Անկախ նրանից թե 37-րդ, 47-րդ կամ որևէ տեղում ենք, դա նշանակում է, որ ֆինանսական վիճակը Հայաստանի Հանրապետությունում ռիսկեր չի պարունակում. Բոստանջյան
Դա էական նշանակություն չունի, 200 երկրների շարքում 37-րդը կամ 47-րդը էական նշանակություն չի կարող ունենալ ՀՀ-ի համար: Այս մասին NEWS.am-ի հետ զրույցում ասաց տնտեսագետ, նախկին պատգամավոր Վարդան Բոստանջյանը` անդրադառնալով Համաշխարհային բանկի Doing Business-2020 զեկույցում Հայաստանի դիրքին:
«Անկախ նրանից թե 37-րդ, 47-րդ կամ որեւէ տեղ, դա նշանակում է, որ ֆինանսական վիճակը Հայաստանի Հանրապետությունում ռիսկեր չի պարունակում: Ըստ էության՝ դա նշանակում է՝ ֆինանսական կայունության կտրվածքով մեր մոտ գոյություն ունի տանելի վիճակ, եթե չասենք հրաշք վիճակ, բայց գոնե էդ վիճակն այնպիսին է, որ ֆինանսական ճգնաժամի, կամ ֆինանսական խոշոր վայրիվերումների հեռանկար չի երեւում»,- ասաց նա:
Տնտեսագետի կարծիքով` Հայաստանի Հանրապետությունում դեռեւս ֆինանսական համակարգը հիմնականում պայմանավորված է միայն բանկային համակարգով, որտեղ ֆինանսական ակտիվների գրեթե 85 տոկոսը գտնվում է բանկում, դա արդեն նշանակում է, որ միակողմանի զարգացում ունի այս պահին մեր երկրի ֆինանսական շուկան:
Նրա խոսքով, ամեն դեպքում գոյություն ունեցող բանկային համակարգը կարողանում է պահպանել ֆինանսական կայունությունը ՀՀ-ում:
Իսկ Համաշխարհային բանկն էլ, Բոստանջյանի խոսքով, որոշակի մեթոդաբանությամբ է ներկայացնում այս զեկույցը, որը կարող է իրականության հետ այդքան էլ չհամապատասխանի:
«Ֆինանսական միջազգային կազմակերպությունները ըստ էության որոշակի մեթոդաբանությամբ են իրենք ներկայացնում ընդհանրապես երկրների ֆինանսական եւ տնտեսական ցուցանիշները, որոնք շատ դեպքում իրականության հետ էդքան մեծ աղերս չունեն: Էդ առումով էլ պայմանավորված, կարող է պատահի` Ջավադյանը հենց դա է ի նկատի ունեցել, որովհետեւ նրանք ընդհանրական ցուցանիշները հավաքում են, որոշակի ցուցանիշները, որոնք բնորոշ են ասենք առանձին երկրների, կարող են իրենց մեթոդաբանությամբ հաշվի չառնել, ինչի հետ կապված կարող է նման վրիպակ լինել»,-հավելեց նա:
Հիշեցնենք, որ Կառավարության նիստին վարչապետ Նիկոլ Փաշինյանը Էկոնոմիկայի նախարարությունից պարզաբանում էր պահանջել, թե ինչու է Doing Business-2020 զեկույցում Հայաստանը հետընթաց ապրել: Ծավալված քննարկման վերջում ԿԲ նախագահ Արթուր Ջավադյանը հայտարարել էր, թե պարզապես տեխնիկական սխալ է եղել, որը շտկվելու դեպքում Հայաստանը կլինի 37–րդ տեղում։
«Ամերիկայի ձայն»-ի հետ զրույցում Համաշխարհային բանկի մասնավոր ոլորտի զարգացման ավագ մասնագետ Վալենտինա Սայնթայնն էլ ասել է, որ Համաշխարհային բանկի Doing Business 2020 զեկույցը որեւէ անճշտություն չի պարունակում: