Արսեն Բաբայանը քաղաքական հետապնդման չի ենթարկվում. «Իմ քայլը» (Տեսանյութ)

Ես համաձայն չեմ այն կարծիքին, թե Ազգային ժողովի աշխատակազմի ղեկավարի նախկին տեղակալ Արսեն Բաբայանը ենթարկվում է քաղաքական հետապնդման։ Այս մասին Ազգային ժողովի հոկտեմբերի 25-ի ճեպազրույցում ասաց կառավարող «Իմ քայլը» դաշինքի պատգամավոր Հովհաննես Իգիթյանը։

Նրա խոսքով՝ բոլոր գործընթացները տեղի են ունենում օրենքով թույլատրելիի շրջանակում։ «Այդ մարդուն կանչում են, ոչ թե մտնում նրա տուն, կոտրում դուռն ու առանց արտոնության ձեռքերը ոլորում եւ փողոց հանում։ Հարուցվել է գործ, եւ գործում կան որոշակի հանգամանքներ, որոնք պետք է պարզել, այդ գործի շրջանակում տրվում են համապատասխան հարցեր։ Եվ եթե դա քաղաքական հետապնդում է, ապա քաղաքակիրթ աշխարհում, ստացվում է, բոլորին հետապնդում են, որովհետեւ բոլորին հարցեր են տալիս եւ սպասում հստակ պատասխաններ»,- ասել է Իգիթյանը։

Հարցին, թե արդյոք այդ գործընթացն ուղղված չէ Սահմանադրական դատարանի նախագահ Հրայր Թովմասյանի դեմ, պատգամավորը պատասխանել է, որ այդ թեմայով ավելի լավ է չխոսել, քանի որ ինքը՝ Թովմասյանը, դեմ չէր լինի, որ հարցը քաղաքականացնեին։

Իրավապաշտպանները, սակայն, հավաստիացնում են, որ Արսեն Բաբայանին ազատությունից զրկելն անօրինական է, քանի որ նրան վերագրվող հոդվածն ընկնում է ավելի վաղ հայտարարված համաներման գործողության տակ։