ԵԺԿ նախագահ Ժոզեֆ Դոլը իր պաշտոնական թվիթերյան էջում անդրադարձել է Հայաստանում Սահմանադրական դատարանի շուրջ ստեղծված իրավիճակին. ՀՀԿ-ն է ազդե՞լ նրա կարծիքի վրա
Եվրոպական Ժողովրդական կուսակցության (ԵԺԿ) նախագահ Ժոզեֆ Դոլը իր պաշտոնական թվիթերյան էջում անդրադարձել է Հայաստանում Սահմանադրական դատարանի շուրջ ստեղծված իրավիճակին:
«Եվրոպական ժողովրդական կուսակցությունը (ԵԺԿ) մտահոգված է Հայաստանի Սահմանադրական դատարանի նախագահ Հրայր Թովմասյանի դեմ հարուցված քրեական գործով և իր հանդեպ սպառնալիքներով: Հայաստանում սահմանադրական կարգը և օրենքի գերակայությունը պետք է երաշխավորված լինեն: Հայաստանի գործող իշխանությունները պետք է հավատարիմ մնան Սահմանադրությանը, երաշխավորեն իշխանությունների հակակշռման, փոխզսպման և տարանջատման սկզբունքները: ԵԺԿ-ն հորդորում է եվրոպական և այլ միջազգային կառույցների համակ ուշադրությամբ հետևել իրավիճակին և կանխել ցանկացած զարգացումներ, որոնք կարող են խաթարել ժողովրդավարությունը Հայաստանում»,- գրել է նա։
Բացի Հանրապետական կուսակցությունից՝ ԵԺԿ անդամ է նաև «Ժառանգությունը»։ Կուսակցության փոխնախագահ Նարինե Դիլբարյանն «Առաջին լրատվական»-ի հետ զրույցում անդրադառնալով վերը նշված հայտարարությանը՝ ասաց. «Պետք է արձանագրեմ, որ, ցավոք սրտի, Դոլի տեղեկատվությունը միակողմանի է։ Քանի որ ՀՀԿ-ն ԵԺԿ անդամ է, ունի մեծ հնարավորություններ այնտեղ մշտապես ներկայացուցիչներ ունենալու, անհատական հանդիպումներ կազմակերպելու՝ ակնհայտորեն լոբբիստական աշխատանքով է զբաղվել ու Դոլին միակողմանի տեղեկատվություն տրամադրել»։
Միևնույն ժամանակ Դիլբարյանն ասաց. «Շուտով Զագրեբում տեղի կունենա համաժողով, որի ընթացքում նոր ղեկավարություն կձևավորվի, և Դոլն այլևս չի ղեկավարի ԵԺԿ-ն։ Այդ ընթացքում, կարծում եմ, մենք կկարողանանք ապահովել ԵԺԿ-ի տեղեկատվության բազմակողմ լինելը, որովհետև այդ միակողմանի տեղեկատվությունը միշտ բերում է արտաքուստ ճիշտ թվացող, բայց իրականում թյուրըմբռնումների, ինչպիսին, օրինակ, Դոլի հայտարարությունն է իշխանությունների տարանջատման ու այլ սկզբունքների մասին»։
Ըստ մեր զրուցակցի՝ ՀՀԿ-ն շարունակում է կիրառել բոլոր գործիքները թե՛ ներսում և թե՛ դրսում՝ իրականությունը ներկայացնելու որպես քաղաքական հետապնդում: ««Ժառանգությունը» փորձում է կատարել հակառակը, բայց ակնհայտ է, որ ՀՀԿ-ի մատուցած տեղեկատվությունը թե՛ անձնական և թե՛ ընկերական կապերի շնորհիվ գերակայող է դարձել։ Սա միանշանակ ՀՀԿ-ի լոբբիստական աշխատանքի արդյունքն է։ Եթե տեղեկատվությունը մատուցվում է այնպես, որ դատական հետապնդումներ են տեղի ունենում, հարցաքննության են կանչվում Հրայր Թովմասյանի ընտանիքի անդամները, բայց չի բացատրվում, թե ինչի համար, այդ միակողմանի տեղեկատվությունը բերում է նման հայտարարության, որ հարգվեն ժողովրդավարությունը, իշխանությունների տարանջատման սկզբունքը։ Այսինքն՝ ԵԺԿ-ն, հատկապես ղեկավարության առումով, ունի առավել ամբողջական տեղեկատվության կարիք։ Բայց ինչպես նշեցի՝ այնտեղ ևս փոփոխություններ են լինելու, և իրականությունը տեղ հասցնելու հնարավորությունները առավել մեծ կլինեն»,- եզրափակեց Դիլբարյանը։