ԵՄ–ի աջակցությամբ Գորիսի և Ստեփանավանի գյուղատնտեսական քոլեջներում կփորձարկվեն աշխատանքի վրա հիմնված ուսուցման մոդելը

Մենք աշխատաշուկան զարգացնելու խնդիր ունենք, աշխատաշուկայի պահանջները բավարարելու խնդիր ունենք։ Այս մասին այսօր՝ հոկտեմբերի 29–ին, Եվրամիության եւ «Ռազմավարական Զարգացման գործակալություն» ՀԿ–ի համատեղ ծրագրի մեկնարկի միջոցառման ժամանակ ասաց ՀՀ Կրթության, գիտության, մշակույթի եւ սպորտի նախարար Արայիկ Հարությունյանը։

Միջոցառմանը ներկա էին նաեւ ԵՄ պատվիրակության ղեկավար, ՀՀ–ում ԵՄ արտակարգ եւ լիազոր դեսպան Անդրեա Վիկտորինը, պատական եւ հասարակական գործիչներ։ Ծրագրի նպատակն է մշակել այնպիսի աշխատանքի վրա հիմնված ուսուցման նորարարական մոդել, որը կնպաստի երիտասարդների զբաղվածության խթանմանը եւ կնվազեցնի մասնագիտական հմտությունների եւ աշխատաշուկայի պահանջարկի միջեւ եղած անհամապատասխանությանը, ինչպես նաեւ կխթանի համագործակցությունը մասնագիտական կրթություն եւ ուսուցում հաստատությունների եւ մասնավոր հատվածի միջեւ։

Արայիկ Հարությունյանի խոսքով՝ այսօր աշխատաշուկան որոշակի դեֆորմացիաների է ենթարկվել, բայց դրական միտում նկատվում է. «Հետաքրքրությունը ոլորտի նկատմամբ վերջին տարիներին մեծանում է եւ գոնե այս տարի անձամբ նկատել եմ, որքան մեծ է տեղերի պահանջը, որը մենք հատկացնում ենք միջին մասնագիտական ուսումնական հաստատություներում եւ աշխատանքներ ենք տանում, որպեսզի հետաքրքրության հետ զուգահեռ նաեւ որակին ուշադրություն դարձնենք»։

Մասնագետների խոսքով՝ ծրագիրը կամրապնդի համագործակցությունը ՄԿՈՒ հաստատությունների եւ մասնավոր հատվածի միջեւ՝ Գորիսի եւ Ստեփանավանի գյուղատնտեսական քոլեջներում փորձարկելով աշխատանքի վրա հիմնված ուսուցման մոդելը գյուղատնտեսական երկու մասնագիտություններում՝ անանաբուժություն ու կաթի եւ կաթնամթերքի տեխնոլոգիա։