Հանրապետական ծննդատանը մահացած նորածնի մայրը դեռ վերակենդանացման բաժանմունքում է

Սեպտեմբերի 24-ին Հանրապետական ծննդատանը մահացած նորածնի մայրը՝ 33-ամյա Հայկուհի Խաչատրյանի դեռևս գտնվում է հիվանդանոցի վերակենդանացման բաժանմունքում։ Այս մասին NEWS.am–ին հայտնել է ինքը՝ Հայկուհի Խաչատրյանը։

Նշենք որ նորածնի մահվան դեպքից օրեր անց երիտասարդ կինը հոսպիտալացվել է: Վերջինիս մոտ ախտորոշվել է աջակողմյան թոքաբորբ:

Հայկուհի Խաչատրյանը նշել է, որ մինչ այս պահը դեռ երեխայի դին չի հայտնաբերվել, որպեսզի իրենք կարողանան հանձնել հողին։

«Մեզ միայն երեխայի օրգաններն են ցույց տվել ու այդքանով մտածում են, թե պիտի սահմանափակվենք։ Ցույց են տվել թոքի կտորներ, ու ասացին՝ ձեր երեխայինն է»,–ասաց նա։

Կնոջ խոսքով՝ առողջապահության նախարարը խոստացել է մեղավորներին գտնել և այս մութ պատմությունը բացահայտել։

Հայկուհին պնդում է, որ պտղի մահվանից հետո ինքն անանուն զանգ է ստացել, որով իրեն հաղորդել են, որ նորածնի մարմինը դատաբժշկական փորձաքննության չեն ուղարկել: «Խաբեություն է, ես երեխայիս դին չեմ տեսել, ինձ տեղեկացրեցին, որ ոչ մի լաբորատորիայում չկա»,- հայտարարել է մայրը:

Պերինատոլոգիայի, Մանկաբարձության եւ Գինեկոլոգիայի հանրապետական ինստիտուտից, սակայն պնդում են, որ հիվանդանոցը պտղի մահվան արձանագրումից 12 ժամվա ընթացքում պտղի դին ուղարկել է դիահերձման։ Ըստ հիվանդանոցի՝ ծննդկանի քույրը՝ Հերմինե Խաչատրյանը, ծննդաբերելուց հետո տեսել է պտղի դին:

Հիշեցնենք, որ սեպտեմբերի 29–ին Հայկուհի Խաչատրյանը հաղորդում է տվել այն մասին, որ սեպտեմբերի 24-ին 39 շաբաթական հղիությամբ բուժօգնության է դիմել «Վերարտադրողական առողջության պերինատոլոգիայի, մանկաբարձության եւ գինեկոլոգիայի հանրապետական ինստիտուտ» ՓԲԸ, որտեղ ծննդաբերել է արական սեռի երեխա, եւ նույն օրը պտուղը մահացել է:

Դեպքի կապակցությամբ հարուցվել է քրեական գործ ՀՀ քրեական օրենսգրքի 130-րդ հոդվածի 2-րդ մասի (Բժշկական սպասարկում իրականացնողների կողմից մասնագիտական պարտականությունները ոչ պատշաճ կատարելը, որն անզգուշությամբ առաջացրել է բուժվող հիվանդի մահ) հատկանիշներով: Ծննդկանը ճանաչվել է տուժող եւ հարցաքննվել: Դեպքի կապակցությամբ նշանակվել են դատաբժշկական հանձնաժողովային եւ դատագենետիկական փորձաքննություններ: