Կրթությանը հատկացված միջոցները պետք է բավական լինեն կարիքների բավարարման համար. ֆիննախ
Խորհրդային տնտեսությունը փոքր-ինչ տարբերվում էր Հայաստանի ներկա տնտեսական մոդելից եւ, բացի այդ, հայկական գիտական միտքը աշխատել է ոչ միայն Հայաստանի, այլեւ ամբողջ Խորհրդային Միության՝ իր բազմաթիվ հանրապետություններով, կարիքների բավարարման համար։ Այս մասին խորհրդարանական մշտական հանձնաժողովների համատեղ նիստում, 2020 թվականի պետբյուջեի նախագծի քննարկման ժամանակ, հոկտեմբերի 31-ին ասաց Հայաստանի ֆինանսների նախարար Ատոմ Ջանջուղազյանը՝ պատասխանելով պատգամավորների հարցերին, թե արդյոք կառավարության հատկացրած միջոցները կբավարարեն Հայաստանում 2020 թվականին գիտական եւ կրթական հեղափոխության իրականացմանը։
Մասնավորապես, «Բարգավաճ Հայաստան» կուսակցության պատգամավոր Միքայել Մելքումյանը որոշեց զուգահեռ անցկացնել կրթության խորհրդային եւ ժամանակակից համակարգերի միջեւ, ինչը Հայաստանի ֆինանսների նախարարը անտեղի համարեց մի շարք պատճառներով։ «Ես չեմ փորձում արդարանալ, բայց մենք հիմա էլ կարող ենք քննարկել այս ոլորտում աշխատանքի հնարավորությունը, ասենք, համաշխարհային շուկայի կարիքների բավարարման համար»,- ասաց Ջանջուղազյանը՝ ավելացնելով, որ այդ ոլորտում, հաշվի առնելով առկա բոլոր հնարավորությունները, ինչպես նաեւ կարիքներն ու պահանջները, կառավարության հատկացրած միջոցները պետք է միանգամայն բավարար լինեն։
Հիշեցնենք, որ կրթության ոլորտին բաժին է ընկնում կրթության, գիտության, մշակույթի եւ սպորտի նախարարությանը 2020 թվականին հատկացված միջոցների առյուծի բաժինը՝ 145 մլրդ դրամից մի փոքր ավելի, բայց իշխանությունները որոշել են կրճատել մշակույթի ոլորտի ֆինանսավորումը։