Մեզ հետաքրքիր չէ, թե տվյալ ընկերության հիմնական շահառուն ով է. Դավիթ Անանյանը՝ Սերժ Սարգսյանի թիկնազորի պետի (Սերժի Վաչոյի) շուրջ աղմուկի մասին
Մեզ բացարձակ հետաքրքիր չէ, թե տվյալ կազմակերպության հիմնադիրը կամ հիմնական շահառուն ով է. մենք նայում ենք, թե հարկ վճարողն իր վարքագծով որքանով է համահունչ հարկային օրենսդրությանը: Այս մասին, այսօր՝ հոկտեմբերի 16-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը՝ անդրադառնալով մամուլի հրապարակմանը, ըստ որի Սերժ Սարգսյանի թիկնազորի պետ Վաչագան Ղազարյանին՝ Սերժի Վաչոյին պատկանող «Սեզամգազ»-ում ստուգումների արդյունքում ակտ է կազմել, սակայն այդ ակտը արդեն ՊԵԿ գանգատարկման հանձնաժողովում «ջրվել» է։
Դավիթ Անանյանի խոսքով, այդ կազմակերպությունը երկու անգամ բողոք ներկայացնելու հնարավորություն է ունեցել. «Մեկն առնչվել է ստուգման ակտին: վերստուգիչ հանձնաժողովը որոշել է վերստուգում նշանակել եւ դա այսօր ընթացքի մեջ է: Մյուսը վերաբերել է անձնական հաշվի քարտում մեխանիկական թե տեխնիկական ինչ-որ սխալի, եւ բողոքարկման հանձնաժողովը տեսել է, որ այո, մեխանիկական սխալ կա եւ դա ուղղվել է:
Եթե մենք պետք է մեր առօրյա պրոցեսը փորփրենք, գնանք տեսնենք, թե տվյալ բաժնետերը էսինչ մարդու համագյուղացու թոռան, ծոռան էսինչն է եւ կապ փնտրենք իրական շահառուի առումով, ես կարծում եմ՝ դա կառուցողական չէ:
Մենք մեր վարքագծով կարողացել ենք ասել, որ ոչ մեկը կարեւոր չէ որպես անձ: Մենք չենք գնում շահառուին բռնում, հետո տեսնում, թե ինչ ունի: Մենք աշխատում ենք հարկ վճարողի հետ: Եթե պարզվի, որ Պողոսյան Պողոսը դրա բաժնետերն է եւ որպես բաժնետեր իր գործողություններով կամ անգործությամբ տվյակ հարկ վճարողի վարքագծին ուղղորդել է, այո, կարող է քրեաիրավական գնահատական տալու շրջանակներումնաեւ նրա վարքագիծն էլ ուսումնասիրության ենթարկվի»,-հայտարարեց ՊԵԿ նախագահը:
Ավելի վաղ հայտնել էինք, որ «Ժամանակ»-ի տեղեկություններով՝ վերջերս էլ հարկայինը Սերժ Սարգսյանի թիկնազորի պետ Վաչագան Ղազարյանին՝ Սերժի Վաչոյին պատկանող «Սեզամգազ»-ում ստուգումների արդյունքում ակտ է կազմել, սակայն այդ ակտը արդեն ՊԵԿ գանգատարկման հանձնաժողովում «ջրվել» է։
«Այսինքն՝ մի կողմից ցույց են տալիս, թե ստվերի դեմ են պայքարում, մյուս կողմից՝ չեն նեղացնում իրենց «յուրայիններին»,-գրել է թերթը: