Ոչ մի պատճառ չկա, որ Հայաստանն այդ բեռն իր վրա վերցնի. փաստաբանը՝ Գրիշա Հակոբյանի կալանքի մասին

Արևշատ համայնքի բնակիչ Գրիշա Հակոբյանի արտահանձնումը Գերմանիայից երկար ժամանակ տեղի չէր ունենում այն պատճառով, որ գերմանական իշխանությունները համապատասխան բուժման եւ հսկողության վերաբերյալ Հայաստանի Հանրապետությունից երաշխիքներ են պահանջել, եւ նա երկարատեւ բուժման կուրս է անցել Գերմանիայում։ Այս մասին NEWS.am- հետ զրույցում ասաց Գրիշա Հակոբյանի պաշտպան Երվանդ Վարոսյանը։

Նշենք, որ 2016թ. ծանր մարմնական վնասվածքներ հասցնելու համար մեղադրվող Գրիշա Հակոբյանի նկատմամբ կալանքը խափանման միջոց ընտրելու դատարանի որոշման դեմ Արևշատի բնակիչներն այսօր՝ նոյեմբերի 4–ին, բողոքի ակցիա են իրականացրել մարզի դատախազության շենքի առջև։

«2019 թվականի հունվարին Գրիշա Հակոբյանը Գերմանիայից գրավոր դիմել է ՀՀ գլխավոր դատախազին՝ իր նկատմամբ հետախուզումը վերացնելու խնդրանքով։ Վերացնելու խնդրանքն էլ նրա համար էր, որ ինքը կարողանա ինքնուրույն, անարգել սահմանները հատել ու վերադառնալ Հայաստան, քանի որ հակառակ պարագայում դա ուղղակի անհնար էր։ Սակայն դա էլ չի ապահովվել եւ նա, ի վերջո, հանձնվել է Հայաստանին։ Հիմա խնդիրն այն է, որ թեեւ մենք համոզված ենք, որ, մասնավորապես, ծանր մարմնական վնասվածք հասցնելու մասով մեղադրանքը չի հաստատվելու եւ վարույթ իրականացնող մարմինն ինքն է պարզելու, որ Գրիշա Հակոբյանը կոնկրետ այդ մարմնական վնասվածքները հասցնելու հետ ոչ մի առնչություն չունի, այսօր դա այդքան կարեւոր չէ, կարեւորն այն է, որ նրան անազատության մեջ պահելու ոչ մի արդարացում չկա ու, բնականաբար, ճիշտ կլիներ, որ նրա նկատմամբ ընտրվեր անազատության հետ չկապված խափանման միջոց, ու նախաքննական մարմինն էլ իր քննությունը շարունակեր»,– ասաց Վարոսյանը։

Փաստաբանի խոսքով՝ Հակոբյանը հիմա էլ ունի առողջական լուրջ խնդիրներ, մի քանի անգամ ձերբակալվածների պահման վայր է հրավիրվել շտապ օնգություն. «Իմ տեղեկություններով նաեւ «Արմավիր» ՔԿՀ-ում նա ունի առողջական խնդիրներ, հիմա քննարկվում է նրան դատապարտյալներ հիվանդանոց տեղափոխելու հարցը»։

«Ոչ մի պատճառ կամ հիմք չկա, որ Հայաստանը այդ բեռն իր վրա վերցնի եւ տրամաբանական կլինի, որ նրա նկատմամբ խափանման այլ միջոց ընտրվի։ Ես լիահույս եմ, որ վարույթ իրականացնող մարմինն ու հսկողություն իրականացնող դատախազությունն այդ հարցին լուծում կտա։ Այդ գործով շատ մարդիկ շատ ցուցմունքներ են տվել, բայց իրականությունն այն է, որ կոնկրետ տուժողի առողջությանը ծանր վնաս պատճառելու հետ Գրիշա Հակոբյանը ոչ մի առնչություն չունի։ Այս ժամանակահատվածում որեւէ պատճառ չկա, որ նա կալանքի տակ մնա։ Կալանքի որոշումը բողոքարկելու ենք Վերաքննիչ դատարան»,– ասաց Վարոսյանը։