ այդ հարցադրումը, թե իբր ոչինչ չեն անում, կարող են ուղղել նաև այլ մարմինների»,- ասաց Գագիկ Եգանյանը։
Նյութի աղբյուրը՝ 1in.am