ԵՏՄ տարածքում պատնեշների վերացման համար քաղաքական որոշում է պետք. Լուկաշենկո (Տեսանյութ)
Եվրասիական տնտեսական միության միջազգային օրակարգի ընդլայնման համար պետք է հատուկ ուշադրություն դարձնել հեռավոր աղեղի երկրներին։ Այս մասին ասել է Բելառուսի նախագահ Ալեքսանդր Լուկաշենկոն Եվրասիական բարձրագույն տնտեսական խորհրդի ընդլայնված կազմով նիստում, տեղեկացնում է ԲԵԼՏԱ-ն։
«Եվրասիական տնտեսական միության միջազգային օրակարգի ընդլայնման համար պետք է հատուկ ուշադրություն դարձնել հեռավոր աղեղի երկրներին, որտեղ մեր ապրանքները եւ ծառայություններն առայժմ սակավ ճանաչելի են։ Առաջարկում ենք Զարգացման եվրասիական բանկին միանալ այդ ուղղությանը։ Արժեր, որ զարգացման մեր ազգային բանկերը եւ ֆինանսական այլ հաստատություններ նույնպես որոնեն ձեւեր ավելի ամուր փոխգործակցության համար ինչպես միության ներսում, այնպես էլ արտաքին ուղղությամբ»,- կարծում է Լուկաշենկոն։
Նա դրական գնահատեց ԵՏՄ համագործակցության զարգացումը երրորդ երկրների հետ, այդ թվում Իրանի հետ ազատ առեւտրի գոտու ստեղծման ժամանակավոր համաձայնագրի մշակումը, որն ուժի մեջ կմտնի հոկտեմբերին, եւ համաձայնագրերի փաթեթը Սինգապուրի հետ։
Լուկաշենկոյի խոսքով՝ Եվրասիական տնտեսական միության տարածքում պատնեշների վերացման համար պետք է քաղաքական որոշում կայացնել։
«Այսօր մենք հանձնաժողովն օժտեցինք լիազորություններով ապրանքների մակնշման եւ դրանց շարժին հետեւելու հարցերում։ ԵՏՀ-ն պետք է երաշխավորի, որ այդ առաջադեմ առաջարկությունները նոր խոչընդոտներ չդառնան առեւտրում։ Միությունում պատնեշներն առանց այդ էլ շատ են,- նկատեց Լուկաշենկոն։- Հատկապես անհանգստացնում է, երբ դրանք մտցվում են այնպիսի զգայուն ոլորտներում, ինչպիսին են, օրինակ, պետգնումները։ Եկել է ժամանակը, որպեսզի պետությունների ղեկավարները քննարկեն ցավոտ հարցը եւ ընդունեն քաղաքական որոշում»։ Գուցե արժե ուժեղացնել Եվրասիական տնտեսական հանձնաժողովի եւ ԵՏՄ դատարանի իրավասությունը։
2020 թվականին Բելառուսը կստանձնի Եվրասիական տնտեսական միության նախագահությունը, նրա ներկայացուցիչը կգլխավորի ԵՏՀ Կոլեգիան։ Լուկաշենկոն ընդգծեց, որ երկիրը պատրաստվում է այդ շրջանին ամենայն լրջությամբ։ «ԵՏՄ-ն շատ երիտասարդ կազմավորում է։ Նրա զարգացման համար էլ ավելի շատ ջանքեր ու միջոցներ է պետք ներդնել, որպեսզի ոչ ուշ, քան 2025 թվականին կամ անգամ ավելի շուտ ստեղծվի համապարփակ եւ արդյունավետ տնտեսական միություն, կառուցվեն միասնական շուկաներ, ձեւավորվեն միասնական ճյուղային քաղաքականություններ եւ իրականացվեն ԵՏՄ-ի մասին պայմանագրի դրույթները»,- ամփոփել է նա։