Ինչու՞ են «Նուբարաշեն» ՔԿՀ–ի կալանավորները բունտ արել. ՔԿՀ պետը՝ «օրենքով գողերի» և նրանց զսպող օրենքի մասին
Քրեակատարողական ոլորտում կոռուպցիայի դեմ պայքարի ամենամեծ երաշխիքը աշխատավարձերի բարձրացումն է եւ օրենքի խստացումը։ Նման տեսակետ NEWS.am–ի հետ զրույցում հայտնեցլ էԱՆ «Նուբարաշեն» քրեակատարողական հիմնարկի պետ, արդարադատության գնդապետ Սամվել Մկրտչյանը:
Նշենք, որ երեկ՝ հոկտեմբերի 21–ին ՔԿՀ ծառայության 100-ամյակին նվիրվաված միջոցառման ժամանակ Արդարադատության նախարար Ռուստամ Բադասյանը հայտարարել էր, որ արդեն պատրաստ է նախագիծը եւ կա քաղաքական որոշում ՔԿՀ ծառայողների աշխատավարձը շուրջ 30 տոկոսով բարձրացնելու վերաբերյալ:
Անդրադառնալով սեպտեմբերի 5-ի երեկոյան առանձին ՔԿՀ-ներում, այդ թվում «Նուբարաշեն» ՔԿՀ–ում արձանագրված անհնազանդության դեպքերին, Սամվել Մկրտչյանն ասել է, որ կալանավորների դժգոհությունները պայմանավորված են եղել օրենսդրական փոփոխություններով։ «Բնականաբար այդ նախագիծը պետք է կալանավորների մոտ նման ռեակցիա պետք է առաջացներ»,–ասաց նա՝ նկատի ունենալով վերջերս շրջանառության մեջ դրված «Օրենքով գողերի» համար պատիժ նախատեսող նախագծի մասին։
Սամվել Մկրտչյանի խոսքով «Օրենքով գողերին» զսպող նախագիծը պայքարելու է քրեական ճանապարհով ապրող անձանց դեմ։
«Օրենքը պայքարելու է այն անձանց դեմ, որոնց համար հանցագործությունը արհեստ է, աշխատանք։ Օրենքը պարտադիր պետք է լինի, որպեսզի կարողանան պայքարել, դասակարգումը պարտադիր է»,–ասել է նա։
Հարցին, թե ինչպե՞ս են ապացուցելու, որ տվյալ անձը «Օրենքով գող» է, Մկրտչյանը պատասխանել է. «Ապացուցման խնդիրը պետք է լուծեն համապատասխան մարմինները, մեր ֆունկցիան նրանց պատժի կրումն ապահովելն է։ Երբ օրենքը ընդունվի, իրենք կկարողանան համապատասխան հիմնավորումներ գտնել եւ կիրառել օրենքը»։
Հարցին, արդյոք «Նուբարաշեն» ՔԿՀ–ում ներկայումս կա՞ն քրեական աստիճանակարգության բարձրագույն կարգավիճակ ունեցող անձինք, ՔԿՀ պետը բացասական պատասխան է տվել։
«Նուբարաշենի» կալանավայրի պետը բացատրել է նաեւ «օրենքով գողի» եւ քրեական հեղինակության տարբերությունը։ Նրա խոսքով՝ տարբերությունը քրեական աշխարհի դասակարգման մեջ է։
Հարցին, արդյոք ճիշտ է քրեական աշխարհում չգրված օրենքները ամրագրելը և դրանց իրավունքի ուժ տալը, Մկրտչյանը պատասխանել է. «Իրավունքի ուժ մենք տալիս ենք պայքարելու համար, որպեսզի պետությունում օրենքի գերակայություն հաստատենք»։
Խոսելով կրկնահանցագործությունների դեպքերի մասին, ՔԿՀ պաշտոնյան նշել է. «Կան հանցագործ աշխարհի կյանքով ապրող մարդիկ, որոնց համար դա ամենօրյա կյանք է, հանցագործությունների ռեցիդիվի դեմ մենք պետք է պայքարենք խստացնելով օրենքը, եթե մարդը կրկնահանցագործ է, նրա համար օրենքն ավելի խիստ պատիժ է նախատեսում»։
Հիշեցնենք, որ Արդարադատության նախարարությունը շրջանառության մեջ է դրել «ՀՀ քրեական օրենսգրքում փոփոխություններ եւ լրացումներ կատարելու մասին» եւ «ՀՀ քրեական դատավարության օրենսգրքում լրացում կատարելու մասին» ՀՀ օրենքների նախագծերի փաթեթի մասին որոշման նախագիծը, որով նախատեսվում է քրեական պատասխանատվություն սահմանել քրեական աստիճանակարգության բարձրագույն կարգավիճակ տալու կամ ստանալու կամ այն պահպանելու, քրեական ենթամշակույթ կրող խմբավորում ստեղծելու կամ ղեկավարելու, քրեական ենթամշակույթ կրող խմբավորմանը մասնակցելու կամ ներգրավելու, քրեական ենթամշակույթ կրող խմբավորման մասնակցին կամ քրեական աստիճանակարգության բարձրագույն կարգավիճակ ունեցող անձին դիմելու համար։
Ըստ նախագածի՝ քրեական աստիճանակարգության բարձրագույն կարգավիճակ ունեցող անձ է համարվելու ոչ միայն «օրենքով գողը», այլ նաեւ քրեական հեղինակությունը։ Քրեական աստիճանակարգության բարձրագույն կարգավիճակ ունենալու համար նախատեսվում է պատիժ 7-10 տարի ժամկետով։