Ավելի ու ավելի շատ հայեր են վերադառնում Հայաստան, քանի որ գիտեն, որ տաղանդներն այստեղ են. Ալեքսիս Օհանյանի ելույթը՝ WCIT 2019-ում

Ավելի ու ավելի շատ հայեր են վերադառնում Հայաստան, քանի որ գիտեն, որ տաղանդները հենց այստեղ են: Այս մասին WCIT 2019-ի ընթացքում իր ելույթում հայտարարել է Reddit-ի եւ Initialized Capital-ի համահիմնադիր Ալեքսիս Օհանյանը:

«Այժմ շատ կարևոր շրջան է Հայաստանի համար, որն ունի շատ բարդ հարեւաններ, չունի ելք դեպի ծով, ունի սահմանափակ բնական ռեսուրսներ: Սակայն, միեւնույն ժամանակ, սա երկիր է զարմանալի հնարավորություններով, քանի որ մարդկային տաղանդը, որը միշտ առկա է եղել այդ երկրում, կարող է զարգանալ՝ ծրագրային ապահովման եւ համացանցի շնորհիվ դառնալով «գլոբալ ուղեղի» մի մասը: Ահա թե ինչու եմ բոլորին խնդրում գոնե փորձել զբաղվել ծրագրավորմամբ եւ խրախուսել երիտասարդներին զբաղվել ծրագրավորմամբ, քանի որ դրա համար հիմքեր իսկապես կան»,- նշել է նա:

Նրա խոսքով՝ շախմատը ծրագրավորման ուսուցման հիմնարար մոդելն է:

«Հիշում եմ՝ ինչպես 2010-ին այցելեցի Թումո կենտրոն, որն այդ պահին կառուցման փուլում էր, եւ հիշում եմ՝ ինչպես ինձ պատմեցին, թե ինչ կարող է մարդկանց տալ այդ կենտրոնը, թե ինչպես Հայաստանի երիտասարդությունը կարող է կենտրոն այցելել եւ սկսել համակարգչային գիտություն, դիզայն կամ արվեստ ուսուցանել համաշխարհային մակարդակի դասընթացների եւ տեխնիկայի օգնությամբ: Եվ ահա երբ վերադարձա մի քանի տարի անց, տեսա այդ կենտրոնը՝ լի վառ ուղեղներով, վառ հայկական ուղեղներով, որոնք հասանելիություն են ստանում համաշխարհային մակարդակի գործիքներին եւ տեխնոլոգիաներին, ինչպես եւ խոստանում էին: Նրանք իրենց տեղն են գտնում այդ մեծ «գլոբալ ուղեղում»: Դա ինձ հույս է ներշնչում, քանի որ այժմ ավելի ու ավելի շատ հայեր են այստեղ վերադառնում, քանի որ ցանկանում են միանալ այդ գլոբալ ուղեղին, եւ նաեւ այն պատճառով, որ տաղանդները հենց այստեղ են»,- նշել է Ալեքսիս Օհանյանը:

Նրա խոսքով՝ ինքը հիշում է Ցեղասպանության տարիներին հայրենիքը ստիպողաբար լքած ծնողների մասին իր պապիկի պատմած պատմությունները:

«Այդ պատմությունները մնում են իմ ներսում, հատկապես այսօր, երբ ԱՄՆ-ը բացահայտորեն հակասական վերաբերմունք է ցուցաբերում ներգաղթյալների եւ փախստականների հանդեպ»,- հավելել է նա՝ նշելով, որ իր պապիկի ծնողներին հաջողվել է փրկվել եւ «մի քանի սերունդ հետո ծնվել է ինքն ու կարողացել ծրագրավորմամբ զբաղվել, կարողացել է ստեղծել այն, ինչը ներառված է աշխարհի խոշորագույն կայքերի տասնյակում»:

Նրա խոսքով՝ «մենք արհեստական ինտելեկտի ոլորտում հեղափոխության սկզբի վկաներն ենք, եւ դրա համար պահանջվում է տեխնոլոգիաներ ներդնել, որոնք կան մեր ԴՆԹ-ում, եւ դա հատկապես վերաբերում է Հայաստանին»:

«Եվ այդ պատճառով, երբ ես խոսում եմ ԱՄՆ-ում կամ այստեղ՝ Հայաստանում բնակվող մարդկանց հետ, որոնք նոր-նոր են մտնում պրոցես եւ զարգացնում իրեն ունակությունները, ես ասում եմ. «Ստեղծեք այն կարիերան եւ զարգացրեք այն հմտությունները, որոնք կրեատիվություն եւ էմպաթիա են պահանջում»: Իմ քույրը բուժքույր է, եւ երբ ես լսում եմ, թե նա աշխատանք է կատարում, հասկանում եմ, որ ոչ մի ռոբոտ չի կարող անել այն, ինչ անում է նա:

Հայաստանում կան ժառանգություն, պատմություն և գաղափարներ, որոնց մասին պետք է խոսել: Հայաստանն ունի այնպիսի ժառանգություն, այնպիսի պատմություն, այնքան շատ գաղափարներ, որոնց մասին պետք է խոսել: Ես գիտեմ, որ իմ մանկության մեծ մասն անցկացրել եմ՝ ինձ հայ չզգալով, լավ չեմ հասկանում հայերեն եւ դրանում մեղադրում եմ հորս»,- ընդգծել է Օհանյանը:

Ալեքսիսի խոսքով՝ երբեմն ինքը մտածում է՝ ինչ կարող է անել, որպեսզզի Օլիմպիան հիշի իր հայկական արմատների մասին եւ հայերեն սովորի:

«Երբեմն մտածում եմ, որ կարող եմ շախմատ սովորեցնելու համար հայ ուսուցիչ գտնել, որը նաեւ նրան հայերեն կսովորեցնի»,- նշել է նա:

Ավարտելով ելույթը՝ Օհանյանը հիշեցրել է Հայաստանում տեղի ունեցած թավշյա հեղափոխության մաին: «Երջանիկ եմ լինել այստեղ: Զգացված էի՝ հետեւելով սոցցանցերում խաղաղ հեղափոխությանը: Իմ ներդրումն եմ ունեցել ընդամենը մի քանի ռեթվիթ անելով, սակայն իսկապես հավատում եմ, որ փոփոխությունների ուղեկիցը, որն օգնեց դա անել, կլինի այն նույն ուղեկիցը, որը կօգնի երկրին զարգանալ՝ լինելով հենց այդ «գլոբալ ուղեղի» մի մասը»,- եզրափակել է Ալեքսիս Օհանյանը: