Երկրորդ նախագահ Ռոբերտ Քոչարյանի պաշտպանությունը կանի հնարավոր ամեն ինչ՝ ազատության նրա իրավունքը վերականգնելու եւ կալանքը չեղարկելու համար. փաստաբան

Երկրորդ նախագահ Ռոբերտ Քոչարյանի պաշտպանությունը կանի հնարավոր ամեն ինչ՝ ազատության նրա իրավունքը վերականգնելու եւ կալանքը չեղարկելու համար: Այս մասին նոյեմբերի 8-ին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի փաստաբան Արամ Օրբելյանը:

Մեկնաբանելով նախօրեին իր գործընկերոջ հայտնած կարծիքն այն մասին, թե փաստաբանները պատրաստ են վիճաբանությունների փուլի անցնել, փաստաբանը հաստատեց կարծիքը: «Մենք հաճույքով կսկսենք վիճաբանությունների փուլը: Սակայն որոշ մարդիկ սխալ են հասկանում իրավիճակը: Ռոբերտ Քոչարյանը պետք է ազատության մեջ լինի, եւ հենց այդ ժամանակ մենք վիճաբանությունների փուլ կսկսենք: Քոչարյանի կալանքն անօրինական է, եւ մենք կձեռնարկենք օրինական բոլոր գործողություններն իրավիճակը շտկելու համար: Գործընթացը ձգձգում է դատախազությունը»,- հայտարարեց Օրբելյանը:

Փաստաբանի խոսքով՝ պաշտպանական կողմը համաձայն չէ, որ գործը կարող է գտնվել վարույթում: «Որպես այդպիսին նման գործ չկա: Մեղադրական եզրակացության մեջ նկարագրվածը չի կարող մեղադրանքի համար հիմք դառնալ: Հրամանն ու հավաքը մեղադրանքի համար հիմք չեն հանդիսանում: Դրանցում հանցանքի տարրեր չկան: Քոչարյանին այլ գործողություններ չեն մեղսագրվում»,- հայտարարեց փաստաբանը՝ հավելելով, որ Քոչարյանին չի մեղսագրվում կրակելու հրամանը, ընտրությունների արդյունքների կեղծումը, հանրահավաքի ցրումը: «Միայն արտակարգ դրության սահմանման եւ հավաք անցկացնելու հրամանը: Դրանցից ոչ մեկը հանցանք չէ»,- հիշեցրեց փաստաբանը՝ հավելելով, որ դատարանում ընդդիմախոսները հաճախ դա մոռանում են, հիշում են 2003-ի եւ այլ տարիների իրադարձություններ, այլ անձանց: «Սա հանրային լսումներ կամ խորհրդարանական լսումներ չեն, սա դատական գործընթաց է: Մենք ինքներս ցանկանում ենք, որպեսզի գործընթացը սկսվի: Սակայն դա չի նշանակում, որ մենք թույլ կտանք անտեսել Ռոբերտ Քոչարյանի իրավունքները»,- վստահեցրեց Օրբելյանը:

Նա հիշեցրեց, որ գործով անցնում է ավելի քան 800 վկա: «Եթե շաբաթական 3-4 վկայի լսենք, գործընթացը կտեւի մոտ 5 տարի»,- հաշվարկեց փաստաբանը՝ նկատելով, որ վկաների մեծ մասը կրկնում է այն, ինչ պաշտպանական կողմը երբեք չի հերքել:

Փաստաբանը հիշեցրեց նաեւ, որ Քոչարյանը 5 ամիս գտնվել է ազատության մեջ, եւ նրա կողմից ճնշման որեւէ փաստ չկա: «Եթե այդ ժամանակ նա ոչինչ չի արել, ասել, թե այժմ կանի, չի տեղավորվում տրամաբանության մեջ: Անձի դեմոնիզացիա է տեղի ունենում»,- նշեց Արամ Օրբելյանը:

Միեւնույն ժամանակ նա հիշեցրեց, որ դատարանը եւս հաստատել է դատից խուսափելու բացակայությունն ու ճնշման հավանականության նվազեցումը: «Եվրոպական պրակտիկայի համաձայն՝ գրավը չի կարող կիրառվել միայն այն դեպքում, եթե դատարանն ապացուցել է ճնշման մեծ հավանականությունը: «Ենթադրելը» ապացույց չէ: Կան դեպքեր, երբ ավելի ծանր հանցանքներ գործած անձինք գրավի դիմաց ազատ են արձակվում: Եվ այժմ կոռուպցիայի գործով անցնող անձն ազատության մեջ է: Նույնիսկ զբաղեցնում են նույն պաշտոնը, իհարկե, կասեցված լիազորություններով: Ես չեմ ասում, որ նրանք պետք է ձերբակալվեն: Ես ասում եմ, որ Ռոբերտ Քոչարյանը պետք է ազատ արձակվի»,- հավելեց փաստաբանը:

Արամ Օրբելյանը  շեշտեց, որ Հայաստանի երկրորդ նախագահ Ռոբերտ Քոչարյանի գործով 9 բողոք է հանձնվել ՄԻԵԴ:

Նրա խոսքով՝ 5-6-ը գրանցված են, բայց առայժմ չեն գտնվում հաղորդակցման փուլում։ Եվս մեկ պրոցես կապված է ՍԴ դիմելու հետ։ Ազգային գործընթացի մասնակիցներին ժամանակ է տրվել մինչեւ նոյեմբերի 19-ը, որպեսզի դիրքորոշում ներկայացնեն։ Մինչեւ նոյեմբերի 12-ը բոլոր շահագրգիռ կողմերը պետք է կարծիք ներկայացնեն։ «Սպասում ենք, որ որոշումը կլինի մինչեւ ընթացիկ տարվա վերջ, հաջորդ տարվա սկիզբ»,- նշել է Արամ Օրբելյանը։

Այս առնչությամբ նա ընդգծել է, որ ՄԻԵԴ որոշումը անհրաժեշտ է կատարել։ «Հակառակ դեպքում Հայաստանը կհայտնվի մոնիթորինգի տակ։ Հույս ունեմ, որ բանը դրան չի հասնի, եւ որոշումները կկատարվեն առանց հարկադրման միջոցների»,- ավելացրել է փաստաբանը։

Ինչ վերաբերում է Ռոբերտ Քոչարյանի տեսակցությունների սահմանափակումներին, դրանք հիմնավորված չեն, կարծում է Օրբելյանը:

Նրա խոսքով՝ դատավոր Դավիթ Գրիգորյանը, որոշում կայացնելով կալանքը հանելու մասին, միաժամանակ չեղարկել էր տեսակցությունների սահմանափակման որոշումը։ Հետագայում ընդունվեց Քոչարյանին կալանավորելու որոշում, բայց տեսակցությունների սահմանափակման որոշում չկայացվեց։ «Բայց ՔԿՀ-ում տեխնիկապես սահմանափակման որոշում է հայտնվել։ Մենք դիմել ենք օմբուդսմենին եւ դատարան՝ խնդրելով հաստատել սահմանափակումների բացակայությունը։ Խնդրել ենք հաստատել, որ նման սահմանափակումներ չկան, որպեսզի հանձնվեն ՔԿՀ»,- նշել է Օրբելյանը՝ ընդգծելով սահմանափակումների անիրավաչափությունը։

Հիշեցնենք, որ Ռոբերտ Քոչարյանին արգելված են տեսակցությունները որդու՝ Սեդրակ Քոչարյանի հետ։

Լուրեր Հայաստանից - NEWS.am