Մեր բոլորի պարտքն է սատարել եւ առաջնորդվել Արցախի ժողովրդի հստակ արտահայտված ինքնորոշման իրավունքով. Շավարշ Քոչարյան (Տեսանյութ)

Արցախի ժողովուրդն անթերի է իրացրել իր ինքնորոշման իրավունքը: Այս մասին այսօր՝ հոկտեմբերի 11-ին, Ստեփանակերտում ընթացող Արցախի հարեկամների համաժողովի իր ելույթում նշեց Հայաստանի ԱԳ փոխնախարար Շավարշ Քոչարյանը:

Անդրադառնալով ինքնորոշման իրավունքին, նա նշեց. «Սա իրավունք է, որն ամրագրված է ՄԱԿ-ի կանոնադրությամբ, որպես ՄԱԿ-ի երեք նպատակներից մեկը: Իրավունք, որին չի կարելի հակադրել որեւէ միջազգային իրավունքի սկզբունք, ներառյալ եւ առաջին հերթին տարածքային ամբողջականությունը: Իրավունք, որ գերակայում է ցանկացած այլ միջազգային փաստաթղթի հանդեպ, լինի երկկողմ, թե բազմակողմ: Եթե հակասություն կա ՄԱԿ-ի կանոնդրությամբ ամրագրված ինքնորոշման իրավունքի եւ որեւէ այլ միջազգային պայմանագրի դրույթի միջեւ, գործում է ինքնորոշման իրավունքը:

Մեր բոլորի պարտքն է սատարել եւ առաջնորդվել Արցախի ժողովրդի հստակ արտահայտված ինքնորոշման իրավունքով»:

Համաժողովի աջորդ թեման համագործակցությունն է. «Եթե մենք խորքային նայենք բոլոր զարգացումներին, ապա ըստ էության, այս հարցում խոչընդոտը հակաքաղաքակրթական ուժերն են: Իրականում պայքար է գնում քաղաքակրթությունների եւ հակաքաղաքակրթական ուժերի միջեւ: Այդ հակաքաղաքակրթական ուժերն անընդհատ խոչընդոտ են հանդիսանում մարդկության զարգացման համար: Պատահական չէ, որ Ցեղասպանություն վերապրած հայ ժողովուրդը միշտ գտնվում է քաղաքակրթական ուժերի կողմը: Այսօր էլ մենք այդ երկու ուժերի բախումը տեսնում ենք Մերձավոր Արեւելքում, որտեղ իրենց բնօրրանում ոնչացվում են ավանդական, քաղաքակրթությունները, ժողովուրդներ, ազգեր, ցեղեր: Այս ամենը վկայում է այն մասին, որ երբ խոսում ենք համագործակցության մասին, Արցախի համագործակցությունն իր բարեկամների հետ դա համագործակցություն է քաղաքակրթական ուժերի հետ:

Այսօր խնդիր կա բոլոր քաղաքակրթական ուժերի համատեղ ջանքերով միասնական լինել, որպեսզի հնարավոր չունենան գլուխ բարձրացնել հակաքաղաքկրական ուժերը»,-իր խոսքն ամփոփեց Շավարշ Քոչարյանը: