Բրիտանական խորհրդարանի Համայնքների պալատի նոր խոսնակ է ընտրվել Լինդսեյ Հոյլը

Լեյբորիստ Լինդսեյ Հոյլն ընտրվել է բրիտանական խորհրդարանի Համայնքների պալատի խոսնակ: Այս մասին են վկայում երկուշաբթի թագավորության խորհրդարանի ստորին պալատի անդամների գաղտնի քվեարկության արդյունքները, փոխանցում է ՏԱՍՍ-ը:

2010 թվականից խոսնակի ավագ տեղակալի պաշտոնը զբաղեցրած 62-ամյա Հոյլի օգտին 4-րդ փուլում իրենց ձայնն են տվել 325 պատգամավորներ: Նրա ընդդիմախոս՝ նույնպես լեյբորիստ Քրիս Բրայանտի թեկնածությունն աջակցել են 213 պատգամավորներ:

Նոր խոսնակը կփոխարինի Ջոն Բորքոուին, որն այս պաշտոնին է 10 տարի եւ հոկտեմբերի 31-ին սեփական ցանկությամբ հրաժարական է ներկայացրել: Նա այդ օրը, երբ Մեծ Բրիտանիան պետք է ԵՄ-ից դուրս գար, նախօրոք էր որոշել եւ չի փոխել, չնայած Brexit-ի վերջնաժամկետը տեղափոխվել է 2020 թվականի հունվարի 31: Հիմա խոսնակի թեկնածությունը պետք է հաստատեն Լորդերի պալատը եւ Եղիսաբեթ II թագուհին, սակայն այս ընթացակարգերը ձեւական են:

Նոր խոսնակի մասին

Հոյլը, որը հունիսին դարձավ 62 տարեկան, առաջին անգամ Համայնքների պալատ է ընտրվել 1997 թվականին՝ Անգլիայի հյուսիս-արեւմուտքում գտնվող իր հայրենի Լանքանշիր կոմսության Չորլի ընտրական տարածքից: Մինչեւ դա 14 տարի կամ 5 ժամկետ անընդմեջ (1980-1997 թվականներ) նա եղել է Չորլիի քաղաքային խորհրդի անդամ՝ զուգահեռ զբաղվելով տեքստիլ բիզնեսով եւ տպագրական գործով:

Պատգամավորի պաշտոնում նրա ամենաաղմկահարույց նախաձեռնություններից են եղել նոր մանկական հիվանդանոցը լեդի Դիանայի անունով կոչելու կամ «Հիթրոու» օդանավակայանը ի պատիվ նրա անվանափոխելու առաջարկները: Նա այս առաջարկներով է հանդես եկել 1997 թվականին Փարիզում արքայադուստր Դիանայի ավտովթարի հետեւանքով զոհվելուց հետո: Այս նախաձեռնություններից ոչ մեկը աջակցություն չի ստացել: 2018 թվականին նա բրիտանական հանրությանը ծառայելու համար ասպետի կոչում է ստացել:

Իր ընտրության նախօրեին The Sunday Times-ի հետ հարցազրույցում Հոյլը հայտնել էր, որ մտադիր է պայքարել հանուն այն բանի, որ Համայնքների պալատի նիստերի ժամանակ մթնոլորտը, որը սաստիկ շիկացել էր Brexit-ի երկար ամիսների քննարկումների պատճառով, ավելի բարյացակամ դառնա:

Այս կապակցությամբ պարբերականը հիշեցնում է, որ 650 պատգամավորներից 40-ը հրաժարվել են իրենց թեկնածությունն առաջադրել դեկտեմբերի 12-ին նշանակված արտահերթ խորհրդարանական ընտրություններում: Նրանցից շատերը ստացած վիրավորանքներն են համարել այդպիսի որոշման գլխավոր պատճառը:

Խոսնակի դերը

Ընտրվելուց հետո Լոյբորիստական կուսակցությանը Հոյլի անդամակցությունը պետք է կասեցվի, քանի որ, ըստ գործող կանոնների, Համայնքների պալատի խոսնակը պետք է անկողմնակալ մարդ լինի եւ իրավունք չունի նախապատվություն տալ որեւիցե առանձին կուսակցության: Խոսնակը նաեւ չի մասնակցում քվեարկություններին եւ դա կարող է անել միայն մեկ դեպքում՝ եթե պատգամավորների ձայները հավասար կիսվել են:

Միեւնույն ժամանակ, հենց խոսնակն է ընտրում, թե այս կամ բիլի հարցում ինչ լրացումներ կարող են թույլատրվել, իսկ ինչ լրացումներ՝ ոչ։ Երբեմն դա կարող է ազդեցություն գործել օրինագծի քննարկման ընթացքի վրա, որովհետեւ, ինչպես ցույց է տալիս Brexit-ի վերաբերյալ վերջին քվեարկությունների փորձը, ընդամենը մեկ լրացում կարող է լիովին փոխել օրենքի նախագծի էությունը։

Բրիտանական լրատվամիջոցների տեղեկատվությամբ՝ Պահպանողական կուսակցության կառավարությունում կուտակվել են բազմաթիվ դժգոհություններ նախկին նախագահ Ջոն Բերքուոի հանդեպ, առաջին հերթին բանավեճեր վարելու նրա կոշտ ձեւի եւ այն պատճառով, որ նա ինչ-որ մի պահի փոխեց ընթացակարգը՝ ընդդիմությանը թույլ տալով կարճ ժամանակով վերահսկողություն սահմանել օրակարգի վրա։ Շատերն են նրան հիշեցնում, թե ինչպես թույլ չտվեց այս տարի այն ժամանակվա վարչապետ Թերեզա Մեյին (2016-2019) նորից քվեարկության դնել Brexit-ի համաձայնագիրը՝ ասելով, որ այն ոչ մի բանով չի տարբերվում պատգամավորների արդեն մերժածից։

Times թերթը տեղեկացրել է, որ Բերքոուի գործողություններից վրդովմունքը կառավարությունում այնքան մեծ էր, որ նա կարող էր դառնալ 230 տարվա մեջ առաջին խոսնակը, որին վարչապետը միապետին խորհուրդ չի տա մտցնել Լորդերի պալատի կազմ։

Հատկանշական է, որ ինքը՝ Հոյլը, երբեք իր դիրքորոշումը չի հայտնել Brexit-ի վերաբերյալ։