«Իմ քայլը» մեկնաբանել է «Հայելի» մամուլի ակումբի վրա հարձակումը
Եթե Հայաստանում չլինեն ազատ մամուլ, անկախ լրատվամիջոցներ, ժողովրդավարությունը կարող է սպառնալիքի տակ հայտնվել: Հոկտեմբերի 7-ին ԱԺ ավանդական ճեպազրույցների ժամանակ այս մասին ասաց իշխող «Իմ քայլը» դաշինքի պատգամավոր Վլադիմիր Վարդանյանը՝ մեկնաբանելով «Հայելի» մամուլի ակումբի վրա հարձակումը:
Ընդ որում՝ նա նշեց, որ մամուլի այս ակումբը վերջին շրջանում քանիցս անդրադարձել է նաեւ իր գործունեությանը՝ ներկայացնելով ոչ այնքան դրական լույսի ներքո: «Մեջբերելով Վոլտերին՝ կարող եմ միայն ասել, որ համաձայն չեմ մամուլի կարծիքի հետ, բայց պատրաստ եմ ինձ զոհաբերել հանուն նրա, որ լրատվամիջոցներն այդ կարծիքն արտահայտելու հնարավորություն ունենան: Եվ սա վերաբերում է բոլորին»,- հավաստիացրեց պատգամավորը:
Լրագրողների հարցին՝ այս հարձակումն արդյոք կապվա՞ծ է Սահմանադրական դատարանի նախագահ Հրայր Թովմասյանի շուրջ առաջացած իրավիճակի հետ (մամուլի ակումբի ղեկավարը նրա հետ ազգակցական կապ ունի), նա պատասխանեց, որ իր համար անընդունելի է ցանկացած մանիպուլյացիա, որի շնորհիվ ձեռնարկվում է իրավական գործընթացքը քաղաքականի վերափոխելու փորձ:
Հիշեցնենք, Operativ լրատվականը, հղում կատարելով Hraparak.am լրատվականին, հայտնել էր, որ հարձակում է տեղի ունեցել Hayeli.am մամուլի ակումբի վրա: 4 երիտասարդներ ձվեր էին նետել մամուլի ակումբի ուղղությամբ, նրանցից Դավիթ Հովաննիսյանն ներկայացածն էլ ասաց, որ պահանջում են փակել լրատվամիջոցը:
Tert.am-ի հետ հարցազրույցում էլ մեկնաբանելով որպես ցուցարար ներակայացած մի խումբ երիտասարդների կողմից երեկ «Հայելի» մամուլի ակումբի դեմ իրականացված հարձակումը՝ Անժելա Թովմասյանը աներկբա վստահություն էր հայտնել, որ կատարվածի հետևում կանգնած են իշխանությունները, որոնց անմիջական հովանավորությամբ էլ տեղի է ունեցել ոտնձգությունը: Թովմասյանը կատարվածը հատկապես պայմանավորել էր Հայկ Հարությունյանի ինքնասպանության վերաբերյալ միառժամանակ առաջ Hayeli.am-ում տեղ գտած հայտնի հրապարակման փաստի հետ: