«Բա դուք ոնց եք մեր երեխեքին ստորացրել». Մահացած զինծառայողի մայրն ուղիղ եթերում հեռախոսով խոսել է Սեյրան Օհանյանի հետ (Տեսանյութ)
Հարգելի ծնողներ, աղերսում եմ ձեզ, հասկանում եմ ձեզ, ձեր էմոցիաները, բայց եթե դուք էդպես դնում եք տուպիկ, շշեր, ջջեր, արդյունքում մյուս կողմն էլ ասում է, որ չի կարող այս պայմաններում աշխատել եւ պատրաստվում է գնալ: Այս մասին, այսօր՝ հոկտեմբերի 31-ին, ԱԺ Մարդու իրավունքների պաշտպանության և հանրային հարցերի մշտական հանձնաժողովում հայտարարեց հանձնաժողովի նախագահ Նաիրա Զոհրաբյանը այն բանից հետո, երբ սեւազգեստ մայրերից մեկը շշով ջուրը նետեց քննիչներից մեկի ուղղությամբ:
Նշենք, որ Հանձնաժողովում նիստ էր հրավիրված, որպեսզի քննարկվեին տարբեր տարիներին սահմանապահ դիրքերում զոհված զինվորների մայրերի պահանջները, ներկա էին Քննչական կոմիտեի, այլ իրավապահ մարմինների ներկայացուցիչներ:
Քննչական կոմիտեի հատուկ հանձնարարություններով գլխավոր վարչության պետ Արթուր Մելիքյանն առաջարկեց հիմա նիստն ընդհատել, հետո շարունակել, քանի որ այս պայմաններում շարունակել հնարավոր չէ: «Ես ուրախ չեմ, քննիչներին բերեմ, դուք վիրավորեք, ստորացնեք, ջուրը լցնեք իրենց վրա: Թող ձեր մոտ տպավորություն չստեղծվի, որ մենք հակառակ կողմերում ենք»,-ասաց նա:
«Բա դուք ոնց եք մեր երեխեքին ստորացրել ու սպանել: Դրանք պետք է ցմահ նստեն, էնքան արյուն են խմել»,-արձագանքեց ծնողներից մեկը:
Այդ պահին սեւազգեստ մայրերից Իրինա Ղազարյանը զանգեց պաշտպանության նախկին նախարար Սեյրան Օհանյանին եւ բարձրախոսը միացրած խոսեց հետը: Կինը վիրավորված էր, որ իրեն ասել են, որ որդուն սեւ բերետի են արժանացել «մոր խնդրանքով, ադալժենի անելով»:
Ի վերջո նիստն ընդհատվեց, քանի որ նման մթնոլորտում շարունակվել չէր կարող: