«Հարավկովկասյան երկաթուղի» ընկերության հետ պայմանագրի համաձայն ներդրումների ծավալները նկարագրված են մինչ 2038թ., բայց ցանկություն ունենք այդ ներդրումային ծրագիրն ավելի ճշգրտել. Մհեր Գրիգորյան

«Հարավկովկասյան երկաթուղի» ընկերության հետ պայմանագրի համաձայն ներդրումների ծավալները նկարագրված են մինչեւ 2038 թվականը, բայց մենք, բնականաբար, ցանկություն ունենք, եւ այդ ցանկությունը, կարծում եմ՝ հանդիպակաց է, որ այդ ներդրումային ծրագիրն ավելի ճշգրտենք, թվայնացնենք ըստ տարիների: Այս մասին այսօր «Ի՞նչ անել-2 տնտեսական հեղափոխություն. ընկալումը եւ գործարկումը» գիտագործնական խորհրդաժողովի ընթացքում լրագրողների հետ զրույցում ասաց ՀՀ փոխվարչապետ Մհեր Գրիգորյանը:

Նա խոստովանեց, որ այո, ՀԿԵ-ի ենթակառուցվածքներն ու շարժակազմը խորհրդային տարիներն են հիշեցնում. «Այո, մասնավորապես, շարժակազմի մասով ունենք ընդամենը երկու գնացք, որ հիշեցնում են եվրոպական ստանդարտի տրանսպորտ: Այո, այդ հարցն էլ է քննարկվել: Որոշակի պահանջների տեսք էլ է ստացել մեր դիրքորոշումը»:

Հիշեցնենք, որ ՀՀ գլխավոր դատախազությունում քրեական գործ է հարուցվել «Հարավկովկասյան երկաթուղի» ՓԲԸ Գյումրու լոկոմոտիվային դեպոյում պաշտոնեական դիրքն օգտագործելով, մի խումբ անձանց կողմից նախնական համաձայնությամբ խոշոր և առանձնապես խոշոր չափերի գումարներ խարդախությամբ հափշտակելու և փաստաթղթեր կեղծելու առերևույթ հանցագործությունների դեպքերի առթիվ:

Անդրադառնալով հիփոթեքային վարկավորման դեպքում եկամտային հարկից հետ վերադարձի սխեմային:՝ ՀՀ փոխվարչապետ Մհեր Գրիգորյանն ասաց, որ պետք է ունենանք հստակ պատկերացում, որ եթե եկամտային հարկի մասով տալիս ենք որեւէ արտոնություն, նշանակում է ինչ-որ չափի գումար բյուջեն չի ստանում:

«Դա նշանակում է, որ բյուջետային ծախսերը այդ թիրախավորմամբ որոշակիորեն դեֆորմացվում են: Իրականում այնքան, որքան դա հնարավոր է կառավարելի թիրախավորել, կարծում եմ՝ օրենսդրությամբ այս պահի դրությամբ թիրախավորված է:

Հիմա բոլորս կարող ենք եկամտային հարկից նվազեցումներ անել, եթե առաջնային շուկայից գնում եմ բնակարաններ եւ օգտվում եմ հիփոթեքային վարկից: Դրանից ավել ինչ արտոնյալ, թիրախավորված կոնֆիգուրացիա իրականացնել հնարավոր է, չեմ կարող պատկերացնել»,-ասաց նա:

Դիտարկմանը, որ ֆինանսների նախկին նախարարը նշել էր, որ 55 մլն դրամի շեմը այս դեպքում վերանայման կարիք ունի նվազեցման ուղղությամբ, փոխվարչապետն արձագանքեց, որ 55 մլն դրամի շեմը սոցիալական շեմ է. «Դուք էլ կհամաձայնեք, որ 55 մլն դրամ արժեքով բնակարանի պարագայում դա բավականին ադեկվատ սոցիալական գին է: Վերանայման կարիքը չեմ տեսնում»:

Հարցին, թե արդյոք դրանով արհեստական պահանաջարկ չեն ձեւավորում, նա պատասխանեց. «Չեմ կարծում, որ դա ուղղակիորեն կապ ունի պահանջարկի հետ: Եթե մարդը ունի աշխատանք։ եւ կարող է ստանալ հիփոթեքային վարկ, ամեն դեպքում ինքը բնակարան կգնի: Ասել, որ այդ հարկային արտոնությամբ խրախուսվում է կամ նպաստում է, ոչ: Դա սոցիալական խնդիր է լուծում»:

Մհեր Գրիգորյանը կարճ անդրադարձավ նաև երկրում կապիտալ ներդրումների հարցին, ասելով՝ որ պետք է վստահ լինել, որ կապիտալ ներդրումների համար ծրագրերի իրականացման գործընթացը դյուրին է և ոչ մի ռիսկ չի պարունակում:

Դիտարկմանը, որ այս տարի կապիտալ ծախսերի 220 մլրդ դրամից 7 ամսվա տվյալներով միայն 40 մլն դրամն է կատարվել, փոխվարչապետն ասաց. «Այդ իմաստով մեզանում տեղի է ունենում երկու զուգահեռ գործընթաց. Առաջինը իրականացնել կապիտալ ծախսեր, երկրորդը՝ դյուրինացնել կապիտալ ծախսերի իրականացման գործընթացը, որ հանկարծ կոռուպցիոն եւ այլ ռիսկեր, նաեւ արդյունավետության հետ կապված ռիսկեր չլինեն:

Կարծում եմ, որ շտապել պետք է, բայց պետք է շտապել դանդաղ, որպեսզի չշտապենք ռիսկերի հաշվին: Ի վերջո եւ ունենանք կապիտալ ներդրումներ, եւ ծրագրերի իրականացման սահուն, թափանցիկ եւ արդյունավետ գործունեությունը: