Հունաստանում կանցկացվի լրագրողների և տրանսպորտի աշխատողների գործադուլ
Չորեքշաբթի հունական պրոֆմիություններն անցկացնում են գործադուլ ընդդեմ, այսպես կոչված, «զարգացման մասին օրենքի», որը սահմանափակում է աշխատավորների եւ պրոֆմիությունների իրավունքները, փոխանցում է «ՌԻԱ Նովոստի»-ն:
Գործադուլին մասնակցում են OTE հեռահաղորդակցային ընկերությունների աշխատողները, ուսուցիչներ եւ համալսարանների դասախոսներ, տրանսպորտի աշխատողներ, բանկային հատվածի աշխատակիցներ, նավաստիների պրոֆմիությունների մի մասը, հեռուստատեսությամբ եւ ռադիոյով լուրեր չեն թողարկվի, լույս չեն տեսնի թերթեր: Աթենքի կենտրոնում պատրաստվում են հանրահավաքներ եւ ցույցեր:
Սա վերջին 2 շաբաթում երկրորդ գործադուլն է ընդդեմ Հունաստանի նոր կառավարության քաղաքականության, որն իշխանության է եկել հուլիսի 7-ի ընտրություններից հետո: Մինչ սա գործադուլ էր անցկացվել սեպտեմբերի 24-ին
Պրոֆմիությունները հայտարարում են, որ կառավարության պատրաստած տնտեսական զարգացման մասին օրինագիծն ուղղված է հասարակության եւ աշխատավորների դեմ: Օրինագծով նախատեսվում է, որ գործադուլ կարելի է հայտարարել միայն պրոֆմիությունների անդամների կեսից ավելիի աջակցության դեպքում, այլ ոչ թե 10-15 ղեկավարների: Գործատուներն ավելի շատ իրավունքներ են ստանում ճյուղային հավաքական պայմանագիր կնքելիս եւ կարող են վկայակոչել ընկերության ֆինանսական խնդիրները: Պրոֆմիությունների իրավունքները սահմանափակվում են:
Տրանսպորտային կոլապս
Առավել մեծ խնդիրներ են սպասվում ճանապարհներին. հանրային տրանսպորտի աշխատողների գործադուլի պատճառով շատերը ստիպված կլինեն աշխատանքի հասնելու համար անձնական ավտոմեքենաներն օգտագործել: Ուղեւորները դժվարությամբ կհասնեն օդանավակայան:
Մեկ ամբողջ օր 2 ուղղությամբ չեն երթեւեկի մետրոյի գնացքները: Ավտոբուսներն ու տրոլեյբուսները կաշխատեն 9.00-ից մինչեւ 21.00, իսկ տրամվայները՝ 9.00-ից մինչեւ 15.00: Գործադուլ են հայտարարել երկաթուղու աշխատողները, չեղարկվում են միջքաղաքային եւ մերձքաղաքային գնացքների ուղերթները:
Լաստանավերը չեն գործի Ատիկայի երեք նավահանգիստներում, այնպես որ կղզիների մի մասը կմնա առանց միակ տրանսպորտային հաղորդակցության:
Մեկ օր առանց նորությունների
Լրագրողական արհմիությունները 24-ժամյա գործադուլ են անցկացնում. առավոտվա 6-ից կդադարեն նորությունների թողարկումները ռադիոյով եւ հեռուստատեսությամբ ինչպես մասնավոր, այնպես էլ պետական ու քաղաքային ալիքներով, լույս չեն տեսնի թերթերը։ Աշխատանքը կդադարեցնի Աթենքի նորությունների АМНА գործակալությունը։
Բացի այդ, չեն աշխատում նաեւ նախարարությունների ու գերատեսչությունների մամուլի ծառայությունները։ «Մամուլը չի կարող կորցնել աշխատանքային իրավունքները։ Առաջադրվող օրինագիծը վերացնում է գործատուների կամայականություններից աշխատողների պաշտպանության տարրական մեխանիզմները»,- ասվում է արհմիությունների համատեղ հայտարարությունում։
Օրինագծի ընդունումը ներկա տեսքով անխուսափելիորեն կհանգեցնի գործադուլների թեժացման, կարծում են արհմիությունները։ Լրատվամիջոցների աշխատակիցների՝ ինչպես լրագրողների, այնպես էլ տեխնիկական աշխատակիցների համար գործադուլին մասնակցելը պարտադիր է։
Բացառություն են կազմում միայն այն լրագրողները, ովքեր լուսաբանում են գործադուլները եւ դրանց հետ կապված ցույցերը։