Փաշինյանի մոտ կասկածներ են առաջանում շրջապատի նկատմամբ. փորձագետը՝ Գրիգորի Հայրապետովի հրաժարականի մասին
Գեներալ-լեյտենանտ Վիտալի Բալասանյանը ճիշտ դիտարկումներ արեց, թե ինչ է կատարվում Հայաստանի եւ Արցախի հարաբերություններում: Այսօր լրագրողների հետ զրույցում նման կարծիք հայտնեց տեղեկատվական անվտանգության փորձագետ Տիգրան Քոչարյանը՝ մեկնաբանելով Բալասանյանի՝ նախօրեին մամուլի ասուլիսի ժամանակ հնչեցրած հայտարարությունները:
Նրա խոսքով՝ իշխանամետ լրագրողների կողմից հրահրման փորձեր են արվել: Ազգային անվտանգության ծառայության պետական պահպանության ծառայության պետի պաշտոնից Գրիգորի Հայրապետովի հրաժարականը փորձագետը կապում է նաեւ Վիտալի Բալասանյանի մամուլի ասուլիսի հետ:
«Երեկ Բալասանյանն առաջին անգամ մեկնաբանեց «Դուշանբեի վերելակի» պատմությունը (Նիկոլ Փաշինյանի եւ Իլհամ Ալիեւի առաջին հանդիպումը-խմբ.) եւ տպավորություն ստեղծեց, որ իրեն մանրամասներ են հայտնի: Փաշինյանի մոտ կասկածներ են առաջանում շրջապատի, հատկապես իր հետ չքայլած շրջապատի նկատմամբ: Հնարավոր է, որ հրաժարականը կապ ունի Բալասանյանի հայտարարությունների հետ, հնարավոր է՝ կապ չունի, սակայն մեծ քաղաքականության մեջ համընկնումներ չեն լինում»,- նշեց Քոչարյանը:
«Բալասանյանը թեզեր և մտքեր հնչեցրեց, որոնք կան Հայաստանի եւ Արցախի հասարակությունների մի մասի մոտ, պարզապես նա ասում է այն, ինչը քննարկում են կուլուարներում կամ փորձում են դիվանագիտորեն լուծում տալ: Բալասանյանն ասաց այն, ինչը շատերը կցանկանային ասել, սակայն չեն կարողանում: Հայաստանում շատ դժվար է հակասել կամ չհամաձայնել Փաշինյանի հետ: Ցանկացած նման փորձ ցավոտ արձագանք է ստանում, հայրենասեր երիտասարդներ են հայտնվում, հարձակման փորձեր են արվում, քրեական գործեր են հարցվում, մարդիկ են հետապնդվում: Շատերը «պաս» են տալիս: Սակայն մենք Վանուատուում չենք ապրում եւ չենք կարող մեզ նման բան թույլ տալ»,- հավելեց փորձագետը:
Փորձագետը կարծիք հայտնեց, որ վերջին շրջանում Նիկոլ Փաշինյանը չնչին ուղերձներ է հղում նրանց, ովքեր իր հետ համաձայն չեն: Նա նշեց, որ, օրինակ, Երեւանում ԵՏՄ նիստին հայտնվում է վրացի լրագրողը, եւ արարողակարգն ինչ-որ ձեւով նրան թույլ է տալիս խայթոց ուղարկել Վլադիմիր Պուտինին: Կամ՝ «Վետօ» նախաձեռնությունը հանրահավաք է անցկացնում, իսկ ոստիկանները համոզում են Բաղրամյան չգնալ: Բայց հենց Պուտինի ավտոշարասյունը հայտնվում է Բաղրամյանում, հելսինկան կազմակերպությունից գրանտակերներին՝ «Ռուսաստանում, Բելառուսում եւ Ղազախստանում ազատություն քաղբանտարկյալներին» պաստառներով թույլ են տալիս այնտեղ լինել»,- նշեց Տիգրան Քոչարյանը՝ պարզաբանելով, որ Փաշինյանը չի ցանկանում կամ չի կարողանում ուղիղ ասել, փորձում է հասկացնել: