Բացառվում է, որ պետությունը շահագործի «Գոլդեն փելեսը». Նարեկ Բաբայան
Պետական գույքի կառավարման կոմիտեի նախագահ Նարեկ Բաբայանը տեղյակ չէ, թե ինչով է պայմանավորված Մաքսային պետական կոմիտեի նախկին նախագահի, «Գոլդեն փելեսի» նախկին սեփականատեր Արմեն Ավետիսյանի՝ «Գոլդեն փելեսի» նվիրատվությունը պետությանը։ Այս մասին այսօր՝ հոկտեմբերի 1-ին, լրագրողների հետ զրույցում ասաց Նարեկ Բաբայանը։
Նա ասաց, որ «Գոլդեն փելեսը» գնելու առաջարկներ են հնչել, բայց ինքը չի կարող ոչ այդ գներն ասել, ոչ՝ անունները. «Պետք է ավելի ստուգված, վերջնական ու համոզիչ լինի այդ ասելը, որովհետեւ եթե ինչ-որ մեկը եկավ եւ ինչ-որ բան ասեց՝ դա դեռ որեւէ բան չի նշանակում»։
Դիտարկմանը, որ շենքը պահպանելու համար ոստիկանությանը պետությունը գումար է հատկացնելու, արդյոք ճիշտ չէ՞ գործընթացն արագացնել, որ հարկատուների հաշվին իրավապահ կառույցը երկար պահպանություն չիրականացնի, Բաբայանն ասաց.
«Դեռ ոստիկանությանը չի անցել, դեռեւս հանձնում-ընդունումը չի իրականացվել։ Գումարը դեռեւս չի հատկացվել, երբ կսկսվի ոստիկանության կողմից պահպանությունը, ոստիկանությունն արդեն կարիքի դեպքում կդիմի՝ Կառավարությունից լրացուցիչ գումար ստանալու համար։ Մենք կփորձենք մաքսիմալ արագ անել այս ամեն ինչը, ճիշտն ասած, հենց այսօր էլ պետք է գնանք այդտեղ»։
Հարցին՝ ինքը ում հետ է գնալու «Գոլդեն փելես», Բաբայանը պատասխանեց. «Չեմ ասի»։
Բաբայանն ասաց, որ շենքում եղած ամեն ինչ գույքագրված է. «Պետք է արվի հանձնում-ընդունումը՝ ըստ այդ գույքագրման ցանկի, եթե ինչ-որ մի բան պակաս լինի, դա չի կարող ընդունվել։ Կա հստակ պայմանավորվածություն, որ այն ամենը, ինչը թողնված է շարժական գույքի մասով՝ ամեն ինչը գույքագրված է եւ գնահատված»։
Նարեկ Բաբայանն ասաց, որ ինքը չի հանդիպել Մաքսային պետական կոմիտեի նախկին նախագահ եւ «Գոլդեն փելեսի» նախկին սեփականատեր Արմեն Ավետիսյանի հետ. «Տեղյակ չեմ, թե ինչով է պայմանավորված նրա նվիրատվության ցանկությունը։ Տվյալ դեպքում Ավետիսյանի որդին է դիմել, բայց ես անձամբ իր հետ չեմ հանդիպել»։
Հարցին՝ արդյոք հայտնի ընկերություններ են «Գոլդեն փելեսը» գնելու ցանկություն հայտնել, Բաբայանն ասաց. «Նման բան չկա։ Եղել են նաեւ վարձակալության առաջարկներ, բայց պետք է գտնվի լավագույն տարբերակը։ Մենք դեռ վերջնական չենք քննարկել եւ եկել լավագույն լուծմանը»։
Հարցին՝ արդյոք որեւէ ժամկետ կա՞ քննարկման արդյունքում լուծման հանգելու համար. «Հանձնման-ընդունման աշխատանքները, կարծում եմ՝ 2-3 շաբաթ կտեւեն, որից հետո կլինի պահառությունը, եւ դրան զուգահեռ մենք կկարողանանք տանել Կառավարության որոշման նախագիծ, թե ինչ գործարք պետք է տեղի ունենա։ Ենթադրում եմ, որ գործարքը կլինի մրցութային։ Եթե մրցույթ կամ աճուրդ հայտարարվի, ապա դրված են լինելու թե գնային թե այլ պայմաններ։ Աճուրդի դեպքում սահմանվելու է բարձր գին։
Հարցին՝ արդյոք հնարավո՞ր է, որ Արմեն Ավետիսյանը Երեւանում գտնվող «Գոլդեն փելես»–ները նույնպես նվիրատվություն անի, Բաբայանն ասաց, որ տեղյակ չէ։
Հարցին՝ եթե լավ տարբերակներ չառաջարկվեն, արդյոք հնարավոր է, որ պետությունը շահագործի այն, Բաբայանը պատասխանեց՝ բացառվում է։
Նշենք, որ կառավարության վերջին նիստում հավանություն տրվեց Ծաղկաձորի «Գոլդեն Փելես» հյուրանոցը որպես նվիրատվություն Հայաստանի Հանրապետությանը փոխանցելու հարցին։
Հիշեցնենք` 2018թ–ի նոյեմբերին ԱԱԾ քննչական վարչությունում հարուցվել էր քրեական գործ Մաքսային պետական կոմիտեի նախկին նախագահ Արմեն Ավետիսյանի կողմից ձեռնարկատիրական գործունեությանն ապօրինի մասնակցելու եւ հանցավոր ճանապարհով ստացված առանձնապես խոշոր չափերով գումարներն օրինականացնելու (փողերի լվացում) փաստով։
Ըստ մեղադրանքի` Արմեն Ավետիսյանն իր երեք հյուրանոցները կառուցել է ապօրինի ձեռք բերված միջոցներով, իսկ դրանց ծագումը թաքցնելու համար ներկայացրել իբրեւ արտասահմանյան ներդրում։
Անդրադառնալով «Հայփոստ»-ի շուրջ ստեղծված իրավիճակին, Նարեկ Բաբայանն ասաց, որ այն մասնավորեցման ցանկից հանելը կամ չհանելը որևէ կերպ չի առնչվում կոնկրետ Էդուարդո Էռնեկյանին, կամ ներկայիս կառավարիչներին:
Հարցին՝ ինչո՞ւ որոշվեց «Հայփոստը» պետությանը թողնել, արդյոք Էդուարդո Էռնեկյանի կառավարման օրոք «Հայփոստում» խնդիրներ կայի՞ն, Բաբայանը պատասխանեց. «Բանն այն է, որ նպատակահարմար է գտնվել պահպանել փաթեթը պետության ձեռքում եւ իրականացնել հետագայում նոր մրցույթ, որին, ենթադրաբար, կմասնակցեն ներկայիս կառավարիչները եւ ցանկության դեպքում միգուցե այլ օպերատորներ, բայց նոր նախապայմաններով կառավարչին կհանձնվի: Դրա համար հարկավոր է հանել մասնավորեցման ցանկից, մշակել այն ծրագիրը, որով զբաղվում է համապատասխան լիազոր մարմինը փոխվարչապետի գրասենյակի հետ համատեղ»։
Բաբայանն ասաց, որ իր նշած գործընթացը նախապատրաստելու համար ներկայիս կառավարչի հետ պայմանագիրն արդեն ավարտվել եւ երկարացվել է եւս 1 տարով։