ԵԱՏՄ երկրների հետ Ղազախստանի արտահանումը կրճատվել է ավելի քան 6%-ով. Տոկաեւ
Եվրասիական տնտեսական միությունը դարձել է համաշխարհային առեւտրի զարգացման կարեւորագույն օղակներից մեկը: Այս մասին Երեւանում ընթացող Եվրասիական տնտեսական բարձրագույն խորհրդի նիստում հայտարարեց Ղազախստանի նախագահ Քասըմ-Ժոմարտ Տոկաեւը:
Նա նշեց, որ ԵԱՏՄ-ն բաց է արտաքին գործընկերների հետ փոխշահավետ համագործակցության համար:
«Սակայն շուկայի արագ փոփոխվող իրավիճակը, գերտերությունների միջեւ աճող մրցակցությունը, առեւտրային պատերազմները, պրոտեկցիոնիզմի աճը նպաստում են համաշխարհային տնտեսության անկայունությանը»,- Տոկաեւի խոսքը մեջբերում է «Ղազինֆորմ»-ը:
Նա նաեւ ինչպես միության ներսում, այնպես էլ երրորդ երկրների հետ առեւտրաշրջանառությունն անբարենպաստ միտում անվանեց:
«Աշխարհում տնտեսական աճի տեմպերի նվազեցումը, հատկապես մեր հիմնական տնտեսական գործընկերների, ԵՄ-ի, Չինաստանի մոտ կարող է մեզ համար անցանկալի հետեւանքների հանգեցնել: 2019-ի առաջին կիսամյակի արդյունքներով՝ երրորդ երկրների հետ ԵԱՏՄ առեւտրաշրջանառությունը նվազել է 2%-ով: Միության երկրների փոխադարձ առեւտուրը կրճատվել է ավելի քան 5%-ով՝ մինչեւ 28 մլրդ դոլար: Դա, համաձայնեք, անբարենպաստ միտում է»,- ասաց Տոկաեւը:
Նա նշեց, որ երկրին հուզում է ԵԱՏՄ-ի ներսում ղազախական ապրանքների արտահանման կրճատումը:
«ԵԱՏՄ երկրների հետ Ղազախստանի արտահանումը կրճատվել է ավելի քան 6%-ով: Դրանում օբյեկտիվ տնտեսական պատճառներ եւս կան, սակայն վարչական բարիերները մենք դուրս չենք գրում: Բարդ գլոբալ պայմաններում ծայրահեղ կարեւոր է մեր պետությունների կայուն տնտեսական աճի աջակցումը»,- հավելեց Տոկաեւը՝ նշելով, որ դա հնարավոր է միայն իրական եւ փոխշահավետ համագործակցության շնորհիվ: