ՍԴ դատավորները չտրվեցին ճնշումներին և մասնագիտական որոշում կայացրին. իրավաբանը՝ ՍԴ որոշման մասին
Ազգային ժողովի դիմումի հիման վրա՝ Սահմանադրական դատարանի դատավոր Հրայր Թովմասյանի լիազորությունները դադարեցնելու վերաբերյալ գործի վարույթ ընդունելը մերժելու որոշմանը հնարավոր է հաջորդի ՍԴ–ին ուղղված ճնշումների նոր ալիք, NEWS.am–ի հետ զրույցում նման տեսակետ է հայտնել իրավաբան Գոհար Մելոյանը։
«7–րդ գումարման Ազգային ժողովի ձևավորումից հետո իշխող ուժի համար նպատակակետ է դարձել Սահմանադրական դատարանի ոչ կառավարելի անդամներին մեկուսացնելը և կառավարելի ՍԴ ունենալը։ Քայլերի տրամաբանությունը հուշում է, որ նոր ճնշումներ կլինեն»,–ասել է նա։ Մելոյանը նշել է, որ իր համար ՍԴ որոշումը սպասելի էր.
«Բարձր դատարանի ամենատրամաբանական քայլը տվյալ դիմումի վարույթ ընդունելը մերժելն էր, քանի որ հենց վերնագրից սկսած առկա էին հակասահմանադրական և ոչ իրավաչափ եզրույթներ։ Ողջունելի է, որ ՍԴ դատավորները որևէ ճնշման չտրվեցին և մասնագիտական որոշում կայացրին»:
Գոհոր Մելոյանը հույս է հայտնել, որ այս որոշումը ազդակ կդառնա, որ իշխանությունները դադարեցնեն դատական իշխանության նկատմամբ հետապնդումներն ու ճնշումները և գործեին օրենքի շրջանակներում. «Ես լիահույս եմ, որ այս որոշումից հետո պետական բարձրաստիճան պաշտոնյաները կմնան իրենց գործառույթների շրջանակում և կհետևեն իրավական պետության չափանիշներին»։
Հիշեցնենք, որ Սահմանադրական դատարանն այսօր՝ հոկտեմբերի 14-ին տեղի ունեցած աշխատակարգային նիստում որոշում է կայացրել «Ազգային ժողովի դիմումի հիման վրա՝ Սահմանադրական դատարանի դատավոր Հրայր Թովմասյանի լիազորությունները դադարեցնելու վերաբերյալ» գործի վարույթի ընդունումը մերժել։
Ավելի վաղ հայտնել ենք, որ Ազգային ժողովը հոկտեմբերի 4-ին, փակ գաղտնի քվեարկության ընդունեց ՍԴ նախագահ Հրայր Թովմասյանի լիազորությունները դադարեցնելու հարցով ՍԴ դիմելու նախագիծը։ Թովմասյանի լիազորությունները դադարեցնելու հարցով ՍԴ դիմելու նախաձեռնության հեղինակը «Իմ քայլը» խմբակցությունն է: Հրայր Թովմասյանի պնդմամբ՝ այս նախաձեռնությունը քաղաքական նպատակներ էր հետապնդում: Հավելենք, որ Հրայր Թովմասյանը ՍԴ նախագահ է ընտրվել 2018թ. փետրվարին։