ՍԴ դատավորը հաշվետու չէ որևէ մեկին, այդ թվում` պարտավոր չէ որևէ բացատրություն տալ. Արևիկ Պետրոսյան. 168.am
ՍԴ դատավորը հաշվետու չէ որևէ մեկին, այդ թվում` պարտավոր չէ որևէ բացատրություն տալ: Այս մասին 168.am-ի հետ զրույցում նշել է ՍԴ անդամ Արևիկ Պետրոսյանը:
Նշենք, որ Հրայր Թովմասյանի լիազորությունները դադարեցնելու հարցով ՍԴ-ին ուղղված դիմումը ՍԴ-ում մուտքագրվել երեկ` հոկտեմբերի 7-ին:
«Սահմանադրական դատարան մուտքագրվող ցանկացած դիմում քննության առարկա է դառնում սահմանված իրավական ընթացակարգերով, ժամկետներում և ենթակա է նախնական ուսումնասիրման: Գործն ընդունվում է վարույթ, եթե, իհարկե, առկա չեն գործի քննությունը մերժելու օրենքով նախատեսված հիմքեր»,-նշել է Արեւիկ Պետրոսյանը:
Անդրադառնալով դիտարկմանը, որ քաղաքական, հասարակական, իրավապաշտպան որոշակի շրջանակներ այս կամ այն կոչով, հորդորով են հանդես գալիս, նա արձագանքեց. «Խնդրանք` ձեռնպահ մնալ Սահմանադրական դատարանի լիազորություններից բխող որեւէ գործողություն կատարելու կամ չկատարելու որեւէ կոչերից, հորդորներից: Սահմանադրական դատարանը սահմանադրական արդարադատությունն իրականացնում է ղեկավարվելով բացառապես Սահմանադրությամբ եւ օրենքին համապատասխան: Ինչ վերաբերում է միջամտությանը` Սահմանադրությունը եւ Սահմանադրական դատարանի մասին սահմանադրական օրենքն ունեն հստակ կարգավորումներ:
Մասնավորապես, Սահմանադրության 162-րդ հոդվածի 2-րդ մասի համաձայն` արդարադատության իրականացմանը որեւէ միջամտություն արգելվում է:
Սահմանադրական դատարանի մասին սահմանադրական օրենքի 7-րդ հոդվածի 1-ին մասի համաձայն՝ արդարադատություն իրականացնելիս դատավորն անկախ է պետական եւ տեղական ինքնակառավարման մարմիններից, պաշտոնատար, ֆիզիկական եւ իրավաբանական անձանցից, հաշվետու չէ որեւէ մեկին, այդ թվում` պարտավոր չէ որեւէ բացատրություն տալ»: