Երևանում բացվել է ScaleUp ինովացիոն ֆորումը

Երեւանում մեկնարկել է ScaleUp ինովացիոն ֆորումի աշխատանքը, որը կազմակերպվել է Ամերիաբանկի կողմից՝ Amazon Web services – AWS-ի հետ համագործակցության շրջանակում։

Ֆորումի հիմնական նպատակը հաջող փորձը ներկայացնելն է եւ ինովացիոն տեխնոլոգիաների ներդրման առավել արդյունավետ մեխանիզմների քննարկումը։ Ներկայացնելով նորարարական տեխնոլոգիաների ներդրման AWS-ի փորձը՝ ընկերության տարածքային կառավարիչ Վերանիկա Ռամանովսկայան նշել է, որ արդի աշխարհում ընկերության հաջողության համար անհրաժեշտ է շուկայի եւ հաճախորդների պահանջմունքների մշտական ուսումնասիրություն։ Այս առնչությամբ ընկերությունները ստիպված են ընդունել օպերատիվ որոշումներ ստացվող տեղեկության հսկայական ծավալի հիման վրա։ Նա տեղեկացրել է, որ AWS-ում ամեն բան անում են այդ գործընթացը կրճատելու համար՝ այդ նպատակով օգտագործելով արհեստական բանականությունը։ Ընկերությունը նաեւ նորարարություններն օգտագործում է նաեւ հաճախորդների ձեռք բերած ապրանքների մատակարարումն ապահովելու համար, մասնավորապես՝ գործընթացին միացնելով դրոնները։ Բացի այդ, AWS-ն օգտագործում է նորարարական տեխնոլոգիաները բազմաթիվ միկրոծառայություններ մատուցելու համար՝ հարկի, մատակարարման արժեքի ավտոմատ հաշվում եւ այլն։ «Այդ միկրոծառայությունները հազարավոր են, եւ դրանք բոլորն էլ տրամադրվում են մեկ հպմամբ»,- ասել է նա՝ ընդգծելով, որ հաճախորդները գնահատում են ոչ միայն ապրանքների մատչելի գները, այլեւ ոչ քիչ չափով՝ օպերատիվությունը։

Անդրադառնալով հարցին, թե ինչպես ապահովել նորարարությունների ներդրման արդյունավետությունը, Ռամանովսկայան ընդգծել է, որ կարեւոր է ապահովել հակադարձ կապը հաճախորդների հետ։ Նորարարությունները մտցնելիս անհրաժեշտ է կազմակերպել մամուլի ասուլիսներ՝ դրանց ներդրման ժամկետները եւ առավելությունները ներկայացնելով, ինչպես նաեւ պատասխանելով ԶԼՄ-ների հարցերին, որոնք կարող են ծագել հաճախորդներից շատերի մոտ։ Անհրաժեշտ է նաեւ հետեւել հաճախորդների հաճախ տրվող հարցերին, ինչը թույլ կտա իրապես գնահատել նրանց կողմից նորարարության ընկալման աստիճանը եւ արդյունավետության մակարդակը։ «Դա ոչ թե օպցիոն, այլ պարտադիր պրոցես է»,- նշել է Ռամանովսկայան։

Պակաս կարեւոր չէ նաեւ նորարարությունների ներդրման մեխանիզմների եւ ճարտարապետության ընկալումը, ասել է նա՝ կոչ անելով չվախենալ սխալներից եւ անհաջողություններից, քանի որ հենց դրանք են դնում ապագայում հաջողության հասնելու հիմքերը։

Middleware ընկերության մարքեթինգի գծով տնօրեն Սերգեյ Դանիլենկոն, իր հերթին, նշել է նորարարությունների ներդրման գործընթացի տեւականության ապահովման անհրաժեշտությունը: Նրա խոսքով՝ բիզնեսի թվայնացման գործընթացը պետք է շարունակական լինի: Նա ընդգծել է, որ կան բազմաթիվ ընկերություններ, որոնք միլիոններ են ծախսում նորարարական տեխնոլոգիաների ներդրման համար, ընդ որում, ավելի ու ավելի շատ միջոցներ են ծախսվում նորարարությունների հսկողության ապահովման համար: Նման ծավալների ներդրումների հետ մեկտեղ՝ մի շարք դեպքերում ծրագրերը հաջող չեն լինում: Դանիլենկոն վստահ է, որ անհաջողություններից խուսափելու համար անհրաժեշտ է հաշվի առնել նորարարությունների ներդրման մի շարք ասպեկտներ: Առաջին հերթին, նորարարությունները պետք է լինեն ամբողջ թիմի, այլ ոչ թե մեկ մասնագետի գործունեության մի մասը: Նա նաեւ նշել է «փորձի մշակույթ» ձեւավորելու կարեւորությունը՝ հաճախորդների հետ հետադարձ կապ ապահովելու եւ նրանց պահանջներն ու ակնկալիքները հասկանալու համար: Հենց հետադարձը կապը թույլ կտա ճիշտ գնահատել բոլոր ռիսկերը: Նա նաեւ կարեւորել է մի քանի տարբերակների ապահովումը՝ դրանցից մեկի ընտրության նպատակով, ինչպես նաեւ ամբողջ թիմի աշխատանքի համակարգված աշխատանքը:

SoftProm ընկերության նորարարությունների գծով տնօրեն Վլադիսլավ Գավրիլենկոն ներկայացրել է AWS ստանդարտացված ճարտարապետության օգտագործման փորձը՝ PCI DSS վճարային քարտի տվյալների անվտանգության ստանդարտին համապատասխանեցնելու համար: Նա հիշեցրել է, որ PCI DSS-ը ստանդարտ է, որը ընկերություններին օգնում է պահպանել անվտանգ միջավայրը վարկային քարտերի մասին տեղեկատվության պահպանման, մշակման եւ փոխանցման համար: Գավրիլենկոն խոստովանել է, որ ստանդարտի ներդրումը բարդ գործընթաց է, որը կարող է մի քանի ամիս տեւել: Նա վստահ է, որ առաջարկված AWS ստանդարտացված համակարգը թույլ կտա ավտոմատացնել գործընթացը 70 տոկոսով: Այդ շաբլոնները, որոնք ուղղված են ճարտարապետական լուծումների անվտանգությանը, օգնում են կառավարվող ծառայությունների (MSP) պրովայդերներին, ամպային ծառայությունների խմբերին, մշակողներին, ինտեգրատորներին եւ այլոց ապահովելու անվտանգության բարձր մակարդակը: Գավրիլենկոն նշել է, որ դա չի նշանակում, թե ամբողջ աշխատանքը կկատարվի: «Սակայն դա լավ շաբլոն է նրանց համար, ովքեր դա անում են բազմաթիվ ծառայությունների համար: Այն թույլ է տալիս մոտւքագրել պարամետրերն ու դրանք օգտագործել մի քանի անգամ»,- ասել է Գավրիլենկոն: