Անհրաժեշտ է միջոցներ ձեռնարկել ԵՏՄ շուկայում խոչընդոտները վերացնելու համար. Սոորոնբայ Ժեենբեկով
Անհրաժեշտ է համապատասխան միջոցներ ձեռնարկել ԵՏՄ շուկայում խոչընդոտները վերացնելու համար: Այս մասին ասաց Ղրղզստանի նախագահ Սոորոնբայ Ժեենբեկովը՝ ելույթ ունենալով Երեւանում ընթացող Եվրասիական տնտեսական բարձրագույն խորհրդի ընդլայնված կազմով նիստում:
Նա ընդգծեց, որ 2018 թվականին զգալիորեն մեծացել է լարվածությունը աշխարհի խոշորագույն տնտեսական տերությունների առեւտրային հարաբերություններում, նկատվում է այս գործընթացների բացասական ազդեցություն նաեւ ԵՏՄ-ում տնտեսական իրավիճակի վրա:
«Աշխարհատնտեսական ասպեկտներից բացի, փոխադարձ առեւտրի ծավալների աճի արգելակման պատճառ են դառնում նաեւ մեր սեփական թերությունները: Որոշ երկրներ հետապնդելով կարճաժամկետ օգուտներ՝ խստացնում են պետական հսկողությունը եւ լրացուցիչ խոչընդոտներ ստեղծում»,- ասաց Սոորոնբայ Ժեենբեկովը: Նա նշեց, որ նման մոտեցումը նվազեցնում է ինտեգրացիայի ընդհանուր արդյունքը:
«Ինտեգրացիոն միավորումներում երկրներն օգուտ են ստանում ապրանքների փոխադրման արագության եւ ծավալների մեծացման միջոցով արտադրանքի ինքնարժեքի նվազեցմամբ: Իսկ իրականում վիճում ենք իրար հետ: Մեր կառավարությունները պետք է համապատասխան միջոցներ ձեռնարկեն ներքին շուկայում խոչընդոտների վերացման համար: Եթե դրանք չվերացնենք, մեր Միությունը չի կարողանա հասնել իր նպատակներին»,- ասաց նա:
Ժեենբեկովը շահագրգռություն հայտնեց ԵՏՄ արտաքին սահմաններին մաքսային վերահսկողության անցկացման թափանցիկությամբ եւ օբյեկտիվությամբ, նշեց մաքսային անցակետերում «եռակի» վերահսկում անցկացնելու եւ Հանձնաժողովին անմիջական միջնորդության ճանապարհով վիճելի իրավիճակների օպերատիվ լուծման լիազորություններով օժտելու անհրաժեշտությունը: