Յուրա Իվանյանի մասով ծառայողական քննությունն ավարտվել է. զուտ իրավական առումով խախտում չկա. Հայկ Գրիգորյան

Յուրա Իվանյանի մասով ծառայողական քննությունն ընթացել է եւ դրա արդյունքներով նա որեւէ շահագրգռվածություն կամ կապ չի ունեցել Ամուլսարի հարցի հետ կապված: Այս մասին այսօր՝ հոկտեմբերի 21-ին, լրագրողների հետ զրույցում նշեց ՀՀ քննչական կոմիտեի նախագահ Հայկ Գրիգորյանը՝ անդրադառնալով Ամուլսարի հարցով հարուցված քրեական գործին:

«Անցած տարի, երբ Ամուլսարի գործը վարույթ ենք ընդունել, խնդիրն այն է, որ բնապահպանության նախարարության ՇՄԱԳ-ի-ի ՊՈԱԿ-ը իր հերթին շահագրգիռ մարմիններ է ուղարկում այս կամ այն տնտեսվարող սուբյեկտի կողմից ուղարկված ՇՄԱԳ-ի հաշվետվությունը: Այդ մարմինների կողմից դրական կամ բացասական եզրակացությունն ստանալուց հետո իրենք էլ են եզրակացություն կայացնում եւ ուղարկում նախարարին հաստատման: Անկեղծ ասած, մենք տեղյակ չենք եղել, թե բնապահպանության նախարարն ինչ ազդեցություն կարող է ունենալ ՇՄԱԳ-ի թույլտվության վրա»,-ասաց նա:

«Այո, իր նկատմամբ ծառայողական քննություն ընթացել է եւ դրա արդյունքներով նա որեւէ շահագրգռվածություն կամ կապ չի էլ ունեցել:

Քրեական դատավարության օրենսգրքի համաձայն, հստակ նշվում են, թե բարեկամական որ կապերի դեպքում է, որ անձը պետք է ինքնաբացարկ հայտնի: Իրենց ազգակցական կապի աստիճանը նշված չէ, ուստի զուտ իրավական առումով խախտում չկա:

Հանգուցալուծման խնդիր չկա, բանն այն է, որ քրեական գործը շատ դինամիկ պրոցես է եւ նույնիսկ այսօր մենք կարող ենք ստանալ այնպիսի տվյալ, որ երեկ չենք ունեցել: Դրանով է պայմանավորված նոր քննության զարգացումը եւ խորացումը»,-ասաց Հայկ Գրիգորյանը:

Ինչ վերաբերում է Յուրա Իվանյանին նոր պաշտոնի նշանակելուն, Հայկ Գրիգորյանը նշեց, որ դա այդպես չէ. «Խնդիրն այն է, որ կառավարության որոշմամբ ՔԿ-ում տեղի են ունեցել մի շարք կառուցվածքային փոփոխություններ եւ նրա պաշտոնն ուղղակի վերանվանվել է: Եթե նախկինում նա ղեկավարել է սեփականության դեմ ուղղված, կոռուպցիան հանցագործությունների, կիբերհանցագործությունների դեմ ուղղված վարչությունը, կիբերհանցագործությունների վարչությունն առանձնացվել է: Ինքը մնացել է նույն պաշտոնում, անունն է վերանվանվել»:

Հիշեցնենք, որ օգոստոսի 29-ին Infocom-ը հետաքննություն էր հրապարկել, որով ըստ կայքի՝ պարզ էր դառնում Յուրա Իվանյանի և նախկին բնապահպանության նախարար Արամայիս Գրիգորյանը ազգակցական կապը: Վերջինս 2016 թվականին հաստատել էր Ամուլսարի հանքի շահագործման դրական եզրակացությունը: Դրանից հետո ՔԿ–ում ծառայողական քննություն է նշանակվել Յուրա Իվանյանի ոչ անաչառ լինելու վերաբերյալ տեղեկությունը ստուգելու համար։

Անդրադառնալով ԱԱԾ նախկին տնօրեն Արթուր Վանեցյանի և ՀՔԾ ղեկավար Սասուն Խաչատրյանի գաղտնալսման վերաբերյալ գործին, Հայկ Գրիգորյանն ասաց, որ միշտ բոլոր գործերով կատարվել է օբյեկտիվ, բազմակողմանի և լրիվ քննություն՝ անկախ նրանից, թե որևէ մեկը պաշտոնավարում է, թե ոչ: 

Հիշեցմանը, որ նախկինում ինքն ասել է, որ պատվիրատուն հայտնի է, Հայկ Գրիգորյանն ասաց. «Ես նման բան չեմ ասել, ես ասել եմ՝ հայտնի է այն վայրը, որտեղից տարածվել է այդ խոսակցությունը, դրանք տարբեր բաներ են: Նախաքննությունն իր բնականոն հունով ընթանում է: Այո, կան մի շարք բացահայտված հանգամանքներ, բայց նախաքննության շահերից ելնելով նպատակահարմար չեմ համարում այդ մասին խոսել»:

Ինչ վերաբերում է Արթուր Վանեցյանի այն հայտարարությանը, թե բոլորին հայտնի է, թե ովքեր են պատվիրել, մնում է ապացուցել, Հայկ Գրիգորյանն ասաց. «Մենք մեր գործունեության ընթացքում երբեք այդպիսի հայտարարություն չենք արել»:

Հիշեցնենք, որ շուրջ մեկ տարի առաջ համացանցում հայտնվել էր ԱԱԾ տնօրեն Արթուր Վանեցյանի եւ Հատուկ քննչական ծառայության պետ Սասուն Խաչատրյանի հեռախոսազրույցի ձայնագրությունը:

8 րոպեանոց զրույցի ընթացքում Վանեցյանը եւ Խաչատրյանը քննարկել էին նախկին նախագահ Ռոբերտ Քոչարյանի կալանքը, ինչպես նաեւ ՀԱՊԿ գլխավոր քարտուղար Յուրի Խաչատուրովի եւ պաշտպանության նախկին նախարար Միքայել Հարությունյանի դեմ հարուցված քրեական գործերը: