Հայաստանցի 5 ամենթանկ ֆուտբոլիստները

րանսֆերային շուկան ուսումնասիրող հեղինակավոր պարբերականների վարկածով՝ ֆուտբոլի Հայաստանի ազգային հավաքականն այս պահին գնահատված է մոտ 37 միլիոն եվրո: Այդ 37 միլիոն եվրոն ներառում է ազգային թիմի թեկնածու 25 ֆուտբոլիստների տրանսֆերային արժեքները: Նշենք, որ անցյալ տարի հավաքականի ընդհանուր արժեքը մոտ 47 միլիոն եվրո էր:

Ֆուտբոլի Հայաստանի ազգային հավաքականի ավագ, իտալական «Ռոմայի» կիսապաշտպան Հենրիխ Մխիթարյանի տրանսֆերային արժեքը որոշակիորեն նվազել է՝ կազմում է 25 միլիոն եվրո: Փաստորեն, արժեքային տեսանկյունից Մխիթարյանի տրանսֆերը կազմում է Հայաստանի հավաքականի 70 տոկոսը: Հենրիխ Մխիթարյանը շարունակում է հանդիսանալ հայաստանցի ամենաթանկ ֆուտբոլիստը:

Երկրորդ հորիզոնականում է գերմանական «Հոֆենհայմի» հարձակվող Սարգիս Ադամյանը: Վերջինիս տրանսֆերային արժեքը գնահատվում է 3 միլիոն եվրո: Լավագույն եռյակը եզրափակում է ղազախական «Կայսարի» հարձակվող Տիգրան Բարսեղյանը: Նրա տրանսֆերային արժեքը մեկ միլիոն եվրո է:

Ի դեպ, Մխիթարյանից, Ադամյանից և Բարսեղյանից բացի՝ այսօր չունենք ֆուտբոլիստներ, որոնց տրանսֆերային արժեքը մեկ միլիոն է և ավելի: Հայաստանցի ամենաթանկ ֆուտբոլիստների հնգյակում տեղ է գտել Եկատերինբուրգի «Ուրալի» պաշտպան Վարազդատ Հարոյանը, ում տրանսֆերը գնահատված է 900 հազար եվրո: Հնգյակը եզրափակում է ղազախական «Ժետիսուի» կիսապաշտպան Կամո Հովհաննիսյանը: Վերջինիս տրանսֆերային արժեքը 850 հազար եվրո է:

Ազգային թիմի մյուս ֆուտբոլիստների համեմատ բարձր արժեք ունի մեկ այլ պաշտպան՝ Անդրե Չալըշըրը, որը ելույթ է ունենում շվեդական «Գյոթեբուրգում»: Վերջինիս տրանսֆերը գնահատված է 800 հազար եվրո: Հայաստանի հավաքականի վետերան Մարկոս Պիզելիի տրանսֆերային արժեքն այս պահին կազմում է կես միլիոն եվրո: Նույնքան է նաև մեր առաջատար ֆուտբոլիստներից Գևորգ Ղազարյանի տրանսֆերային արժեքը: Դանիական «Հոբրո» թիմում հանդես եկող կիսապաշտպան Էդգար Բաբայանի տրանսֆերը 450 հազար եվրո է գնահատված: 400 հազար եվրո է գնահատված «Սոչիի» հարձակվող Ալեքսանդր Կարապետյանի, ինչպես նաև կիպրական «Էնոնիսի» պաշտպան Հովհաննես Համբարձումյանի տրանսֆերը:

Մեր հավաքականում հանդես եկող ֆուտբոլիստներից, որոնք ներկայացնում են հայկական ակումբները, ամենաբարձր տրանսֆերային արժեքն ունի «Արարատ-Արմենիայի» կիսապաշտպան Պետրոս Ավետիսյանը: Վերջինիս տրանսֆերը վերջին տարիների ընթացքում շարունակ աճում է և այս պահին կազմում է 400 հազար եվրո:

Տրանսֆերային արժեքի զգալի աճ է գրանցել նաև «Փյունիկի» ներկայացուցիչ Էրիկ Վարդանյանի տրանսֆերը: Եթե անցյալ տարվա սկզբին Վարդանյանի տրանսֆերը ընդամենը 125 հազար եվրո էր, ապա հիմա այն կազմում է 350 հազար եվրո: Վարդանյանն ու Ավետիսյանը Հայաստանի առաջնությունում հանդես եկող ամենահեռանկարային ֆուտբոլիստներն են: Ցանկալի է, որ նրանք հնարավորին չափ շուտ տեղափոխվեն կարգով ավելի բարձր թիմեր: Վերջերս Վարդանյանը մոտ էր Մոսկվայի «Լոկոմոտիվի» հետ պայմանագիր կնքելուն, սակայն վերջին պահին գործարքը տեղի չունեցավ: Երեկ հայտնի դարձավ, որ Վարդանյանը երկարաձգել է պայմանագիրը երևանյան թիմի հետ: Ամեն դեպքում մեծ է հավանականությունը, որ մեր հավաքականի ներկայացուցիչը «Լոկոմոտիվ» կտեղափոխվի ձմեռային տրանսֆերային պատուհանի ընթացքում: Կարծում ենք՝ դա լուրջ քայլ կլինի 21-ամյա կիսապաշտպանի համար:

Ինչևէ, մեր հավաքականի առաջատար ֆուտբոլիստներից Արաս Օզբիլիսի տրանսֆերը այս պահին ընդամենը 350 հազար եվրո է: Հիշեցնենք, որ Օզբիլիսը, խզելով պայմանագիրը թուրքական «Բեշիկթաշի» հետ, այս տարվա սեպտեմբերին միացավ Երևանի «Փյունիկին»: Տարիներ առաջ Օզբիլիսը ամենաթանկ հայ ֆուտբոլիստների շարքում էր, որի տրանսֆերը գերազանցում էր մեկ միլիոն եվրոն:

1in.am