Ռուսաստանի «ՄԻՍիՍ» ազգային հետազոտական տեխնոլոգիական համալսարանի գիտնականները եվրոպացիա եւ ամերիկացի գործընկերների հետ համատեղ նոր նյութ են մշակել բժշկական իմպլանտների համար
Ռուսաստանի «ՄԻՍիՍ» ազգային հետազոտական տեխնոլոգիական համալսարանի գիտնականները եվրոպացիա եւ ամերիկացի գործընկերների հետ համատեղ նոր նյութ են մշակել բժշկական իմպլանտների համար, որոնք հեշտացնում են կոտրվածքներից հետո վերականգնումը:
«Ռոսիյսկայա գազետա»-ի հաղորդմամբ՝ նոր նյութի մեջ օգտագործվում են պլատինի եւ երկաթի նանոմասնիկներ, որոնց շնորհիվ արհեստական ոսկորը կարող է ոչնչացնել մինչեւ 98 տոկոս վնասակար մանրէներ: Իսկ դա նշանակում է, որ նման իմպլանտների օգտագործման դեպքում վիրահատությունից հետո վարակի զարգացման ռիսկը զգալիորեն նվազում է:
Ըստ վիճակագրության՝ իմպլանտի տեղադրումից հետո 1-4 տոկոս դեպքերում բակտերիալ վարակ է առաջանում: Իսկ բարդ կոտրվածքի դեպքում վարակի զարգացման ռիսկը մեծանում է մինչեւ 30 տոկոս: Ավանդաբար վարակի դեմ պայքարի համար հակաբիոտիկներ են կիրառվում: Սակայն միշտ կան ռիսկեր, որ վարակը կարող է կայուն լինել հակաբիոտիկի նկատմամբ կամ կարող է ալերգիկ ռեակցիա առաջանալ: Որոշ դեպքերում վարակի պատճառով կրկնակի վիրահատություն է պահանջվում:
Նանոմասնիկներով նոր նյութը 8-12 ժամվա ընթացքում ոչնչացնում է իրեն շրջապատող վնասակար մանրէների 98 տոկոսը: Այն կարող է պայքարել ստաֆիլոկոկկի, աղիքային ցուպիկի, Klebsiella թոքաբորբի դեմ: Կարեւոր է, որ այդ դեպքում լիմֆոցիտներն ու իմունային համակարգը չեն տուժում:
Մոտ ժամանակներս գիտնականները մտադիր են կենդանիների վրա փորձարկել նոր իմպլանտները: