ԵԱՏՄ-ում Հայաստանի նախագահության հիմնական առաջնահերթություններից է արտաքին տնտեսական կապերի ընդլայնումը. Փաշինյան
2019-ին ԵԱՏՄ-ում Հայաստանի Հանրապետության նախագահության հիմնական առաջնահերթություններից մեկը արտաքին տնտեսական կապերի ու ազատ առեւտրի մասին պայմանագրերի աշխարհագրության ընդլայնումն է: Այս մասին Մոսկվայում Եվրասիական միջկառավարական խորհրդի նիստում իր ելույթի ընթացքում հայտարարեց ՀՀ վարչապետ Նիկոլ Փաշինյանը:
«Այդ կապակցությամբ ցանկանում եմ շնորհավորել Ձեզ ազատ առեւտրի մասին հերթական պայմանագրի կապակցությամբ: Մեծ հաճույքով ուզում եմ նշել, որ այսօր համաձայնագիր կկնքվի բարեկամական Սերբիայի հետ: Հայաստանը մտադիր է լիարժեք օգտվել բոլոր մեխանիզմներից, որոնք մեզ տրամադրում է տվյալ պայմանագիրը»,- ասաց նա:
Փաշինյանը հավելեց, որ ԵԱՏՄ միջազգային գործունեության խնդիրների եւ նպատակների իրականացման համատեքստում եւս մեկ կարեւոր իրադարձություն է ԵԱՏՄ-ի եւ Չինաստանի միջեւ առեւտրատնտեսական համագործակցության մասին համաձայնագրի ուժի մեջ մտնելը:
«Չնայած նրան, որ համաձայնագիրը չի ենթադրում մաքսատուրքերի կամ ոչ սակագնային բարիերների ավտոմատ կերպով նվազեցում, այլ ոչ արտոնյալ բնույթ է կրում, դա թույլ է տալիս բարելավել Չինաստանի շուկա ԵԱՏՄ երկրներից ապրանքների հասանելիության պայմանները՝ առեւտրային ընթացակարգերի հեշտացման ճանապարհով, տրանսպարենտության մակարդակի բարձրացումն ու առեւտրային համագործակցության բոլոր ոլորտներում փոխգործակցության մակարդակը»,- նշեց նա:
Նրա խոսքով՝ գրեթե 4 տարվա ընթացքում Եվրասիական տնտեսական հանձնաժողովի կոլեգիան իսկապես մեծ ծավալի աշխատանք է կատարել: «Զգալի արդյունքներ են գրանցվել ԵԱՏՄ ինստիտուտի ստեղծման եւ ամրապնդման առումով: Հպարտությամբ կարելի է հաստատել, որ մեր կազմակերպությունը մեծ քայլ է կատարել դեպի միջազգային ճանաչումն ու տնտեսական համակարգում իր դերի ամրապնդումը: Գոհունակությամբ նշելով ձեռքբերված արդյունքները, ուզում եմ նաեւ նշել նորմատիվ-իրավական բազայի հետագա կատարելագործումը, սահմանափակումների վերացումը, տնտեսության առանցքային ոլորտներում քաղաքականության համակարգումը, բզինեսի վրա բյուրոկրատական բեռի թեթեւացումը: Մեր առջեւ ամենատարբեր ոլորտներում համագործակցության խորացման խնդիրներ են դրված: Դրանցից մեկը ալկոհոլային արտադրանքի ընդհանուր շուկայի գործունեության համար իրավական հիմքերի ստեղծումն է, ԵԱՏՄ շրջանակում ալկոհոլային շուկայի կարգավորման մասին համաձայնագրի վերջնական համաձայնեցումը, ինչը եւս մեկ քայլ կլինի առկա բարիերները վերացնելու համար»,- նշեց ՀՀ վարչապետը:
Փաշինյանը հավելեց, որ թանկարժեք մետաղների եւ քարերի ազատ առեւտրաշրջանառության ապահովման համար պայմանների ստեղծումը եւս այդ խնդիրների շարքում է: «Կարծում եմ՝ համապատասխան միջազգային պայմանագրի ստորագրումը թույլ կտա ձեւավորել առեւտրատնտեսական փոխշահավետ մեխանիզմներ՝ ուղղված անդամ պետությունների մրցակցային առավելությունների ստեղծմանը: Պայմանագիրը թույլ կտա վերացնել առկա սահմանափակումը: Երրորդ երկրների շուկայում ԵԱՏՄ անդամ պետությունների ոսկերչական արտադրանքի առաջխաղացման ծրագրի հաստատումը, իր հերթին, կնպաստի մրցունակության բարձրացմանը, արտահանման աճին եւ հզոր ազդակ կհաղորդի մեր երկրներում ոլորտի զարգացմանը»,- հայտարարեց Փաշինյանը:
Նա նաեւ նշեց, որ 2020-ի փետրվարին ԵՏՀ կոլեգիայի նոր կադրային կազմի ձեւավորման հարցերն ավելի ակտուալ կլինեն: Փաշինյանը հավելեց, որ սա վերջին միջկառավարական խորհրդի նիստն է, որին նա մասնակցում է որպես նախագահող երկրի ղեկավար՝ Բելառուսի վարչապետ Սերգեյ Ռումասին հաջող նախագահություն մաղթելով: