Թուրքիան սպառնալիք է նաև Հայաստանի անվտանգությանը

«Արտաքին քաղաքական ցանկացած զարգացում, որն ուղեկցվում է ռազմական ուժի կիրառմամբ՝ շատ մտահոգիչ է, քանզի դա լրացուցիչ լարվածություն է ստեղծում տարածաշրջանում և հավելյալ բարդություններ մասնավորապես Մերձավոր Արևելքում։ Այս առումով Թուրքիայի կողմից Սիրիայում ռազմական գործողությունների իրականացումը կրկնակի մտահոգիչ է, քանի որ սիրիական ճգնաժամն ունի շուտափույթ կարգավորման չափազանց մեծ անհրաժեշտություն ու նշանակություն․ այդ ճգնաժամն ապակայունացնում է ամբողջ տարածաշրջանը, ինչն էլ իր հերթին բացասական ազդեցություն է ունենում նաև Հայաստանի վրա, քանի որ անվտանգության այն միջավայրը, որը մեզ շրջապատում է՝ անընդհատ փոփոխությունների է ենթարկվում։ Մենք, միանշանակ, կողմ ենք, որ այդ միջավայրն ունենա գոնե հարաբերական կայունություն, իսկ ստեղծված իրավիճակում դա շատ խնդրահարույց է»,- «Առաջին լրատվական»-ի հետ զրույցում շեշտեց Ազգային Ժողովի «Իմ քայլը» խմբակցության պատգամավոր, արևելագետ Գոռ Գևորգյանը՝ անդրադառնալով վերջին ժամանակահատվածում Սիրիայի շուրջ ստեղծված իրավիճակին և Թուրքիայի կողմից այնտեղ իրականացված ռազմական գործողություններին։

Գոռ Գևորգյանի խոսքերով՝ Թուրքիայի կողմից այժմ որդեգրած արտաքին քաղաքականությունը, ըստ էության, ծավալապաշտական քաղաքականություն է, որը շատ հեռուն գնացող նպատակներ է հետապնդում։

«Ինչ վերաբերում է Ռուսաստանին, ապա պաշտոնական Մոսկվան կարողացավ ապացուցել, ինչպես նաև հաստատել, որ վերջին տարիների ընթացքում ինքը Մերձավոր Արևելքում շատ կարևոր և մեծ դերակատարում ունեցող պետություն է, մանավանդ, եթե հաշվի առնենք, որ Սիրիայում ռազմական գործողությունների դադարեցման այդ համաձայնագիրը, երկխոսության այդ հարթակն ամբողջությամբ փաթեթավորվեց և ներկայացվեց աշխարհին հենց Ռուսաստանի կողմից»,-նշեց մեր զրուցակիցը։

Մանրամասները՝ տեսանյութում: