Մեծ Բրիտանիայում մահացել է գրող և այլախոհ Վլադիմիր Բուկովսկին
Բրիտանական Քեմբրիջ քաղաքի հիվանդանոցում 76 տարեկանում սրտի կանգի հետեւանքով մահացել է խորհրդային այլախոհ եւ գրող Վլադիմիր Բուկովսկին: Դա տեղի է ունեցել այսօր Երեւանի ժամանակով մոտ 01:46-ին: Այս մասին հայտնում է նրա կայքը, փոխանցում է «Նովայա գազետան»:
Հայտնի լրագրողի որդի Բուկովսկին ծնվել է 1942 թվականին Բաշկիրիայում, որտեղ նրա ընտանիքին տարհանել էին, եւ Մոսկվա վերադառնալով՝ դարձել է 1960 թվականին Մայակովսկու հուշարձանի մոտ անցկացվող ժողովների կազմակերպիչներից մեկը: Բազմիցս ենթարկվել է հարկադիր բուժման (Միլովան Ջիլասի արգելված «Նոր դասակարգը» պահելու եւ գրողներ Սինյավսկու ու Դանիելյայի գործի դեմ հանրահավաք նախապատրաստելու համար):
Նրան առաջին անգամ բանտարկության են դատապարտել 1967 թվականին՝ նույնպես հանրահավաք կազմակերպելու համար: Ազատվելուց հետո 3 տարի անց նա պատմել է այն մասին, թե Խորհրդային Միությունում ինչպես են այլախոհներին փակում հոգեբուժարաններում, եւ շուտով կրկին դատապարտվել է՝ 2 տարվա բանտարկության ու 5 տարվա ազատազրկման խիստ ռեժիմի ճամբարում, սակայն պատիժը մինչեւ վերջ չի կրել՝ 1976 թվականին Չիլիի կոմկուսի գլխավոր քարտուղար Լուիս Կորվալանի հետ փոխանակվելու շնորհիվ:
Նա Արեւմուտքում մի քանի գիրք է գրել խորհրդային ռեժիմի մասին՝ «Եվ քամին վերադառնում է», «Ռուս ճանապարհորդի նամակները», «Պացիֆիստներն ընդդեմ խաղաղության», ինչպես նաեւ «Մոսկովյան դատավարությունը», որի հիմքն են դարձել փակ արխիվները՝ նա դրանց հասանելիություն էր ստացել որպես ԽՄԿԿ-ի դեմ պատրաստվող դատավարության մասնակից:
2007 թվականին դեմոկրատական ընդդիմությունը նրան առաջադրել էր Ռուսաստանի նախագահի թեկնածու, սակայն Կենտրոնական ընտրական հանձնաժողովը նրան չի գրանցել: Մեկ տարի հետո նա նույնպես մտել է «Համերաշխություն» շարժման քաղխորհրդի մեջ: