Մամուլի հրապարակումները, թե ես նախկինում աշխատել եմ տաքսու վարորդ կամ առաքիչ, իրականությանը չեն համապատասխանում. Արագածոտնի մարզպետ Դավիթ Գևորգյան
Տնտեսական հեղափոխության հաջող ընթացքն արդեն իսկ անհերքելի փաստ է։ Այս մասին այսօր՝ հոկտեմբերի 12-ին, «Իմ քայլը հանուն Արագածոտնի մարզի» ներդրումային բիզնես ծրագրերի համաժողովի իր ելույթում հայտարարեց Արագածոտնի մարզպետ Դավիթ Գևորգյանը։
«Արագածոտնի մարզում, կամ ինչպես ես եմ հաճախ սիրում ասել՝ Հայաստան աշխարհի Արագած սրտում մենք այսօր ներկա ենք մի աննախադեպ միջոցառման, գոնե մեր մարզի համար աննախադեպ թե՛ իր նշանակությամբ, թե՛ իր ծավալով: Մարզի մասին խոսելիս ձեզ վիճակագրական թվերով չեմ ուզում ծանրաբեռնել, մի քանի առանձնահատկության մասին եմ ուզում խոսել: Ծովի մակերեւույթից 1000-4000 մետր բարձրության դիրքն Արագածոտնի մարզը գրավիչ է դարձնում թե' զբոսաշրջության, թե' գյուղատնտեսության եւ թե' արդյունաբերության համար, որոնց հետ կապված նոր ծրագրեր կան»,- ասաց մարզպետը եւ հավելեց, որ մարզում կա նաեւ ահռելի գիտական եւ կրթական պոտենցիալ, սակայն խնդիրը ամեն օր այդ ամենին նոր թափ, նոր շունչ հաղորդելն է։
«Մեր թիմին շատերը կոչում են հեղափոխականների թիմ, նոր եկած մարդկանց թիմ, նոր մոտեցումներ ունեցող մարդկանց թիմ։ Անկեղծ պետք է լինեմ, որոշ շրջանակների մոտ դա ինչ-որ կասկածի կամ անորոշության տեղիք է տալիս։ Բայց մենք չենք խուսափում այդ փոքր կասկածից, որովհետեւ մարդիկ քիչ են հավատացել: Մենք միշտ վարչապետի գլխավորությամբ ասել ենք՝ մի հավատացեք մեզ, այլ հավատացեք ինքներդ ձեզ։ Անցած տարվա գարնանն ամեն մեկը հավատաց ինքն իրեն, հասկացավ ու գնահատեց իր դերը ամբողջության մեջ։ Հայաստանում տեղի ունեցավ այն, ինչը թե Հայաստանից դուրս գտնվողների եւ թե ներսում գտնվողների համար անհնարին էր թվում»,- ասաց Դավիթ Գեւորգյանը։
Մարզպետը նկատեց, որ տնտեսական հեղափոխության հաջող ընթացքն արդեն նկատվում է, եւ դա անհերքելի փաստ է. «Պարոն վարչապետն ազդարարեց Հայաստանում մեկնարկող տնտեսական հեղափոխության մասին եւ բազմաթիվ տնտեսագետներ ինչ-որ կիսահաշվարկներ են փորձում ներկայացնել՝ ապացուցելու համար, որ տնտեսական հեղափոխությունը հնարավոր չէ»։
Վարչապետ Նիկոլ Փաշինյանից թույլտվություն ստանալով՝ մարզպետը առաջին անգամ պատմեց 2018 թվականի իրադարձություններից մի հատված.
«Իրադարձությունները տեղափոխվել էին արդեն Երեւան։ Երեւանյան երեկոներից մեկում, երբ մի սենյակում Նիկոլ Փաշինյանի, Արայիկ Հարությունյանի հետ քննարկում էինք հաջորդ օրվա անելիքները, Արայիկ Հարությունյանը օրվա լրահոսն էր կարդում: Ասաց, որ ռադիոտան հայտնի գործի առնչությամբ քրեական գործ է հարուցվել եւ գուցե ձերբակալություն լինեն: Նիկոլ Փաշինյանը զարմացած նայեց եւ ասաց. «Ի՞նչ քրեական գործ, ի՞նչ ձերբակալություն։ Եթե ժողովրդին չենք կարողանալու հասցնել իրենց հաղթական նպատակին, ուրեմն ես քաղաքականության մեջ էլ անելիք չունեմ»: Ես վստահ եմ, որ տնտեսական հեղափոխությունը հաջողելու է։ Այսինքն՝ պետք է հաջողել, այլ տարբերակ չկա»։
«Ինչ վերաբերում է մամուլի հրապարակումներին, թե ես նախկինում աշխատել եմ տաքսու վարորդ կամ առաքիչ, դրանք իրականությանը չեն համապատասխանում: Իմ երազանքի Հայաստանում ամենահպարտը քայլում է սովորող, աշխատող փնտրող, պրպտող, օրվա աշխատանքով բարիք ստեղծող մարդը, իմ երազած Հայաստանում մարդուն հարգում են իր ստեղծած արժեքով, ոչ թե մեքենայի շքեղությամբ: Իմ երազանքի Հայաստանում ամոթ չէ ինչ-որ աշխատանք կատարելը, ամոթ է չաշխատելը: Մամուլում հրապարակումներ եղան իմ աշխատած տեղերի մասին՝ տաքսու վարորդ, առաքիչ, որոնցով ես չեմ զբաղվել: Դա մտածողության խնդիր է, ինձ չեն վնասել դրանով, կվնասեին, որ ասեին՝ պարապ թրեւ եմ եկել, ինչ-որ մեկի աշխատանքից ինչ-որ բան եմ փախցրել»,- ասաց մարզպետը:
Ապա մարզպետը հիշեց այն օրը, երբ Աշտարակում գինու բակ էին բացում ՄԱԿ-ի զարգացման ծրագրով. «Տանը, որտեղ գտնվում էինք, շատ մեծ կարասներ կային դրված, եւ ուսումնասիրությունները ցույց էին տվ ել, որ տան կառուցումից հետո ոչ մի դռնով եւ պատուհանով դրանք ներս չէին կարող մտնել, ուրեմն՝ կարասները ներսում են եղել, երբ կառուցվել է տունը, այդ կարասների վրա է տունը կառուցվել: Ես երազում եմ, որ Հայաստնում աշխարհի ամեն մի հայ լինի այնքան մեծ ու այնքան հզոր, որքան այդ կարասներն այդ տանը, որ մեր դարպասները, սահմանները ամեն հայի ներս թողնեն, եւ նրանք կարասների պես չկարողանան ու չուզենան դուրս գալ, քանի որ, պարոն վարչապետ, մենք բոլորս համաձայն ենք՝ Հայաստանն իմ օջախն է, ժողովուրդն իմ ընտանիքն է»:
Դավիթ Գևորգյանն նշեց, որ միայն աշխատելով է հնարավոր լավ ապրել մեր երկրում.
«Բազմաթիվ առիթներ եմ ունեցել ասելու, հիմա էլ ուզում եմ կրկնել՝ իմ խորին համոզմամբ հայրենիքը չեն սիրում կենացներով, երգերով, սիրում են գործով, այստեղ ներկա բոլոր մարդիկ, այստեղից դուրս 100 հազարավոր մարդիկ իրենց ամենօրյա սերն առ հայերնիք արտահայտում են իրենց աշխատանքով: Ես վստահ եմ, որ հայրենսիրության լավագույն դրսեւորումը հայրենիքումդ լավ պետություն կառուցելն է: Ես այս խոսքերն ասել եմ Թաթուլ Կրպեյանի գերեզմանին ծնկի իջած, ես այս խոսքերն ասել եմ մանուկներին գրկած: Մեր երազանքն իրականություն է դառնալու, դրան այլընտրանք չկա պարզապես: Ես ցանկանում եմ ապրել մեր հերոսների սխրանքին եւ մանուկների ժպիտներին արժանի երկում, շատ երկար ժամանակ համախմբվել ենք աղետների եւ վատ առիթների դեպքում: Անցած տարի գարնանը մի պայծառ իրադարձության շուրջ ենք հավաքվել, մենք՝ ՀՀ քաղաքացիներս, ոսկե տառերով պատմություն ենք գրում, մենք խենթ մարդիկ ենք, խենթի նման ենք պայքարում, նվիրվում, սիրում»։