Կառավարությունը նախկին խաղի կանոնները փոխել է. Իշխանությունը իջնում է ներքին օղակներ. Վահագն Խաչատրյան
Կառավարությունն իշխանափոխությունից հետո վարքագծի փոփոխության խնդիր է դրել, որը նաև տնտեսական հեղափոխության իմաստն է: Այս մասին այսօր՝ հոկտեմբերի 9-ին, «Ի՞նչ անել-2 տնտեսական հեղափոխություն. ընկալումը և գործարկումը» գիտագործնական խորհրդաժողովից առաջ լրագրողների հետ զրույցում նշել է Երևանի նախկին քաղաքապետ, տնտեսագետ Վահագն Խաչատրյանը:
Նրա խոսքով, դա վերաբերում է բոլորիս՝ և՛ իշխանությանը, և՛ գործարարներին, և՛ բոլորին. «Տարիներ շարունակ մեզ պարտադրել էին խաղի կանոններ, որ ո՛չ բիզնեսը, ո՛չ գործարարները չէին կարող ինքնաարտահայտվել, գտնել իրենց տեղը: Որևէ հաջողության հասնելու համար առաջին հերթին պետք էր մրցակցությունից դուրս հովանավորություն ստանալ, և իշխանության տված արտոնությունից օգտվելով որևէ տեղ գրավել: Հեղափոխության ամբողջ գաղափարախփոսությունը այս խաղի կանոնները փոխելն էր, ինչը տեղի է ունեցել»,- ասել է նա:
Վահագն Խաչատրյանը նաև ընդգծել է, որ կառավարությունը այսօր չի խառնվում տնտեսական կյանքին, բոլորին ազատություն է տվել, մրցակցային հավասար պայմաններ են ստեղծվել. «Այստեղ մենք բոլորս մեր տեղն ենք փորձում գտնել: Մենք հիմա այդ ճանապարհին ենք: Իհարկե, հաջողություններ ունենք, բայց չի կարելի մտածել, որ այս ամենը վերջացել է, որովհետև ես կարող եմ թվարկել նաև թերություններ, հիմնականում կապված կառավարության կառուցվածքային փոփոխությունների, նաև տնտեսական բարեփոխումների հետ: Շատ խիստ գնահատականներ չեմ տալիս, որովհետև հասկանում եմ, որ նախկին համակարգը շատ կարծրացած էր, շատ ուժեղ կապված էր հորիզոնական և ուղղահայաց կապերով եւ այդ կապերը քանդելը շատ դժվար է: Ես այսօր տեսնում եմ, որ այդ քանդելը ստացվում է: Իշխանությունը նաև իջնում է ներքին օղակներ: Ես համոզված եմ, որ քաղաքացիները ևս այս ամենը զգում են: Ազատության շունչն իր ազդեցությունը կունենա նաև բիզնեսի վրա»:
Սակայն հավասար պայմաններ ստեղծելը դեռ չի նշանակում, որ մենք կարող ենք հավասար զարգացում ապահովել, կարծում է տնտեսագետը:
«Որովհետեւ ստարտային պայմանների առումով նախկին խոշոր բիզնեսի ներկայացուցիչները, որոնք օգտվում էին նախկին բարիքներից, իհարկե, գտնվում են ավելի լավ պայմաններում: Այս առումով կառավարության դերը այն է, որ կարողանա ստարտային ավելի վատ պայմաններում գտնվողներին ինչ-որ ձեւով հնարավորություններ տա: Այստեղ կառավարությունը մեծ անելիք ունի»,-ընդգծել է նա: