Հայկական բրենդը՝ կոնյակը, կորցրել է որակը, արտահանվում է անորակ սպիրտով կոնյակ. «Հայաստանի ագրարագյուղացիական միավորում» ՀԿ-ի նախագահն ամփոփել է այս տարվա բերքի արդյունքները
«Հայաստանի ագրարագյուղացիական միավորում» ՀԿ-ի նախագահ Հրաչ Բերբերյանը այսօր լրագրողների ժամանակ ամփոփել է այս տարվա բերքի արդյունքները: Ըստ նրա՝ կարտոֆիլի գինը գարնանը կդառնա 400 դրամ, ցորենի ցանքատարածությունները պակասելու են, դեղձն այս տարի լավ բերք է տվել, լոլիկն էլ ցեցի պատճառով գցել է որակը:
«Կարտոֆիլը թանկանալու է, գարնանը կլինի 400 դրամ, քանի որ ցանքատարածություններն են պակասել 10-15 տոկոսով։ Գյուղացին սերմ չունի։ Մեր ֆերմերները հիմա կարտոֆիլը կուտակում են, որ գարնանն ունենանք բարձր գին։ Էսօր էլ գինն արդեն բարձր է անցյալ տարվա համեմատ։ Ցորենի ցանքատարածություններն էլ են պակասելու, չկա սերմացու։ Այսօրվա վիճակով ինչ-որ կասկածելի այծի մորոքուվ մարդիկ են հայտնվում ու ասում են՝ Հայաստանի լոլիկը վատն է։ Կարծում եմ, որ երգիչը երգով պիտի զբաղվի, երաժիշտը երաժշտությամբ, հասարակաց կինն էլ՝ իր գործով»,- ասաց Բերբերյանը եւ հավելեց, որ այս տարի դեղձի լավ բերք կար՝ մոտ 10-15 տոկոսով։
Անդրադառնալով բանջարաբուծությունը զարգացնելուն ուղղված քայլերին՝ նշեց, որ Էկոնոմիկայի նախարարությունը որեւէ քայլ չի ձեռնարկել այդ ուղղությամբ, միայն Ֆերմոնային թակարդներ է տեղադրել դաշտերում մոմազգի ցեցը կանխելու համար, որի համար ծախսել է 11 միլիոն դրամ.
«Ոչ մի քայլ չարվեց, այդպես էլ մորմազգի ցեցը մնաց դաշտերում։ Ֆերմոնային թակարդներ էին դրել, որը ստուգում է միայն ցեց կա, թե ոչ, բայց 11 միլիոն դրամ ծախսել են 10 հեկտարի վրա թակարդները տեղադրելու համար, կարելի էր 2-3 միլիոն դրամով էլ դա իրականացնել։ Չնայած նախարարությունում աշխատանք տարվել էր, որ բաց գրունտի բանաջարեղենը շատացնեն, հատկապես լոլիկը, բայց եթե կա ցեց, ապա լոլիկը վտանգված է»։
Բերբերյանը խոսեց նաեւ մսի գնի վերաբերյալ։ Նրա խոսքով՝ տավարի միսը թանկացել է 300 դրամով, խոզի մսի գինը՝ 100 ցածր է անցյալ տարվա գնից, սակայն Նոր տարուն ընդառաջ բարձրանալու միտում կա.
«Տավարի միսը թանկացել է մոտ 300 դրամով, ինչպես մեծածախը, այնպես էլ մանրածախը։ Եթե Կառավարությունը ցանկություն ունի իրոք ոչխարաբուծությունը զարգացնել, մենք պատրաստ ենք իրենց տալ լուրջ ծրագիր, որը որ 1-2 տարում Հայաստանում ոչխարաբուծությունը հնարավոր է հասցնել մոտ 1 միլիոն գլխի»։
Խաղողի բերքը 30 տոկոսով նվազել է, պատճառը խոնավ եղանակն էր եւ հիվանդությունները. «Արդեն գնումները վերջացել էին, և Կառավարությունը հայտարարում է մի ֆենոմենային թիվ, եթե չեմ սխալվում՝ 130 հազար տոննա, որը ոչ թե իրականության չի համապատասխանում, այլ նաև շատ տարօրինակ թիվ էր։ Եթե այդ քանակը լիներ, գործարաններում հերթի համար մարդասպանություն կլիներ, իսկ մենք հերթ չունեինք»,- ասաց Բերբերյանը
Նրա խոսքով՝ իրենց հկ ամեն տարի դիմում է Կառավարությանը, որ գյուղացին սուբսիդավորի, սակայն Կառավարությունը «համառորեն» ֆինանսավորում է գործարանատերերին. «Ցածր տոկոսանի վարկերը ստանում են հիմնականում գործարանատերերը՝ գյուղացու անվան տակ։ Վաղը այդ գործարանատերը այդ գումարով սպիրտ է գնելու, ի՞նչ խաղողի մասին է խոսքը։ Ռեկորդային բերք է հայտարարելու, որը փաստորեն չի եղել, արդյունքում փողերի լվացում է եղել»:
Նա նշեց, որ հայկական բրենդը՝ կոնյակը, նույնպես կորցրել է որակը, արտահանվում է անորակ սպիրտով կոնյակ.
«Այսօր վարկաբեկված է նաեւ հայկական կոնյակը։ Հարկավոր է ստուգել այդ որակը, հայկակա՞ն խաղողի սպիրտով են արտադրել, կասեն՝ խառնում են, բայց պետք չափ լինի, տոկոսային հարաբերություններ լինի։ Վտանգված է մեր բրենդը, առանց այն էլ շուկան կամաց-կամաց կորցնում ենք։ Եթե առաջ հայկական կոնյակը Ռուսաստանում ամենահարկի նվերն էր, այսօր անտարբերություն է կոնյակի նկատմամբ»։