Արցախի օմբուդսմենն ԱՄՆ Հայ իրավաբանների միության պատվիրակների հետ քննարկել է փոխգործակցության հարցեր
Արցախի Հանրապետության Մարդու իրավունքների պաշտպան Արտակ Բեգլարյանը հոկտեմբերի 15-ին ընդունել է ԱՄՆ Հայ իրավաբանների միության մարդու իրավունքների կոմիտեի համանախագահներ Գարո Ղազարյանին եւ Գառնիկ Քերքոնյանին:
Պաշտպանը ողջունել է Միության պատվիրակության հերթական այցն Արցախ՝ բարձր գնահատելով կազմակերպության հետ ձեւավորված համագործակցությունը եւ նրանց տեւական ուշադրությունը արցախցիների իրավունքների պաշտպանության հիմնախնդիրների վրա:
Գ. Ղազարյանը եւ Գ.Քերքոնյանն իրենց հերթին գոհունակություն են հայտնել զարգացող համագործակցության արդյունքներից՝ պատրաստակամություն հայտնելով շարունակել ջանքերն արդյունավետության հետագա բարձրացման ուղղությամբ:
Կողմերը քննարկել են մի շարք հարցեր, այդ թվում՝ Ա. Բեգլարյանի՝ Կալիֆորնիա այցի շրջանակներում ձեռքբերված պայմանավորվածությունների իրականացման ընթացքի վերաբերյալ:
Միության պատվիրակությունը, Պաշտպանի միջնորդությամբ, աշխատանքային հանդիպումներ է ունեցել պետական այլ պաշտոնյաների հետ, ինչպես նաեւ դասախոսությամբ հանդես եկել Արցախի պետական համալսարանի մի խումբ ուսանողների համար: