Կանայք թվարկել են կյանքի չգրված ամենակարևոր սկզբունքները
Reddit-ի օգտատերերը պատմել են գլխավոր չգրված կանոնների մասին, որոնց պետք է հետեւեն երկրագնդի բոլոր կանայք։ Նրանք դրանք միավորել են «Աղջկական վարքականոն» ընդհանուր անվան տակ։ Սկզբունքների մեծ մասը վերաբերում է կանացի համերաշխությանը, տեղեկացնում է Lenta-ն։
Շատ բաժանորդներ հայտարարել են, որ անհրաժեշտ է եւ ճիշտ է ցանկացած աղջկա տեղեկացնել այն մասին, որ նրա արտաքին տեսքի մեջ ինչ-որ բան այնպես չէ. օրինակ՝ շրթներկը քսվել է ատամներին, դեմքին լղոզվել է դիմահարդարումը կամ փեշը պատահաբար մնացել է զուգագուլպայի մեջ։ Առանձին նշվել է, որ դա միշտ պետք է անել զգույշ ու հանգիստ։ «Եթե նրա տաբատի վրա կարմիր հետք կա, դուք նրան ասում եք այդ մասին զգուշաբար եւ անհապաղ»,- գրել է TheRedMaiden-ը։
Մի կանոն վերաբերել է բռնությունից պաշտպանությանն օգնելուն։ Օգտատերերից մեկը գրել է, որ երբ փոքր է եղել, կորել է հսկայական խանութում, եւ նրան հետապնդել է անհայտ մեծահասակ մի տղամարդ։ Նա մոտեցել է մի ընտանիքի՝ մայր եւ մի քանի երեխաներ, եւ կինն արագ կողմնորոշվելով՝ ձեւացրել է, թե աղջկա մայրն է։ Կինը նրան մենակ չի թողել, մինչեւ որ իսկական մայրը գտել է աղջկան։
Շատ աղջիկներ նշել են, որ կարեւոր է նաեւ հոգալ նրանց մասին, որոնց համառորեն եւ կոպտորեն կպչում են բարերում, եւ օգնել նրանց փախչել հարբած անծանոթներից։ Նրանք խորհուրդ են տալիս ձեւացնել, որ փորձանքի մեջ հայտնված աղջիկն իրենց ծանոթն է, եւ նրան ներքաշել խոսակցութան մեջ։ Ոմանք նշել են, որ հետեւում են այլ աղջիկների ըմպելիքներին, որպեսզի դրանց մեջ որեւէ վտանգավոր բան չլցնեն։
Օգտատերերի մեծամասնությունը համակարծիք է, որ կանանց համար չափազանց կարեւոր է փոխօգնությունը: «Եթե որեւէ մեկը հիգիենիկ պարագա է խնդրում, տուր: Կարեւոր չէ, թե ով է խնդրողը, նույնիսկ եթե նա քեզ դուր չի գալիս: Եթե ունես, տուր»,- հայտարարել է AMarmaladeSandwich-ը: Մեկ ուրիշ օգտատեր հստակեցրել է, որ այս կանոնը վերաբերում է նաեւ մազակալին. այն պետք է տալ, եթե անգամ գիտես, որ զրուցակցիդ այլեւս երբեք չես հանդիպի: Օգտատերերն ավելի ուշ այս ցուցակի մեջ են ներառել նաեւ ցավազրկող հաբերը:
Կանոնների լրացուցիչ հավաքածուն վերաբերում էր անձնական հարաբերություններին: «Եթե ընկերուհիդ վերադառնում է իր նողկալի նախկինի մոտ, դու մշտապես նրան կաջակցես, բայց նաեւ նրան կասես ճշմարտությունը եւ կհայտնես, եթե նրանց հարաբերությունները թունավոր են»,- հիշեցրել է DayumItsMe-ն: Ոմանք անգամ հիշեցրել են չգրված կանոնի մասին՝ ինտիմ հարաբերություններ չհաստատել իրենց ընկերուհիների եւ ծանոթների նախկինների հետ: