Սոնա Աղեկյանը ցույց է անում Կառավարական ամառանոցի մոտ (Տեսանյութ)

Երևան քաղաքի ավագանու նախկին անդամ Սոնա Աղեկյանն այսօր՝ հոկտեմբերի 25-ին, վաղ առավոտյան, Ձորափի 74 հասցեում գտնվող կառավարական առանձնատների մոտ բողոքի ակցիա էր կազմակերպել։ Նա պահանջում էր քաղաքացիների առաջ բացել առանձնատների դռները, ինչպես բացվել են Բաղրամյան 26-ի և 19-ի դռները։

«Նիկոլ Փաշինյանի ընտանիքը հարմար չի գտնում ապրել այն առանձնատանը, որը նորոգված է և նորոգումից հետո իրենց է հատկացվել, այլ որոշել են բնակվել Սերժ Սարգսյանի առանձնատանը, որը հիմնովին ավերել են և թողնելով հիմնապատերը՝ 2 միլիոն են ծախսում, որ տեղափոխվեն այնտեղ։ Առաջարկում եմ կրթօջախ կազմակերպել այս տարածքում։ Մենք պահանջելու ենք արդեն ավելի բազմամարդ, ավելի հաճախակի ակցիաների միջոցով, որ այս 20 հեկտար հողատարածքում պետբյուջեից ոչ թե թաքուն կամ նաև հայտնի միջոցներով չմխսվեն միայն 2 ընտանիքների բարեկեցությունն ապահովելու համար։ Հիշենք, որ սրանք այն ընտանիքներն են, որ իրենց ընդդիմադիր կեցվածք ունենալու ժամանակ, ովքեր կազմում էին ցույցերի շարժիչ ուժը, նրանք իրենց կյանքում ոչ մի փոփոխություն չարձանագրեցին»,- ասաց Աղեկյանը։

Սոնա Աղեկյանի խոսքով՝ վարչապետ Նիկոլ Փաշինյանը կրճատել է 10 հազար ուսուցչի, որպեսզի այդ գումարներով նորոգի առանձնատները.

«Թոշակառուի թոշակը չենք բարձրացնում, ասում ենք՝ հնարավորություն չունենք։ Ինչպե՞ս հնարավորություն չունեք, պարոն Նիկոլ Փաշինյան, դուք կարող եք վերանորոգված տարածքի համար տարեկան մսխել այսքան գումար միայն 2 ընտանիքի վրա, բայց կենսաթոշակառուի թոշակը ավելացնելու գումար չունե՞ք»։

Աղեկյանն առաջարկեց բացել առանձնատների դռները, այդպիսով ապահովել՝ նաեւ վարչապետի անվտանգությունը.

«Դուք եք հանդիսանում մեր պետության խորհրդանիշներից մեկը, ձեր անվտանգությունը կարեւոր է, մենք սա հասկանում ենք։ Ձեր անվտանգությունն ապահովելով՝ դուք պարտավոր եք բացել այս հասցեի դարպասները՝ հասանելի դարձնելով բոլորիս համար։ Այնպես ինչպես բացել եք Բաղրամյան 26-ի եւ 19-ի դռները։ 20 հեկտարում՝ 2 ընտանիք, իրավունք չունի մսխել պետբյուջեն։ Սա մեծ ծավալի հանցագործություն է, երբ Հայաստանն ունի ահռելի պարտք, այսինքն այս պարտքը պետք է մարեն մեր չծնված թոռնե՞րը։ Անիմաստ մսխում եք այս գումարները, երբ կարելի է խնայել հենց այստեղ, ամենաճիշտ տեղում, ոչ թե խնայեք կենսաթոշակը՝ չնչին բարձրացնելով, դրա հաշվին գնել մեքենաներ»։

Նշենք, որ ակցիայի մասնակիցների ձեռքին կային՝ «Պետբյուջեից 386 միլիոն 345 հազար 800 ՀՀ դրամ՝ Նիկոլի եւ Արարատի ընտանիքների ապահովման համար», «386 միլիոն 345 հազար 800 ՀՀ դրամ՝ 2 ընտանիքի համար (առանց աշխատավարձի)» եւ «20 հեկտարում՝ 2 ընտանիք» գրառումներով պաստառներ։